SILI LE PUIPUIA I LO LE TAU TOGAFITIA
Tusia: Taunuuga Toatasi
Ua fa’ai’ugafonoina e le Kapeneta, le fa’aāoga o fa’asalalauga fa’aneionapo (Digital) e fa’asalalauina ai polokalame tuai o Teuila o tausaga ua mavae, e fa’amanatuina ai le Teuila o lenei tausaga 2020.
Ua o gatasi lea fa’ai’uga ma le tausisia o aulape o le Poloa’iga o Fa’alavelave Tutupu Fa’afuase’i o lo’o fa’amamaluina nei ona o le Koviti – 19, e pei ona fa’atautaia ai fo’i le fa’agasologa o Polokalame mo le fa’amanatuina o le Tuto’atasi o le Malo Samoa i lenei lava tausaga.
O le ulua’i tausaga nei, ua lē fa’amanatuina ai le Tuto’atasi ma le Teuila i ona tulaga e masani ai, e ala i sauniga fa’apitoa fa’alemalo, fa’atasi ai ma polokalame o tauvaga o fa’afiafiaga ma ta’aloga, fa’apea fa’aāliga o measina a Samoa ma le sailia o se Lalelei o le atunuu 2020 – 2021.
O le naunauta’iga o le Malo, ia taofiofi le tumutumu o tagata i se nofoaga e tasi, ina ne’i a’afia fa’afuase’i tatou i le Koviti – 19, ona faigatā lea ona toe tineia, aemaise o lo’o tausailia pea se vaifofō o lenei fa’ama’i.
O le naunauta’iga atoa o le Malo, “E sili lava le puipuia i lo le tau togafitia”.
O le Aso Sa na fa’asalalauina ai le Sauniga Lotu sa ta’ita’ia e le Fa’afeagaiga ia Rev. Isaia Kalepo, mai le EFKS i Leauvaa, a’o le Minisita o Turisi, ia Salā Fata Pinati na saunoa i le saunoaga autu.
O nei suiga ua fa’atino e le Malo, na molimauina ai le talia ma le fa’afetai e le mamalu o le atunuu, ona o le vaai mamao i le ono pepesi ai o lenei fa’ama’i i Samoa.
Fa’aālia le taofi o le tamā ia Viliamu Sio Mapusua o Maagiagi e fa’apea, o le taimi nei, ‘aua ne’i toe faia ni aso fa’amanatu e ono potopoto ai tagata to’atele i se nofoaga e tasi.
A va’ava’ai atu i luga o televise i tala mai atunu’u mamao, i le to’atele o nai tagata o la atunu’u ua ma’imau soifua i lea fa’ama’i, e lagona ai lava le loto vaivai.
“A silasila fo’i i aiga o Samoa, o se aiga e tasi, e i ai le tinā, tamā le fanau, o fanau a fanau, o fanau a fanau a fanau. Pe tolu augātupulaga o lo’o nonofo i le fale e tasi, ona o le tu ma le aga lea a aiga Samoa, pe to’atele lava i fea le fanau, o le itu pito sili ona tāua i le toeaina ma le lo’omatua, o le va’ai atu o lo’o mafuta fa’atasi.
O ituaiga fa’ama’i fa’apea, e tatau ona tatou fa’aeteete, aemaise e le’o mautinoa po ua maua se vailā’au e foia ai lea siama. Afai nei ae o’o mai i Samoa, Talofa e, o le a leai se ‘ese’esega ma le fa’ama’i sa a’afia ai le atunu’u i le tausaga e 1918.
Auā, afai e a’afia le tagata e to’atasi o le aiga, ae to’atele o lo’o nonofo fa’atasi, o lona uiga, e a’afia uma tagata o le aiga lea e tasi.”
Ae fa’afetai i le Malo, ona o le tofā tatala ma le fa’autautaga loloto, ua fa’aāoga ai televise ma leitio e fa’asalalau ai fa’afiafiaga ma polokalame o ia aso fa’apitoa e pei fo’i ona i ai le fa’amanatuina o le 58 tausaga o le Tuto’atasi o le Malo o Samoa i lenei tausaga.
Tatou te fa’atāua ma fa’amanatu nei aso fa’apitoa e pei ona i ai le fa’asalalau i le televise, ae le’o aveesea ai le tulaga o le fa’amanatu, e ui ua i ai suiga, ae o lo’o tumau pea lona aano moni ma lona tāua ia Samoa ma ona tagatanu’u.
E fa’apea fo’i le manatu o le tinā ia Soifua Auapaau Kerisiano mai Sālua Manono – Tai.
“Ua 100% le fa’ai’uga a le Malo i suiga o le fa’amanatuina o le Teuila i lenei tausaga. O suiga lelei mo le saogālemu ma le malu puipuia o soifua o le atunuu lautele.
O lea e feagai le lalolagi ma le fa’ama’i oti, e fa’afetaia ai pea le alofa ma le agalelei o le Atua, o lo’o malu puipuia pea Samoa.
“E ui e le’i o’o mai lenei fa’ama’i, ae o le mataala o le itu pito sili lea ona tāua. Ia mataala i so’o se taimi, po’o a lava a tatou fa’ai’uga e fai, o inā e atagia ai lo tatou alolofa i lo tatou atunu’u.”
Tatou te puipui i le so’ona potopoto i nofoaga faitele, aemaise o totonu o le taulaga, i le tele o mau ea ‘ese’ese. A’o le aogā lena o le fa’ai’uga a le Malo, e puipuia ai o tatou tagata, ina ia tumau pea i le saogālemu mai le Koviti – 19.
“Oka se matagofie o polokalame o le fa’asalalauina o fa’afiafiaga ma ta’aloga o Teuila i tausaga ua tuana’i, tatou te matamata ai, auā leiloa pe sau ai se fa’afiafiaga sa ou auai ai ma toe va’ava’ai ai i ota foliga i na fo’i vaitaimi.”
O le Tausala o Samoa ia Fonoifafo Nancy McFarland Seumanu o le a ia tauaveina pea le pale o le Tausala o Samoa ma le Tausala o le Pasefika mo le isi 12 masina o lumana’i.
