SAOGĀLEMU LE 323 O SEILA SAMOA MAI LE KOVITI – 19
Tusia: Taunuuga Toatasi
O lo’o malu puipuia ma leai se tasi o tamafanau e to’a 323 o seila Samoa o lo’o galulue i va’a la’uoloa ma va’a la’u pasese i atunuu i fafo o a’afia i le Koviti – 19.
O le fa’aāliga lea mai le Pule Sili o Auaunaga o Va’a a Samoa (SSS) ia Lautimuia Afoa Uelese Vaai i le feiloa’iga ma le Savali.
Fa’ailoa e Lautimuia, mai le amataga o le fa’ama’i, e le’o fa’atamala lava le Malo i le mata’ituina o le Soifua Maloloina ma le saogālemu o tatou tamafanau o seila Samoa o lo’o galulue i luga o va’a i atunu’u i fafo.
E le’i muta lava fe’utana’iga ma feso’ota’iga a le Fa’alapotopotoga ma Kamupani o lo’o galulue ai a tatou seila, o le naunauta’iga atoa o le Malo, ia mautinoa e leai se tasi e a’afia ma ma’imau se Soifua ona o le Koviti – 19.
“I le taimi nei o lo’o fa’aauau pea feso’ota’iga ma fe’utana’iga ma Kamupani va’a nei, i le tausia lelei ma le vaaia toto’a o le soifua maloloina o nei fanau a’o i ai i luga o va’a, e tālia ai se aso e toe tatala ai tatou femalaga’iga fa’avaomalo ona toe fa’afo’i mai lea o i latou ua tatau ona toe fa’afo’i mai.
Saunoa Lautimuia e fa’apea;
“Ua toe amata faigaluega uma le to’atele o seila (93%) a’o le isi 7% o lo’o tālia pea nisi avanoa faigaluega, a’o isi o lo’o galulue lē tumau (part time) e fua i le mana’omia.”
“O lo’o fa’aauau fo’i feso’ota’iga i vaiaso uma a le tatou SSS ma seila o lo’o i luga o va’a, ina ia mautinoa lo latou saogālemu aemaise o ni mataupu e mana’omia ai le fesoasoani atu a le Auaunaga.”
Na fa’ailoa fo’i le finagalo o le Pule Sili, mo le fa’atalanoaina o se maliega mo se malaga fa’apitoa e toe fa’afo’i mai ai a tatou tamafanau seila ua mae’a konekarate e pei fo’i ona faia i fanau ua mae’a a’oa’oga sikolasipi i nisi o atunuu o le lalolagi.
“O le tulaga i se malaga fa’apitoa mo le toe aumaia o seila, e fa’alagolago tasi lava i le finagalo o le tatou Malo, e tauala mai i le Kapeneta.
“O le taimi lenei, o lo’o taofia so’o se malaga fa’apitoa, ona o lo’o ave le fa’amuamua a le tatou Malo i le puipuiga o le tatou atunu’u i Samoa nei.”
O lo’o talitali pea le fa’asologa o le toe fa’afo’i mai o tatou tagata o lo’o taofia i fafo, e pei ona manino mai i le finagalo o le Kapeneta.
“E foliga mai o lo’o ‘ave le fa’amuamua i o tatou tagata o lo’o taofia i Niu Sila ona fa’asolo atu ai lea i Ausetalia ma fa’asolosolo atu ai i isi atunu’u tetele e aofia ai ma atunu’u i Europa ma Amerika lea o lo’o i ai va’a nei o lo’o faigaluega ai a tatou fanau.”
E ui lava o lo’o tālia pea le fa’agasologa o fuafuaga a le Malo, ona o puipuiga o Samoa mai le Koviti – 19, peita’i o le itu tāua i le SSS i le taimi nei, o feso’ota’iga ina ia mautinoa o lo’o saogalemu pea tamafanau a Samoa o lo’o galulue i luga o va’a i atunu’u i fafo.
“O le itu tāua i le taimi nei, o le galulue ma fai feso’ota’iga e mautinoa ai o lo’o saogālemu ma tausia lelei a tatou seila i luga o va’a a’o tālia le fa’agasologa o fuafuaga a le tatou Malo mo le toe fa’afo’i mai o tatou tagatanu’u o lo’o i atunu’u i fafo.”
