SA’ILIA E O LO’O FA’ALEAGAINA NISI O ATINA’E FOU A LE MALO
Tusia: Tusiga Taofiga
Ua fa’ailoa le fa’anoanoaga o le Pulega o Fuafuaga mo Nofoaga i Taulaga (PUMA), ona ua fa’aleaga e nisi molī fou i tua o le Fale o le Malo (FMFM II) i Matagialalua, i le atina’e tele mo le fa’amatagofieina o le taulaga o Apia (Waterfront Project – Friendship Park).
Saunoa le Fa’auluuluga o lenei Atina’e tele, ia Fiona Sapatū, ua maitauina pea le fa’aleaga e nisi o fa’ailoilo aemaise molī o lo’o i luma ma tua o le Fale o le Malo.
Fa’ailoa e Fiona e fa’apea;
“I tua o le fale o le Malo FMFM II ma le Faletupe Tutotonu a Samoa (CBS) i le ‘Ele’ele Fou, o lo’o faia ai lea galuega tele, mo le fa’amatagofieina o le taulaga o Apia e ala i le faigapa’aga a le Malo Samoa ma le Malo Saina.”
“Sa pupuni ‘apa atoa tua o le Fale o le Malo ona o lo’o fa’agasolo galuega, peita’i na toe tatala se vaega lata i le taligalu ma le sami, ona o galuega a le Malosi’aga Tau Eletise (EPC) sa fia fa’atino, mo le ta’iina atu o uaea eletise auā molī e fa’amalamalama ai lea nofoaga.”
“Peita’i o le tatala ai o ‘apa, na sao mai ai totonu ma nisi o tagata ma fa’aleaga ai molī fou, o le fa’anoanoaga ona e le’o faia lenei atina’e mo na’o le Malo, ae o lo’o fa’aagaga mo tagata uma o Samoa, auā tafaoga ma maimoaga i afiafi, aemaise i turisi faimai i le atunuu.”
“O luma fo’i o le Fale o le Malo, i le atina’e tele sa fausia ma fa’atupeina e le Malo Niu Sila i le faigapa’aga ma Samoa, na maitauina ai fo’i le fa’aleaga e nisi o fa’ailoilo o lo’o tutū i lea vaega.”
Fa’ailoa e Fiona e ui e le’i maua se tasi na ia fa’atinoina lea faiga fa’alealofa, peita’i o lo’o mata’itu pea e le Ofisa e ala i le puipuiga malu a Leoleo, i latou nei, ma e tatau fo’i ona molia i le Tulafono, e tu’uitiitia ai le ola lē taupulea.
“Mo le leoleoina o lenei galuega tele, o lo’o feagai pea ma sikulati a le Konekarate mai Saina o lo’o latou fausia lea atina’e, ma o lo’o fa’aauau fo’i puipuiga masani a Malu o le Malo, auā le vaaia oi latou o lo’o faia ia uiga lē talafeagai.”
O le tu’ualalo a le Ofisa o le PUMA mo le atunuu atoa, tatou galulue fa’atasi, e tausi ma fa’atumau le matagofie ma le mamā o ā tatou atina’e fou ua mae’a fausia, e aofia ai lenei galuega tele.
“O le popolega, ina ne’i i ai nisi e aga’i atu ma se’i lā’au o lo’o totō i ia nofoaga aemaise o le fa’alapisi pe a ā’ai i nofoaga ua mae’a fausia e nofonofo ma fa’asavili ai.”
I le taimi nei, o lo’o galulue le EPC mo le vave fa’amae’aina o la latou galuega, ona toe pupuni ‘apa ai lea o lea nofoaga, se’ia mae’a, e puipuia mai ai i tagata feoa’i.
