SILIA I LE 80 SEILA SAMOA SA TALOSAGA MO GALUEGA FOU
Tusia: Tusiga Taofiga
E 60 Seila a Samoa, ua mautinoa le maua o avanoa faigaluega mai avanoa e 80 sa sa’ili, e ala i le talosaga mai a Kamupani va’a i atunuu i fafo.
Fa’ailoa e le Pule Sili o Auaunaga o Va’a i Samoa (SSS) ia Lautimuia Afoa Uelese Vaai, e ova atu ma le 80 fanau na talosaga i nei avanoa e 80, ae na’o le 60 i latou o lo’o fa’amalieina manaoga mo le malaga atu, e ala i le i ai o visa Amerika ma isi pepa malaga e mana’omia.
O lo’o fa’aauau pea fe’utana’iga a le Auaunaga o Va’a i Samoa, Matagaluega o le Va – i – fafo ma nei Kamupani Va’a, mo se tonu mautu aua nai fanau sa talosaga ae le’i fa’amalieina atoatoa manaoga mo pepa i femalaga’iga i va’alele.
O le agaga fa’afetai ma le fiafia, na fa’aleoina e nisi o fanau Seila Samoa, ua filifilia, mo nei galuega.
I le feiloa’iga a le Palemia, Tuila’epa Dr Sa’ilele Malielegaoi ma i latou nei, na o latou fa’afetaia ai le Malo tauala atu i le SSS mo le sa’ilia o avanoa faigaluega fou, auā le tausiga o aiga, nu’u ma ekalesia, ma le utiuti o le fa’asoa ona o a’afiaga o le tamaoaiga o le lalolagi mai le Koviti – 19.
Saunoa Falaniko Seleni Filipo, 34 tausaga o Manono, Si’usega ma Alamagoto, o se ali’i seila ua fa’amanuiaina i nei avanoa faigaluega, ua fiafia le loto ina ua maua nei avanoa faigaluega, auā ua utiuti fo’i le fa’asoa i le itu tau tupe, e tausi ai aiga, le to’alua ma le fanau, aemaise mea fai i ekalesia ma le nu’u.
“E ui o le a misia lo’u aiga, to’alua ma la’u fanau, peita’i e lē tuua le isi mea lelei, e fai ‘ai le isi mea lelei.”
“O le ‘ese’esega tele, talu ona ou lē toe faigaluega mo le tausaga atoa, ua lē lava ai le fa’asoa i le itu tau seleni, auā le tausiga o aiga, ona e le’o i ai se galuega, peita’i o le faitoto’a fou ua matala mai mo i matou le fanau, o se moemoe fou lea i o matou olaga, ma ua matou iloa ai, e le’o tu’ulafoaina matou e Ta’ita’i o le tatou Malo, mo le sa’ilia o nisi galuega fou, matou te faigaluega ai.”
I le talitonuga o lea ali’i i le tāua o le saunoaga fa’amalosiau a le Palemia, i ‘ai latou, e foia ai le fefe ma le popole vale, pe a mafaufau atu i le si’itia pea o le faitau aofa’i o e ua maliliu i isi atunuu o le lalolagi ona o le Koviti – 19.
“Ina ua valaau atu le Ofisa, sa tupu lava le fememea’i, pe a mafaufau i le pepesi o lea fa’ama’i oti, peita’i o upu tima’i a le Palemia, ua matou mautinoa ai, e le’o tu’umāmaina e le Faigāmalo o lo’o i ai nei, fe’utana’iga ma fa’atalanoaga ina ia malu puipuia i matou nei ua filifilia pe a malaga atu i atunuu o le a galulue ai.”
Na fa’amatala e Fa’agagalo Samuelu, 24 tausaga o Sa’anapu, le tāua o nei avanoa i ‘ai latou, auā ua tino mai galuega lelei i o latou aiga sa fa’atupeina i seleni na maua i a latou galuega i va’a nei, e aofia ai le fausia o fale mo mātua, ta’avale fou mo le aiga, a’o tupe lafo mai e fesoasoani ai i aiga, ekalesia a le nu’u i mea fai.
Na ia fa’ailoa fo’i, e le’i i ai se manatu, e toe vave maua ni avanoa fa’aauro ona o le fa’ama’i oti, a’o le fa’ailoga mātilatila lea, e iloa ai e le’o moemoenoa le Malo, i le sā’ili’ili pea o nisi avanoa faigaluega fou mo nai o tatou tagata.
A’o le manatu o Sione Salamo, 23 tausaga o Samauga, Savai’i, o se ali’i Seila ua filifilia fo’i, na ia fa’ailoa ai o nei galuega uma ua tino mai, o le ata vaaia lea o le alofa apelepele o le Atua ia Samoa, aemaise o le ta’ita’iga alofa a le Palemia ma le Kapeneta, lea o lo’o malu ai pea Samoa e ui i le tulaga fa’aletonu o galuega maua i le tele o atunuu o le lalolagi.
“E lagona lava le mafanafana o le loto ma le mafaufau, i upu tima’i a le Tamā o le Atunuu, o se moemoe ola, ua totō ifo i o matou loto, ina ia fa’aāoga ma le tatau nei avanoa ma ave’ese ai le mitavale ma le amio lē pulea, e tupu ai fa’afitauli ogaoga a’o feagai ai ma nei galuega i luga o va’a.”
O i latou nei e 80 ua filifilia, o le a malaga auaua’i, fuafua i malaga fa’apitoa a va’alele ua fa’atulagaina e afea Samoa i masina o lumana’i.
