80 AVANOA FAIGALUEGA FOU MO SEILA SAMOA
Tusia: Tusiga Taofiga
Ua i ai le fuafuaga a le Auaunaga o Va’a a Samoa (Samoa Shipping Services), o le a malaga auaua’i fanau e 80, mo konekarate i avanoa faigaluega tau seila ua fa’amanuiaina ai, fuafua i femalaga’iga a va’alele i le taimi nei.
O le 80 avanoa faigaluega fou, ua fa’aopoopo i isi avanoa faigaluega e 323 o lo’o galulue ai a tatou tamafanau i va’a la’u oloa ma va’a meli i atunuu i fafo.
Fa’ailoa e le Pule Sili o Auaunaga o Va’a a Samoa, ia Lautimuia Afoa Uelese Vaai, e tele ma lavelave tapenaga ma fa’atalanoaga e tatau ona fa’amautu mumua mo le fa’asauni atu o fanau i nei galuega aemaise puipuiga mai a’afiaga o le Koviti – 19:
“O le filifiliga o i latou tonu e agava’a mo le galuega, e aofia ai le malosi atoatoa o le tino ma le mafaufau aemaise o le tāua o le fa’atalanoaina o seila ma o latou aiga ina ia manino vaega uma, atoa ai ma le tu’uina mai o le loto malie o le seila lava ia ma lona aiga e malaga ai e faigaluega i avanoa nei. E tāua tele le fa’amautu lelei o le vaega lea.
“O fa’atalanoaga mo le tapenaina o pepa malaga aemaise le fa’amalieina o aiaiga uma fa’a – le – soifua maloloina ona o puipuiga mai le Koviti – 19.
“O le tapenaina o malaga a va’alele fa’apea atunuu o le a ui atu ai faigamalaga ina ia mautinoa le taunuu saogalemu o seila i luga o va’a o le a faigaluega ai, e aunoa ma se poloka (stranded) i se atunuu, pe a a’afia i le fa’ama’i.
“O le fuafuaga lata mai o loo i ai nei, e malaga auaua’i i latou nei e 80 e fua i avanoa ma malaga a va’alele o lo’o fa’ataga mai i totonu o lo tatou atunuu i le taimi nei.
Na fa’ailoa fo’i e Lautimuia, i le fa’atoā tula’i mai ai o le Koviti – 19 i le lalolagi, e latalata i le 200 seila Samoa na fa’amalōlo lē tumau mai a latou galuega i va’a tetele nei peita’i i le taimi nei, toe 19 le aofa’i o i latou o lo’o fa’atalitali pea nisi avanoa faigaluega ma o lo’o fa’aauau pea fa’atalanoaga a le Pulega o Auaunaga o Va’a a Samoa (SSS) ma nei kamupani mo ni avanoa faigaluega mo i latou nei.
O le Aso Tofi nei, 10 Setema 2020, i le 10 i le taeao, o le a fa’ataunu’u ai le feiloa’iga a le Palemia ma nei fanau, e momoli ai upu fa’alaeiau ma le fa’amalosiau a le Ta’ita’i o le atunuu i nei fanau, ua maua avanoa e malaga aim o nei galuega konekarate.
