FA’AFETAIA LE MALO MO GALUEGA FA’AVAITAIMI FOU I ATUNUU I FAFO
Tusia: Taunuuga Toatasi
O le maua pea o galuega fou mo fanau a le atunuu i luga o va’a, aemaise galuega fa’avaitaimi i Niu Sila ma Ausetalia, o le pine fa’amau lea, o le mo’omia pea e nei kamupani o a tatou tamafanau, ona o le fa’atuatuaina ma le fa’amaoni i galuega.
E ui i a’afiaga o le lalolagi ona o le Koviti – 19, ae le’o malolo ai le Malo, i le sa’ili pea o nisi avanoa faigaluega fou, mo tatou tagata.
O le ala lea ua toe maua ai isi avanoa faigaluega fou e 80 mo Seila Samoa, e galulue ai i va’a la’upasese i atunuu i fafo, fa’atasi ai ma le toe fa’afaigaluega o isi Seila e 323 ua mae’a konekarate, ma le lata i le 1,200 tagata Samoa, ua toe galulue i galuega fa’avaitaimi i Niu Sila ma Ausetalia.
O nei avanoa fa’aauro, na fa’ailoa ai le agaga fa’agae’etia o nisi o le atunuu, e aofia ai ma le tamā ia Amiatutolu Alatinafuāuli, 52 tausaga mai Vailoa, Aleipata, ona o le naunau o le Malo Samoa, e sa’ili galuega mo a tatou fanau, e ui i le tulaga a’afia o le tamaoaiga o le lalolagi ona o le fa’ama’i oti.
Saunoa Alatinafuāuli e fa’apea;
“Ua tatou molimauina le alofagia o Samoa, e le gata o lo’o fa’asaoina mai le Koviti – 19, a’o lea fo’i ua toe tatala mai faitoto’a mo avanoa faigaluega mo tatou tagata, e ui o lo’o pepesi le fa’ama’i i ia atunu’u.”
“Fa’afetai i le Malo, ona o le fa’ama’ite i mea lelei e ala i lenei polokalame, ua manuia ai aiga o Samoa. E le gata i lea, a’o kamupani fo’i ua latou toe tatala faitoto’a mo le sailiga manuia a nai o tatou tagata.”
Na fa’ailoa fo’i e lea tamā, ua fa’aono ona malaga atu i galuega fa’avaitaimi i atunuu i fafo, ma e tele fa’amanuiaga na maua e ia ma lona aiga, e ala i tupe maua mai nei galuega, sa fa’atupe ai le nisi o atina’e i totonu o lona lava aiga, aemaise o le fesoasoani i mea fai a le ekalesia ma le nu’u.
“Ua mautu lo’u fale fa’atasi ai ma meāfale, o le ta’avale ma isi lava fa’amanuia e atia’e ai si ou aiga.
“E leai se mea e faigatā pe afai tatou te fa’amuamua le Atua i taimi uma tatou te galulue ai, mo lona agaga fesoasoani e foa’i mai ai le malosi i taimi o galuega.”
E o’o lava i fa’afitauli e pei ona fa’aālia e lea tamā, e āfua lava ona ua lē pulea e le tagata lona loto.
“A tu’u mai fo’i i fa’afitauli e tutupu, o le tagata lava ia e māfua ai ona a’afia i fa’afitauli. Afai na e malaga ma lou fa’amoemoe, o le manuia o lou aiga, mātua, fanau ma le to’alua o lea e fa’alagolago atu ia te oe, o lona uiga e lē māma fo’i ia te oe ia manuia ua maua.
Manatua fo’i, e i ai lava fa’aosoosoga a le fili ma le tiāpolo, ae a pulea e le tagata lona loto, e i ai lo’u talitonuga e leai se mea faigatā.
O le agaga fa’afetai fo’i na saunoa i ai le tamā ia Uelese Mulipola, 54 tausaga o Tafa’igata, ma ia fa’ailoa ai e fa’apea;
“E to’alua la’u fanau ua maua mai fa’amatalaga, ua toe maua avanoa e galulue ai i Niu Sila.”
“O se polokalame aogā tele mo aiga aemaise tatou e vaivai le tamaoaiga, a’o se avanoa le aumaua fo’i mo tatou e fesoasoani ai i le atina’e o aiga, ekalesia ma nu’u.”
“Ua mautu lo matou fale, o le ta’avale ma o manuia pito sili ia ona tāua i totonu o so’o se aiga, auā le aiga atoa ma fanau i aoga.
