O LE MAFAUFAU O LE TAGATA VAIVAI, NA’O LE MASALOSALO LAVA LE MEA E MAUA AI
Tusia: Asenati Taugasolo Semu
O le mafaufau o le tagata vaivai, na’o le masalosalo lava le mea e maua ai.
O le fa’atusa lea a le Palemia, Tuila’epa Dr Sa’ilele Malielegaoi i mafaufau o tagata tete’e ma taufa’aleaga i atina’e ma taumafaiga ‘ese’ese a le Malo mo le lumana’i manuia o tagata.
“Ua tele taufa’asese. O le fa’alavelave o lea avatu e le Malo fa’amatalaga sa’o ae fa’alava ane le vaega taufa’asese, e aofia ai le SSIG ma isi, ona ligiligi lea i ai o le tele o pepelo,” saunoa ai
Tuilaepa.
O mataupu e pei ona fesiligia ai le Palemia e le polokalame a le Taimi ma le Palemia a le TV1, o le fe’avea’i pea e tagata o fa’amatalaga fa’apea e a’afia ai fanua fa’aleaganu’u i totonu o le Teuteuga o Tulafono mo le Fa’amasinoga o Fanua ma Suafa, lea o lo’o fa’agasolo nei fa’atalanoaga.
Na saunoa Tuila’epa, ua manino tala’iga pepelo na faia e le SSIG, o se Vaega Fa’aupufai fa’asaga i le Malo, ma ua a’afia ai le tele o tagata.
“O le ala lena ua toe afaina ai mafaufauga o tagata, ua fiu le Fa’amasino Sili talu ai (Tiavaasue Falefatu Sapolu), fiu le Malo e fa’amanino atu, e leai ma se fanua fa’aleaganu’u o a’afia i totonu ii (Teuteuga Tulafono o le Fa’amasinoga o Fanua ma Suafa).
“A’o lea lava e o ma fai tala’iga. O le mafaufau lena o le tagata vaivai, na’o le masalosalo lava le mea e maua ai.
“O fea nei o i ai le SSIG? Sa pei o le pa mai o le faititili i le lua tausaga talu ai, o lea pepelo i luga o lea pepelo i luga o lea pepelo, fea la o i ai nei? Lea ua lauiloa uma e tagata le tele o le tala’iga sese. Lea fa’ato’a manino lea tala’iga pepelo na fai nei.
“Lea fo’i na ta’utino i totonu o le Fa’amasinoga e le isi fo’i sui, mea na nonofo lava latou ma faufau.
“E i ai lava le upu taua fo’i lea. O le fua e te fuaina atu, e toe fuaina mai ia te oe.
“Fea la le malosi lea sa o ai nei fa’aleaga le Malo?
“E leai la ni tulaga o afaina ai fanua tau Samoa o lotea i totonu o Tulafono nei.”
Na saunoa Tuila’epa, e le mafai ona lotea ma suia le Tulafono i fanua fa’aleaganu’u se’iloga e fai se Pelepesite. Ma o lo’o malu lava le Vaega 102 o le Fa’avae i fanua fa’aleaganu’u.
“E atagia ai iina, le atamamai o tatou ta’ita’i na i ai i lena taimi. E le mafai ona fai le mea lena se’iloga e fai se Pelepesite a le atunu’u lautele pe talia. E lē mafai ona talia na mea.”
Na fa’amamafa e Tuila’epa, o Sui Faipule o le Palemene, o matai Samoa, ma o matai sa’o foi le toatele o isi sui.
“Aemaise o matou nei ei totonu o le Palemene, o matai uma. E tumu i matai sa’o, ma o le latou tiute lea e puipui fanua o aiga.
“E leai se tagata e iai sau mea taua a e manao e sau e tia’i? E lē talafeagai. O le isi mea ua ou matauina, i feedbacks ia e sau, ua o atu (tagata taufaaleaga) faatupu manatu sese ua faatupu ai le lotoleaga o tagata.”
Ua toe saunoa foi Tuilaepa i tulaga o matai sa’o, e tau taofiofi le soona fai, ina ia tumau le mamalu o tulaga o le aganuu e tatau ona i ai.
“O le isi foi mea lea e tau maua atu e tetee ai isi, i luga o taufaaleaga ia a SSIG, o mea o matai sa’o, fai mai ua puletutū ai le le Malo.
“A o le Tulafono na faavae i luga o le komiti lea sa talo ai le atunuu atoa e omai e fai ni latou molimau i le ulua’i tausaga o le nofoaiga lenei, i le lima tausaga talu ai.
