FA’APAFALA TIUTE O TA’AVALE ELETISE MO LE LUA TAUSAGA
Tusia: Tusiga Taofiga
Ua mae’a le faitauga fa’alua o le Tulafono Tau Fa’aofi o Teuteuga o le Tulafono o le Fa’asologa o Tiute 2020 i totonu o le Fono Aoao Faitulafono (Palemene).
Ma ua tu’u atu nei i le Komiti Fa’apalemene o Vaega Tau Atina’e (Economic Sector Committee) mo le iloiloina ma toe lipoti atu i le Palemene i se fonotaga o lumana’i ai.
O lenei Tulafono Tau Fa’aofi e patino i ta’avale e ola i le malosiaga o le eletise, lea e fa’apafala ai le totogiina o tiute mo le faaulufale mai o ia ituaiga taavale, ma le faaitiitia o le lafoga o le VAGST (lafoga faaopopo i luga o tau o oloa ma galuega fa’atino) i le 15 %.
O lenei tulafono o le a mata’itu pea e le Malo i le lua tausaga e fua i le tali a le atunuu e ala i ta’avale e auina mai i Samoa.
O le agaga atoa o le Malo, e pei ona fa’atuina ai le teuteuga o lenei tulafono, ina ia tau tāofiofi le toe faaulufale mai o ta’avale e fa’aāoga ai le penisini ma suauu kiso, ona o taumafaiga lava mo le faaitiitia o aafiaga o le siosiomaga.
Mo vaega ta’itasi (parts) o nei ta’avale e fia oka ma faaulufale mai i le atunuu, e lē aofia i lenei fa’amāma avega. O lo’o avanoa fo’i lenei fa’amanuiaga mo fale ta’avale ma pisinisi i le atunuu o lo’o latou fia aumaia nei ituaiga ta’avale.
Saunoa le Palemia, Tuilaepa Dr Sa’ilele Malielegaoi e fa’apea;
I le valu tausaga talu ai, sa talosagaina ai e se tasi o fai pisinisi i le atunuu, pe mafai ona aumai sana ta’avale eletise i totonu o le atunuu peita’i na te’ena e le Komiti na gafa ma le iloiloina o lea tulaga, ona e le’i fa’atulafonoina.
I le tausaga e 2015 na sainia aloaia ai e Ta’ita’i o Malo uma i le lalolagi, le feagaiga i totonu o Pale Farani, (COP21 Paris Agreement), ina ia tutūfa’atasi le lalolagi atoa e taulamua i atina’e talafeagai e tali atu ai i suiga ogaoga o le tau.
Ma o galuega uma o le a fa’atino, e tatau ona o’o atu i le tausaga e 2100, ua toe fa’afo’i le matagofie o laufanua o le lalolagi e pei ona i ai mai le amata foafoaina o le lalolagi.
O le taumafai ai o Samoa e amata tu’uina mai ta’avale eletise i totonu o le atunuu, o le sao lea i le fa’aleleia o le si’osi’omaga o lo’o tatou ola ai, aemaise se lalolagi ola fiafia ma sa’oloto, e aunoa ma ni mala fa’alenatura e tutupu fa’afuase’i mai lea taimi i lea taimi.
Fa’ailoa e le Palemia, ua maoa’e nei aso i le malosi o le vevela o le la, tele mala fa’alenatura e tutupu mai atunuu ‘ese’ese o le lalolagi, o le fa’ailoga lea, tatou te mautinoa ai ua tatau ona tula’i ma fai se galuega alofa, mo le puipuiga o le si’osi’omaga auā fanau i le lumana’i.
Na fautuaina fo’i e le Ta’ita’i o le Malo, i latou o lo’o fa’aauau pea ona susunu pa’u ta’avale, lafoa’i lapisi i vaitafe, sua le oneone mai le gataifale, tatu’u laau i le vaomatua, ina ia tautuana taofiofi le so’ona fa’atino o ia gaioiga lē talafeagai, e mafua ai ona mapuna a’e le tele o fa’alavelave tutupu fa’afuase’i tatou te le’i mafaufauina.
O lenei tulafono, o lo’o fa’apitoa lava i ta’avale e ola i le malosiaga faaeletise.
