FALEAOGA FOU A LEAUVA’A, PINE FA’AMAU O FAIGAPA’AGA MAUA’A A SAMOA MA IAPANI
Tusia: Asenati Taugasolo Semu
Ua atili maua’a faigapaaga a Samoa ma Iapani e pei ona faailoa i le umusaga o le faleaoga fou o le afioaga o Leauvaa i le Aso Faraile ua mavae.
O lea faleaoga fou ua faatuina i le pitonuu o Sātaputū Leauvaa, na faatupe e le Malo o Iapani le $243,000 faapea ma le sao o le afioaga.
O lenei galuega e valu potu aoga, potu o faiaoga, potu tusi ma faleui, lea o le a faaaogaina e fanau aoga e 360 o lo o a’oa’oina ai.
Na saunoa le Afioga i le Palemia, Tuilaepa Sailele Malielegaoi i le saunoaga autu o le aso i le taua o le sao o paaga a Samoa ma Malo fesoasoani i le atinae o le atunuu aemaise i tulaga tau aoaoga, faapea galuega lelei a le afioaga, komiti o le aoga ma matua.
“E lē tele ni a tatou seleni a o tatou faiga paaga ia tatou te faia ma isi Malo, faapea le malo o Iapani lea tatou te lototetele ai, ma faatino ai a tatou galuega,” na saunoa ai Tuilaepa.
“E augofie Malo i fafo e fesoasoani mai, ona o le pulega lelei ma le filemu o Samoa, faapea le faaaoga tatau o tupe.
“O le malosi foi lea e tuuina atu tatou te talatalanoa ma finafinau ai pea ma Malo nei mai fafo, ae faavae le augofie ma le agaga fia fesoasoani ona o lo latou vaai mai, e le gata ina faatino lelei galuega ma faaaoga lelei seleni, ae o lo o faafeagai foi ma se Malo e fealofani, se Malo e tumau le filemu e leai se vevesi.
“O tulaga ia e moomia e Malo e fesoasoani mai ia Samoa. E silasila mai o lo o i ai le to’afilemu, ma o lo o faafoe lelei foi a latou seleni. E le o se Malo e aumai fesoasoani tau seleni ona lafo lea i le moana o latou le afu o o latou foi tagata totogi lafoga.
“O le faavae ia o Malo uma o le lalolagi e faamoemoe ma faalagolago a latou galuega i le afu o latou tagata ma latou pisinisi o lo o totogi lafoga.
“E le itiiiti le agaga faafetai i tatou paaga i le sao tele lava i lenei atinae lau afioga i le Amapasa o le Malo o Iapani. Momoli le faafetai tele, ia tumau ai pea lo tatou galulue soosoo tauau.”
Na faafetaia foi e Tuilaepa le galuega a le afioaga, komiti o aiga ma matua.
E vii le Alii i le malosi ma le tofa saili, o tou komiti i le tulaga o le mataalia i le faafeagai ai ma faaatino talosaga o lo o tuuina atu i le Malo lenei o lo o faipaaga ma le tatou Malo, aua le manatu i le auiluma o manuia o fanau. Faamalo i le komiti o le aoga ma matua.”
Na saunoa foi le Amepasa o Iapani i Samoa, Genichi Terasawa ma faailoa le fiafia o lona Malo e tuuina mai nei fesoasoani mo Samoa, e atili faamausali ai faigapaaga a Malo e lua, aemaise o le sao o lona atunuu i le saga unaia o aoaoga mo le manuia o fanau a Samoa.
Na fautua foi le Amapasa mo fanau aoga.
“Mo fanau aoga, O nai tou mātua aemaise le tou nu’u sa galulue malosi ina ia fa’aleleia le tou faleaoga aua le manuia o tou a’oa’oga. O matou mai Iapani, ua na’o le fesoasoani mai lava. Ia outou fa’afetaia ma amanaia le galuega fitā a nai outou mātua fa’apea le tou nu’u ile toaga e su’esu’e, fa’amaoni i meaaoga aemaise le toaga ile aoga aua se lumana’i manuia mo tou aiga, nu’u ma Ekalesia.
Ia avea lenei poloketi e saga fa’amausãli ai le faigauõ ma le faigapa’aga, o malõ e lua o Iapani ma Samoa.
“Momoli atu la’u fa’amalõ ma fa’amanuiaga mo le aga’i atu ile fa’aiuga o lenei tausaga fa’alea’oaoga.”
O le Minisita o Aoga, Loau Solamalemalo Keneti Sio ma le Amapasa o Iapani na ootiina le lipine o le faleaoga fou.