“Lea na omai fai molimau, ma agai ai loa le toatele, ua lava sa’o ia e toalima e aloaia, ina ia tumau le mamalu, ona o le mea lea ua i ai, ua faataaloga i vai. Ua oo isi (matai sa’o) i le afe.
“E tele foi aiga na o le tasi lava le matai sa’o. O Tutuila e matua faataua lava le tasi (o le mata’i sa’o).”
Na saunoa Tuilaepa, o manatu ia, o manatu mai le atunuu. A o a mea ia ua toe fai, lea foi ua toe ave i le atunuu. Ae ua tu’uaia le Malo ua amatamea, ae leai o finagalo na o le atunuu.
“Ua fiu foi latou (le atunuu) i le mea lea o le nofo o le mata’i sa’o ma fai mau matai, toe tetele ma latou tupe, lona uiga o lea ua su’e tupe ai.
“E ala ona ave i le Faamasinoga ona ua toe fetaua’i lava aiga. A o tofiga ia o tofiga e tatau ona fai e aiga.”
I tulaga lava o fanua faaleaganuu, na toe faamanino ai e Tuilaepa ia latou o lo o taumafai lava e faasese lea mataupu.
“E lē mafai ona avea e se Malo fanua faaleaganuu, i se tulaga ave faamalosi sei vagana ua i ai se atinae e moomia ai e le Malo se eleele mo le faaaogaina e tagata lautele. Tai pei o le auala. Pau la lena o le mea e i ai le Tulafono.
“Pau lena o le Tulafono e mafai ona ave ai e le Malo le fasi eleele lea e oso atu ai le auala e feoa’i ai tagata lautele o le atunuu. Na pau lava lea o atinae a le atunuu, ae fai lava le taui.”
Ae le mafai ona faatau ese ni fanua faaleaganuu e pei ona toe faamanino e Tuila’epa.
“Manatua foi le mea lea na tupu i Salelologa. Lea na aumai ai e le Malo le fanua o le a fai ai le atinae o le taulaga.”
Na toe faafoi e le Malo se vaega o eleele ia Salelologa, ona toe fai loa lea o le Tulafono e toe faafoi ai, e pei ona saunoa Tuilaepa.
“Ae faafoi la i luga o fanua faaleaganuu e taofi ai, aua nei fetagofi le afioaga o Sakalafai ma toe faatau. Aua o lea e tumau lava le tulaga faaleaganuu.
“Ae i ai mea ua tupu, ua nonofo isi ma faatau. Oo mai i le taimi nei e leai se tulaga ua aloaia leaga o fanua faaleaganuu.
“O le tulaga lena na mananao ai, pe mafai ona faatau ina ia mafai ai ona fai latou loans ma noatia ai. O se mea e faaletonu tele.”
I le tulaga o le lisiina o fanua faaleaganuu, na toe saunoa Tuilaepa, a uma lava le taimi o le lisi, ona tapena ese lea o mea uma a le tagata na lisiina le fanua, ae taatia lava le fanua o le aiga latou.
Na toe fafagu ai e Tuilaepa le taimi na faatulaga ai Tulafono e suia ai le itu auala ma suia taavale i foeuli taumatau. Lea foi na tetee ai le toatele, a o lea ua tofu ma taavale foeuli taumatau i le taimi lenei.
“O le itu o le Tulafono lea, e leai se mea ese ai le Tulafono lea ma le Tulafono o Taavale Afi, i le tetee, tetee a o lea ua ‘ae’ae nei, ua fiafia ua tele latou taavale e o i le itu tauagavale.
“Ae sa matua tetee lava, ia e faapena foi la lea Tulafono ua faagasolo nei.
“O le Tulafono lea sa tetee ai foi isi faipule, ma o ese ai lava ma le matou vaega (HRPP). Tai pei o Palu (Palusalue Faapo II), matua tetee lava Palu fai mai e leaga.
“Ae fai mai le isi vaega a aumai taavale ia e oo atu i le 700 le aofai o tamaiti pepe o le a solia.
“O lona uiga pau lea o le ituaiga taavale na ona ola lava alamu atu loa oso i totonu o ta’inamu.
“Ae pau a lena o mea e fealua’i ai, puna mai fafo o le ta’inamu o lea aiga oso atu i le ta’inamu o lea aiga. A tau atu i le fogafale fa, a’e i le fasitepu, e su’e lava tamaiti e soli.
“O tagata ua leaga ulu.
“Lea ua iloa nei, e leai lava se mea o leaga. Faapena foi la ma mea ia.
“Tetee, tetee, tetee, ae toe uma lelei ifo lava, ua toe ‘ae’ae ai ma pepese alleluia.”
