“E LE’I TUPU FUA MEA FA’APENA,” PM TUILA’EPA
Tusia: Nanai Taofiga Laveitiga Tuiletufuga
O atugaluga a Vaega Faaupufai o le Tautua Samoa, Samoa National Development Party (SNDP faapea le Faatuatua i le Atua Samoa ua Tasi, (FAST) ua fesiligia ai le faamaoni ma le aoga o le Poloaiga mo Faalavelave Tutupu Faafuasei (SOE) mo le KOVITI19, e ono lepetia ai le soifua ma le saogalemu o le atunuu mai lenei faamai oti, e le’o la’aloa ai le silasila a le Palemia, le Kapeneta ma le Malo i nei taofi.
O le manatu autasi o nei faafaletui e pei ona lomia e le nusipepa o le Samoa Observer, o nisi o tuutuuga o le poloaiga e pei o faatasiga i nofoaga faitele (public gatherings) e le o toe manaomia aua o lea e le o i ai se tasi o le atunuu ua aafia ile KOVITI19.
Ma ua a’e ai ni taofi ma talitonuga o taitai o le Tautua Samoa, SNDP ma le FAST, e faapea o lenei faaiuga o le a atili ai ona pagatia le atunuu ma pisinisi.
O ni manatu ua toe momoli atu ai e le Taitai o le Malo, le Palemia, Tuilaepa Dr. Sailele Malielegaoi se faamanatu i Taitai o nei Vaega Faaupufai o lo’o agaia le Malo, i mafuaaga o lo o tumau ai pea ona saogalemu ma malupuipuia Samoa e pei o faamanuiaga e ala mai i le musumusuga a le Agaga Paia ma le Silisili Ese, ua ala ai ona faatino e le Malo le Poloaiga lea e o’o mai i le asō, o lo o malupuipuia ai Samoa mai lenei faamai oti o le KOVITI 19.
“E o’o mai i le taimi lenei, o lo’o olioli ma fa’afetai pea Samoa i le Atua ona o lo’o malu pea Samoa i ona a’ao alofa. E lē tupu fua mea fa’apena,” o le tali lea a le Palemia i le pepa o faamatalaga sa tu’uina atu i le nusipepa o le Samoa Observer.”
O le atoaga o le taofi o le Taitai o le Malo e aofia ai ma fautuaga i uo a le Malo o lo’o agaia galuega fai a le Malo, e puipuia ai le atunuu mai le Koviti, o lo’o lomia atu i lalo:
MAI LE PALEMIA, TUILA’EPA Dr. SA’ILELE MALIELEGAOI
O mafaufauga lelei uma mo le puipuia ma le togafitia o Samoa o lo’o fa’avae i le Atua, e auala mai foi i le musumusuga lilo.
E lua vaega tetele – o le soifua maloloina lelei o tagatanuu o se atunuu e ave i ai le fa’atāua, o le (1) Puipuiga (2) Togafitiga. Taugofie mamao le fa’atāua o le Puipuiga e taofia ai tagata mai le mama’i. Taugata tele le togafitiga e fa’atoa fai a’e ua mama’i tagata. O isi e tuai le togafitiga ae ua maliliu. Pe maliliu foi ona ua sese le togafitiga, ua muamua ave e fofo ae sa tatau ona ave muamua e fai tui puipui e pei ona tupu i le misela. E toe togafiti atu ua lē aogā.
O mea ia tatou te faia nei o lo’o faia foi e atunuu i fafo. O le eseesega, e toe fai atu le togafitiga ua tuai. E le’i tapena tagata e fa’atino gaoioiga ua avatu e le Malo e pei ona tupu i isi atunuu e pei o Amerika (USA) etc. Vaavaai i TV ona tou malamalama ai lea. O lea foi o lo’o omai pea va’a oloa ma tatou malaga fa’apitoa. E le’o faapea la o lo’o tapunia selau pasene a tatou boarders. O lo’o fai ma tatala mo malaga fa’apitoa. E ono sao mai ai lava se siama o lo’o moe. E i ai siama e momoe ma toe feala mai i taimi eseese ma ituaiga tau vevela eseese.
Tuilaepa Dr. Sailele Malielegaoi
PALEMIA O SAMOA
