FESOAOSANI FA’AAUAU A IAPANI MO AOGA I LE ATUNUU
Tusia: Yumi Epati Tala’ave
O le anavatau tulituliloa a le Malo ia manuia alo ma fanau lalovaoa a Samoa, o le maufa’aga lea o le fa’aleleia pea o falea’oga ma malae ta’alo i aoga uma a le Malo, Ekalesia fa’apea Aoga Tuma’oti.
O nei galuega tetele o lo’o fesoasoani mai ai le Malo o Iapani i le faigapa’aga ma le Malo Samoa e ala i le fa’atupeina o nisi o faleaoga ma male ta’alo i le atunuu.
Saunoa le Minisita o Aoga, Ta’aloga ma Aganu’u, Loau Solamalemalo Keneti Sio, o le naunauta’iga o le Malo, ia lelei ma mautu nofoaga e a’otauina ai alo ma fanau, auā o le lumana’i lea o Samoa mo a taeao.
“O le silasila a le Malo, a lelei faleaoga, lelei ona a’oa’oina alo ma fanau a le atunuu o le a si’itia maualuga fo’i le tulaga o le tomai ma le agava’a e maua e a tatou fanau, e atia’e ai Samoa ma lona tamaoaiga.”
Fa’ailoa e le Minisita, o fesoasoani a le Malo o Iapani e aga’i tonu lava i le fa’atupeina o nisi o atina’e tetele a le Malo aemaise o faleaoga, malae ta’alo, avanoa sikolasipi mo fanau aoga aemaise tagatanu’u Iapani e tu’uina mai e galulue fua i aoga i totonu o le atunuu.
Peita’i, o le fiafiaga i le Malo Samoa, ona ua i ai ma fesoasoani fa’aopopo e fa’atupeina e le Malo Iapani, sa le’i aofia i totonu o le maliega sa sainia e Malo e lua.
“O ia fesoasoani e aofia ai potu fa’aopoopo, o labs aemasie potu komepiuta fa’atasi ai ma potu tusi a’oga mo fanau.”
O le fa’aauau ai pea o lenei faigapa’aga, e mo le lumana’i manuia o alo ma fanau a Samoa aemaise le ola saogālemu ma le ola soifua maloloina i totonu o nofoaga o lo’o a’otau ai.
