E TAUA LOU FESILI I LOU ITUMALO
Tusia: Asenati Taugasolo Semu
Ua fautuaina pea Sui Faipule o Itumalo Palota, ina ia faamaoni i lo latou va ma o latou itumalo.
O lea tulaga na toe fautua mai ai le Afioga i le Palemia, Tuilaepa Sailele Malielegaoi faatatau i le faigapalota laitiiti ua sauni atu i ai le itumalo o Gagaifomauga Numera 3 i le Aso Faraile nei.
Ua toe fautua mai ai le Palemia, i le polokalame faapitoa ma le leitio 2AP i le aso ananafi, i le taua o le faamaoni o le sui faipule i le Vaega Faaupufai e tauva ai, ma ia tumau ai i le taimi atoa o le paeaiga.
“Manatua o le mea lea na ou faasilasila muamua atu, o le mea sili ona taua, e te see ese loa ma se vaega faaupufai na e lesitala ai, toe fai loa le faiga palota, aua e tatau lava ona e toe fesili i lou itumalo,” na saunoa ai le Palemia.
Na saunoa Tuilaepa o lo o taumafai le Tulafono e faa-amiotonu i latou ua lē amiotonu, ma ua sui Vaega Faaupufai e agai i ai, i totonu o se paeaiga, e pei o le sauni atu o Laauli Leuatea Polataivao Schmidt i le Faigapalota laitiiti a lona itumalo o Gagaifomauga Numera 3, lea ua mafua ona toe fai ona na faamavae mai le Palemene, ma ua faatu foi lana Vaega Faaupufai fou.
“A foi ma loa i Savaii ua malo (i le faigapalota), o lena faatoa sa’o, ae le na o le feosofa’i solo iinei (Upolu) ma fai le pati fou, ae le fesili i le itumalo, aua o lea ua i ai lau aitalafu i lou itumalo. “Na e fai i ai e te sau i le vaega lea (HRPP), a o lea ua fai lau pati.”
O le itu lea e taua ai lava le tulituli o le amiotonu e pei ona saunoa Tuilaepa.
“E taua le tulituli o le amiotonu, aua o le agaga lena o le faigapalota.
“Aua o le ala ua mafua ai ona fai le mea lea, e faatumau ai Malo, ma aua lē vevesi. Aua o mea ia e tupu ai vevesi o Malo. O le omai o tagata i isi pati, ae uma ane ua toe feosofi ese.”
Na saunoa Tuilaepa o mea na tutupu ua fatufatu mai ai Tulafono fou nei, ina ia mautu le Malo ma sologa lelei pulega ma le filemu.
Na ia saunoa foi, o le sui soo o vaega e feosofi solo i ai sui faipule ma vevesi o se Malo, e lē lelei mo se atunuu.
“E le matagofie i le vaai mai a le atunuu, e mataga tele. Aua o lea ua e nofo faataua lou manao faapito ae le faataua le tautuaina o lou itumalo, e tusa o lau folafolaga ma lau feagaiga ua uma ona e tauto ai.
“Lea ua ausia le agaga e toe fai le palota, ma o le mea pito sili ona taua lena ia a’u ma le matou vaega.
“O le mea taua ua amata faataoto Tulafono e unai ai faipule ina ia amiotonu ma faamaoni i o latou itumalo. Mea na fai ai a latou tautinoga i le itumalo.”
I le tulaga o le sa’o o le igoa o le sui faipule e lesitala ai ma tauva ai i le faiga palota, na saunoa Tuilaepa, e tatau lava ona tumau ai, e pei o le suafa o Laauli na tauva ai.
“O le sa’o o le igoa lea sa alu ai i le palota ma faamau ai lana tautoga i totonu o le Palamene, o Laauli Leuatea Polataivao Schmidt. Ae lua faaopoopoga lea ua i ai, o le …alemalietoa ma le Von.
“O Tuilaepa o le suafa o le aiga Sa Malietoa, ma o le ala lena ou te malamalama ai i mea ia.
“O mea faaopoopo …alemalietoa ma le Von, o mea fou, ma o mea faaopoopo e lē talafeagai ma le Tulafono.”
