AMATA FA’ASALALAUGA TAU TELEVISE O LE DIGITAL TV
Tusia: Asenati Taugasolo Semu
Ua susu’e se laupepa fou o le tala faasolopito o faasalalauga tau televise i totonu Samoa, lea ua see atu i luga i le tulaga o faasalalauga tau televise faaneionapo, le Digital TV.
O le Aso Gafua na tapē aloaia ai faasalalauga analoki (analog) lea na sau ai Samoa i tausaga ua mavae.
O le ‘auga o lenei suiga, mai le analoki i le digital, o le a mafai ai ona faaleleia atili auaunaga tau televise i le tulaga o le manino o ata, faalauteleina atu o le faasopolia i le mamalu o le atunuu, aemaise i vaega mamao i tua ma Savaii, e le i mafai ona maua muamua faasalalauga mai televise.
I se Pepa o Faamatalaga mai le ofisa o le Pule Faatonu, na faailoa ai, e ui i le tele o lu’itau ma faigata, ae ua mafai ona faatino lenei auaunaga ona o le galulue faatasi o kamupani tau televise, kamupani a le Samoa Digital Communication Ltd (SDCL), paaga o Matagaluega ma Faalapotopotoga a le Malo.
Ua tuuina atu foi ma le fautuaga mo le faaleleia atili o le auaunaga tau Digital TV, ina ia faatau se pusa set-top box; faatau se antenna ma uaea o le Digital TV.
Ua fautuaina foi le atunuu ina ia fesootai atu i le Ofisa o le Pule Faatonu ma le Kamupani a le SDCL mo nisi faamatalaga e fia malamalama ai, i le telefoni 30282.
