TA’ITA’I O LE MAOTA, O LE MINISITA FOI LEA O LE MAOTA
Tusia: Asenati Taugasolo Semu
Na faamanino atili e le Afioga i le Palemia, Tuilaepa Sailele Malielegaoi lona tulaga o le ta’ita’i o le Maota Fono Faitulafono ma ona tiute taua e tatau ona faatino.
O lea tulaga na saunoa ai Tuilaepa, i le Fono a le Palemene lea na usuia i le vaiaso ua mavae, lea foi na faalagi ai e le Fofoga Fetalai e faapea, o le Afioga i le Palemia, o le ta’ita’i lea o le Maota.
“Ou te faatauaina le saunoaga a lau afioga (Fofoga Fetalai), ‘e tula’i mai le ta’ita’i o le Maota’, lea foi na tomua le tatou fono i lau saunoaga e faapea, ‘faaaliga mai le ta’ita’i o le Maota’. O a’u lea,” na saunoa ai Tuilaepa.
Na faailoa e Tuilaepa i le Fofoga Fetalai, le taua tele o lana saunoaga lea ‘o le ta’ita’i o le Maota’, ina ia malamalama ai nisi sui faipule e le o silafia lea tulaga.
“Ua ala ona ou faataua lau saunoaga, ona e i ai sui toaitiiti o le Maota lenei, e le o manatunatu i le uiga loloto o le upu, ‘ta’ita’i o le Maota’, a o le Minisita foi o le Maota.
“Lau afioga i le Fofoga Fetalai, e i ai foi ma se tasi sa avea ma Fofoga Fetalai. Sa avea foi ma Minisita o le Malo. E 10 tausaga o i totonu o le Maota lenei, ae lē malamalama i le uiga o le upu ‘ta’ita’i o le Maota’.
“O le taua lena o lau saunoaga i le taeao lenei, i lo’u tulaga faata’ta’i o le Maota, lea e mafua ai ona ou tulai atu ii, faatasi ma le Kapeneta. Leaga o lea ua tatou fono, o tatou o Sui Usufono o le Fono Aoao o le Palemene o le Malo o Samoa.”
Na saunoa Tuilaepa e maioio lelei tulaga e tatau ona i ai, aemaise o lona tulaga o le ta’ita’i o le Maota.
“… o lea tatou te fono, o Sui Usufono o le Palemene o Samoa. O Sui o nofoa o itumalo faapalota o lo tatou atunuu.
“Ua ou taua lea mea, ona e i ai ni manatu faaalia e faapea e lē tatau ona ou saofai ii, ma faatino o’u tiute o a’u o le ta’ita’i o le Maota. E afua i se malamalama lē faavaea, lē atoatoa, i le separation of powers, po o le tuueseeseina o le tulaga o le tutoatasi o itutino e tolu o le tafatolu.
“O le tafatolu lea tatou te talanoa ai, o le tafatolu o pulega faa-Malo o le Taupulega. E ese ai ma le tuueseeseina o paoa.”
Na saunoa le Palemia, o isi foi faigamalo faaperesitene, e i ai lava fesootaiga o itutino taitasi.
“O faiga na faa-Taupulega. O le a le uiga o le upu e i ai fesootaiga?
“E lē mafai ona galue atoatoa ia isi itutino (Faamasinoga ma le Fono Aoao Faitulafono), leaga e tasi le itutino (Pulega Faatonu) lea e i ai malolosi tele lava e lua.
“O le a le mololosi ia e lua?
“O le tupe e mafai ai ona faagaioi galuega a isi itutino. Ma le lua, o lea e iinei i le itutino lea o le Malo, ia le malosi e mafai ai ona puipui le saogalemu o le atunuu lenei. Le saogalemu mai ia i latou o solia tulafono, e faatino e le maota lenei.
“Lau afioga i le Fofoga Fetalai, ia manino lelei le tulaga lea. Lea e ui ina eseese itutino o le tafatolu, ae feuluulua’i lava, e fesoota’i.
“E le mafai ona tuto’atasi i le atoatoa se itutino pe a le galulue faatasi ma le itutino lea ou te tutula’i atu ai (Pulega Faatonu – Executive Government) i le itu lenei.”
Na faamanino foi e Tuilaepa, o nei tulaga uma na faatino uma i aga masani faale tulafono ma aga masani e faatino ai faigamalo faatemokarasi i lalo o Faiga Faavae, o Faigamalo Faapalemene.
“Lau Afioga i le Fofoga Fetalai, e taua tele le mea lea ua ou toe tula’i atu ai, ona e i ai sui toaitiiti o le Maota lenei, e fiafia tele i le mea lea o le faalele, a o upu a le atunuu e mau e faalele, mau e matau.”
