FA’AMANUIA LE PALEMIA IA FIAME NAOMI MATAAFA
Tusia: Tusiga Taofiga
“Ou te momoli atu a’u fa’amanuiaga, fa’amanuia le Atua i le Afioga i le Sa’o Fa’apito ma i latou o le a latou galulue fa’atasi,” o le saunoaga lea a le Palemia, Tuila’epa Dr Sa’ilele Malielegaoi.
O le talia ai e le Palemia, o ia fo’i o le Ta’ita’i o le Vaega Fa’aupufai e Puipuia Aiā Tatau a Tagata (HRPP), o le fa’amavaega aloaia a le sa avea ma Sui Palemia a’o le Minisita fo’i o le Kapeneta ia Fiame Naomi Mataafa, na momoli ai ma lana fa’afetai fa’apitoa i le tautua a lenei tamāli’i i le Malo aemaise le Fa’afaletui.
“E telē fo’i le tautua sa feagai ma le Afioga i le Sa’o Fa’apito ia Fiame, a’o matou galulue fa’atasi i le Kapeneta auā le tautuaina o le tatou atunuu.”
“Ia fa’amanuia fo’i le Atua i ana taumafaiga uma, e le’o se mea leaga o se mea lelei, le galue mai fo’i o ia i se isi fo’i Vaega Fa’aupufai, o mea lava ia e masani ai matou o le aufai polokiki.”
O le fa’amavae ai o Fiame, na ia fa’ailoa ai i le Palemia, lona aga’i e avea ma Faipule Tuto’atasi, e tauave le tofi o lona Itumalo Fa’apalota o Lotofaga mo masina o totoe o lenei nofoa’iga.
Fa’ailoa e Fiame, ua afua ona fa’amavae, ona ua ia lē tausisia aiaiga a le fa’akapeneta, e ala i lona te’ena o Tulafono Tau Fa’aofi e tolu o fa’agasolo nei, mo le fa’atinoga o galuega a le Fa’amasinoga o Fanua ma Suafa.
E silia i le 30 tausaga, o avea le Afioga i le Sa’o Fa’apito ma Faipule o lona Itumalo, ae silia i le 20 tausaga o avea ma Minisita o le Kapeneta.
Saunoa Tuila’epa, o le filifilia ai o Fiame e avea ma Minisita o le Kapeneta i le tele o paea’iga ua mavae, o le pine fa’amau lea, o le fa’atuatuaina o lenei auauna e ta’ita’ia Samoa mo lona lumana’i manuia.
E ui i le fa’amavae fa’afuase’i ai o Fiame mai ona tofiga fa’alemālo peita’i na fa’ailoa e le Palemia, o le filifiliga a so’o se Sui Faipule e fa’atino i taimi uma, o lona lena sa’olotoga.
E le’i mautinoa i le taimi nei, po’o fea le Vaega Fa’aupufai o le a ulufale ai Fiame e tausinio ai i le Palota Tele a le atunuu i le tausaga fou, ma e le’i fa’ailoa mai fo’i i le taimi nei, se tasi o le a avea ma Sui Palemia, ma se isi o le Fa’afaletui a le HRPP o le a avea ma Minisita fou a le Kapeneta e sui tulaga i le Sa’o Fa’apito.
