AOFIA SAMOA I LE LI’O O ATUNUU E MAUA LE FUALAAU MO TOGAFITIGA O LE KOVITI – 19
Tusia: Asenati Taugasolo Semu
Ua mae’a ona tuuina atu le maliega a Samoa i totonu o le li’o o atunuu o le lalolagi e faasafua mai i ai fualaau o le KOVITI 19, pe a oo i le taimi e faamaonia ai ua maua se vailaau mo le faama’i.
O lea tulaga na faailoa e le afioga i le Palemia, Tuilaepa Sailele Malielegaoi i le polokalame ‘O le Taimi ma le Palemia’ i le Aso Faraile ua mavae.
“O le aso ananafi na logo mai ai a’u mo la’u ioega. O ananafi lea na ave ai lea maliega, ina ia i ai Samoa i totonu o le li’o o atunuu… o le taimi lava e maua ai le vaccine (vailaau mo togafitiga o le faama’i), sau loa ma tatou, faato’a tilotilo mulimuli ai lea i le tau,” saunoa ai Tuilaepa.
Na saunoa Tuilaepa, o le mea taua ia vave maua mai ni fualaau mo togafitiga o le faama’i.
“Lea la ua i ai tatou i le lisi o atunuu e maua loa fualaau sau sa’o loa si a tatou vaega (fualaau).
“O le taimi foi lea faatoa tatala faasoloatoa ai loa a tatou borders ma aumai ai loa le tatou vaalele.”
Na saunoa le Palemia, o Iuni o le tausaga fou, lea lava na fuafua mai le amataga o le faama’i lenei, e tatau ona oo atu i ai ua maua se fualaau po o se vailaau mo lenei faama’i.
Na ia taua foi, o le umi lava lea o tulaga o faama’i tetele faapenei, e mafai ona maua ai se fofo, ma o lo o galulue punoua’i ai saienitisi o le lalolagi i le sailia o se vailaau ma faia faata’ita’iga (tests).
Ae na faamanatu mai foi Tuilaepa, i le taua o le tumau o le faatuatua ma le faamoemoe i le Agaga o le Atua e vave maua ai se fesoasoani mo lenei faama’i faigata lea ua faitau miliona tagata o le lalolagi ua aafia ai.
Mo Samoa lava ia, e leai se tagata ua aafia, ae o lo o faaauau pea tapenaga ma puipuiga a le atunuu, tauala atu i Tulafono ma Poloaiga faataoto mai e le Malo, mo le puipuiga lautele.
Na faailoa foi e le Malo o Ausetalia i le vaiaso ua mavae, le tuuina mai o lana fesoasoani mo le itulagi a le Pasefika, i lalo o le polokalame o le COVAX AMC e lagolago ai mo le maua mai o le vailaau/fualaau mo togafitiga o le KOVITI 19.
O atunuu o le Pasefika o lo o aofia i le polokalame lenei a Ausetalia o Papua Niu Kini, Solomona, Vanuatu, Fiti, Samoa, Toga, Tuvalu ma Kiripati.
O le faamoemoe o lenei fesoasoani a Ausetalia o le mautinoa lea o le maua e atunuu uma o le vailaau pe a oo i le taimi e maua ai.
E $80 miliona le faatupeina o lea fesoasoani a Ausetalia mo atunuu o le Pasefika faapea ma atunuu i saute i sasae o Asia.
O le faamoemoe o lenei polokalame o le tuuina atu o tui e fua i le 20 pasene o le faitau aofai o se atunuu, i le vaega muamua o le fesoasoani, e faamautinoa le faamuamua o latou e galulue i tautua faasoifua maloloina faapea tagata matutua.
O le maua o le vailaau/fualaau mo togafitiga o le faama’i, o le a fesoasoani tele mo le toe faatula’i i luga o le tamaoaiga o le itulagi a le Pasefika talu mai le amataga o le faama’i.
O atunuu Asia o aofia i lenei fesoasoani e aofia ai Indonesia, Timor-Leste, Cambodia, Laos, Myanmar, Filipaina ma Vietnam.
Na faailoa e Ausetalia, o le a faaauau pea lana lagolago ma lana puipuiga mo le Pasefika.
