A’OA’OGA MO LE AUFAIGALUEGA I AUAUNAGA TAU TURISI
Tusia: Taunuuga Toatasi
E $1 miliona le Fa’amāma Avega (Stimulus Package) a le Malo mai le Vaega Lua o lana o le Tala o le Tupe sa pasia i le Fono Aoao Faitulafono, ua fa’amatu’u atu i le Pulega o Tagata Tafafao Maimoa mai Fafo (STA) mo le fa’aleleia o atina’e ma auaunaga tau turisi.
I lea fesoasoani o lo’o aofia ai le fa’atupeina o a’oaoga fa’apitoa mo fanau a le atunuu, ua fa’amalolō tumau (vāea) mai a latou galuega ona o a’afiaga mai le Koviti – 19.
O lo’o tatala fo’i le avanoa mo i latou o lo’o galulue pea i le taimi nei i auaunaga ‘ese’ese patino i tagata tafafao maimoa mai fafo e aofia ai faletalimalo, falea’iga, mata’aga, fale ta’avale – Rentals ma isi.
I le molimau a le Pule Sili o Pulega o Tagata Tafafao Maimoa mai Fafo (STA) ia Fa’amatuainu Lenata’i Suifua, e tusa ma le 2,000 le aofa’i o tagata faigaluega sa galulue i faletalimalo, faleaiga, mata’aga ma isi ua fa’amalolō tumau mai galuega, ona o a’afiaga o nei pisinisi i le Koviti – 19.
E tusa ma le 700 i latou e mafai ona maua avanoa e ao’oga ai e ala i lenei fa’amanuiaga.
O lenei taumafaiga a le Malo, ua maua ai le fesoasoani tau a’oa’oga e aunoa ma se totogi mo i latou o lo’o galulue i atina’e tau tagata tafafao maimoa mai Samoa.
O ia a’oa’oga o le a maua ai ma alauni e fesoasoani ai mo i latou o le a auai.
O lenei fa’amoemoe o le a galulue fa’apa’aga ai le STA, o le Iunivesite Aoao o Samoa, APTC, Samoa Business Hub ma le Asosi o Faletalimalo i le atunuu, ina ia mautinoa le fa’ataunu’u o nei a’oaoga tāua i sona tulaga maualuga ma lelei lona fa’atinoina auā le si’itia o tomai ma agava’a o i latou o lo’o galulue i nei auaunaga, auā le tautuaina o turisi faimai i Samoa.
O nei a’oaoga e aofia ai a’oaoga pupu’u (short courses) ma vaega aloaia (Formal Courses) ma e fuafua lava a’oaoga e fa’atino i nofoaga o le a fa’ataunu’uina ai.
Na fa’aopoopo foi le Ofisa Sili e fa’apea, o a’oaoga ua fuafua e fai e eseese nofoaga o le a fa’ataunu’uina ai, e tolu i Upolu ae lua mo Savaii.
O le Fa’atonu o le APTC i Samoa, Cheri Robinson Moors na saunoa e fa’alauiloa aoga pupu’u e lua o le a fa’atautaia e le APTC.
O nei aoga e aofia ai le F&B and Bar Servicing Skills, ma e tolu aso e fa’agasolo ai, mai le Aso 28 o Oketopa sei’a mae’a i le Aso 18 o Tesema 2020.
O le House Keeping Skills Set, e lima aso o le a fa’agasolo ai, amata mai le Aso 1 o Mati aga’i le Aso 30 o Aperila 2021.
O le Iunivesite Aoao o Samoa (NUS) o le a latou fa’atautaia a’oaoga pupu’u fa’atasi ai ma vasega aloaia e pei ona fa’ailoa e le Pule Sili ia Aiono Prof. Alec Ekeroma.
O aoga pupu’u e aofia ai le Introduction to Hospitality, a o aoga aloaia e i ai le Tusi Pasi lona II i le Mataupu tau Turisi ma le Talimalo i le kuka (Certificate in Tourism & Hospitality – Cookery), Tusipasi lona II tau Turisi ma le Talimalo – taumafa ma meainu (Certificate II in Tourism & Hospitality – Food & Beverage), Tusipasi lona II tau Turisi ma le Talimalo i le vaega tau Ofisa ma le Auaunaga e fai i Apitaga (Certificate II in Tourism & Hospitality – Front Office & Accommodation Services) fa’apea le Tusipasi lona II i le mataupu tau ta’imuaga mo turisi (Certificate II in Tourism & Hospitality- Tour Guiding).
O le Sui o le Samoa Business Hub, Tapusoa Senele Tualaulelei sa ia fa’alauiloa fo’i aoga o le a gafa ma latou.
O a’oa’oga pupu’u e aofia ai Aoga tau Fa’amatalaga ma Feso’ota’iga Fa’atekonolosi (Information & Communication Technology), mataupu tau Fa’amaumauga o vaega tau pisinisi (Business Essentials) ma le Auaunaga mo tagata lautele (Customer Service).
I fa’amaumauga a le Pulega o Tagata Tafafao Maimoa mai Fafo i le tausaga fa’aletupe 2019-2020, ua pa’ū ai i le 30.3% le faitau aofa’i o tagata e malaga asiasi mai totonu o le atunu’u.
O tupe maua a le Pulega i le tausaga fa’aletupe 2018-2019, e $514 miliona, a’o le tausaga fa’aletupe 2019-2020 e $357 miliona tala.
I le taimi nei o lo’o i ai Samoa i luga o Poloa’iga o Fa’alavelave Tutupu Fa’afuasei ma o taumafaiga a le Pulega e pei ona i ai, ina ia fa’agaioi ma fa’aāoga e tatou tagata auaunaga o lo’o ofoina mai e ia atina’e mo le mamalu lautele o le atunu’u.
