FUAFUAGA MAMAO A LE MALO MO GALUEGA FA’AVAITAIMI
Tusia: Tusiga Taofiga
I fa’amaumauga a le Matagaluega o Pisinisi, Alamanuia ma Leipa, e lata i le 1,200 tamafanau a le atunuu pe a tu’ufa’atasi Niu Sila ma Ausetalia, o lo’o galulue pea i galuega fa’avaitaimi ta’i 6 – 7 masina.
O nei faamaumauga ua fa’atumau ai le fa’amalosia faigapa’aga vavālalata a le Malo o Samoa ma le Malo o Niu Sila ma Ausetalia, auā le fa’afaigaluegaina o a tatou tamafanau i galuega fa’avaitaimi.
E ui i le a’afia ai o le lalolagi i le Koviti – 19, ma ua i ai le popolega o nisi i le ono muta ai o nei avanoa mo Samoa, ona o le tulaga lamatia o tamaoaiga o atunuu uma e aofia ai ma avanoa faigaluega.
Peita’i na tali le Ta’ita’i o le Malo, Tuila’epa Dr Sa’ilele Malielegaoi e le’o moemoenoa le tofā sa’ili a le Kapeneta mo le fa’aauau pea o lenei faigapa’aga.
Saunoa le Palemia, e lē mafai ona tu’ulafoaina tatou e nei atunuu, auā o lo’o fa’alagolago fo’i le ola o a latou pisinisi i le aufaigaluega o lo’o galulue, ina ia ‘aua ne’i fa’aletonu le atina’e o le tamaoaiga e afua i le leai o se tupe maua mai nei kamupani.
