ALOAIA LE FA’AI’UGA A GAGAIFOMAUGA #3
Tusia: Tusiga Taofiga
Ua sainia aloaia e lana Afioga i le Ao Mamalu o le Malo, Tuimaleali’ifano Va’aletoa Suālauvi II, le talia aloaia o le i’uga o le Faiga Palota ua filifilia ai La’auli Polataivao Leuatea ma Sui Faipule o le Itumalo o Gagaifomauga #3.
Ua tu’u atu e le Ofisa o le Komisi o Faiga Palota le Poloa’iga o le Tusi Fa’amaonia mai lana Afioga i le Ao Mamalu o le Malo Samoa i le Fofoga Fetalai, auā se aso e fa’atauto ai La’auli i totonu o le Fono Aoao Faitulafono.
Mo le Itumalo o Gagaifomauga #3, e 1445 le aofa’i o tagata ua resitala mo lea Itumalo, ae silia i le 900 i latou sa mafai ona palota a’o le isi silia i le 500, e le’i mafai ona fa’ataunu’u la latou filifiliga sa’oloto e ala i la latou palota.
I aiaiga o le Tulafono o Faiga Palota, saunoa i ai le Komesina o Faiga Palota, ia Faimalomatumua Mathew Lemisio, ua aga’i le Ofisa e fa’atino aulape aga’i i ‘ai latou e le’i palota ma resitala.
“Mo le silafia e le atunuu, mo e le’i resitala, o le sala tupe e $2,000 muamua, ae a toe maua fa’alua o lona fa’asalaga e $4,000 peita’i mo i latou sa resitala ae le’i palota e $100 le fa’asalaga.”
“Ua amata galulue le Ofisa nei, e fa’amautu pe to’afia i latou ua maliliu, to’afia i latou ua malaga i atunuu i fafo, ona to’ese mai lea i le aofa’i e 500 mona tupu, ona mautinoa ai lea o le aofa’i sa’o o i latou e tatau ona fa’atino ai aulape o le Tulafono mo fa’asalaga ua fa’ata’atia.”
“O lea fuafuaga o lo’o matou galulue fa’atasi ai ma le Ofisa o Femalaga’iga (MPMC), Ofisa o Fuainumera Fa’amauina (SBS) ma le SNPF.”
“Matou te fautuaina fo’i Sui o Nu’u ta’itasi e le gata o le Itumalo o Gagaifomauga #3, a’o isi Itumalo, ina ia tatou galulue fa’atasi, e vave fa’ao’o mai i la matou Ofisa le lisi o suafa o i latou ua maliliu, ona e lē mafai ona matou aveesea se suafa o se tasi e aunoa ma se fa’amaoniga, ma o aiaiga na o lo’o ta’oto i totonu o le Tulafono.”
“O le vave ona tu’uina mai o suafa o i latou ua maliliu, e faigofie ai fo’i i le Ofisa nei, ona aveesea le suafa o i latou nei mai le lola palota, a’o tapena atu ai mo le Faiga Filifiliga tele a le atunuu i le tausaga fou.”
“E fautuaina fo’i le mamalu o le Itumalo, o i latou e le’i palota, e mafai ona e susū mai i la matou Ofisa e totogi lau sala tupe e $100, ma fa’amamā vave ai lou suafa, a’o le’i fa’asalalauina fa’alaua’itele le lisi o i latou e le’i palota.”
