FAAMAMA AVEGA MO AIGA LIMA VAIVAI MA LE LĒ TAGOLIMA
$1 miliona tala le fesoasoani a le Malo mo aiga lima vaivai ma le lē tagolima.
O lea la fesoasoani e $1 milliona a le Malo ua faaui atu i le Faalapotopotoga o le ADRA Samoa latou te faasoasoaina mo le fausia o fale o aiga e lima vaivai.
Na saunoa le faauluuluga o le ADRA Samoa, Su’a Julia Wallwork, o lenei seleni ua fesoasoani ai le Malo, e mafai ona fausia ai fale e 170. E 120 fale fou, ae 50 fale toe faafou pe faaleleia foi.
“O lea poloketi e aoga e siitia ai tapulaa o aiga taitasi ina ia mafai ona soifua lelei ma lelei fale e nonofo ai. E le gata o le tali atu i taimi o faalavelave faanatura ina ia mausali ma lelei, ae ia mafai foi ona faaleleia atili ai tulaga o aiga ma le siosiomaga aua le soifua maloloina o le aiga.”
Na faafetaia e Su’a le Malo mo le faasoa atu, faapea le galulue faatasi ma le ADRA, ma faailoa ai foi tulaga e agavaa ai se aiga mo lenei fesoasoani taua.
“O le agavaa o le aiga mo lenei fesoasoani, e faalagolago muamua ia faaletonu le fale, ae toafia foi e nonofo ai. Pe i ai foi se alagatupe e ola ai le aiga, ae pe i ai foi se isi e faigaluega.
“E fesiligia foi pe i ai se vai ae pe i ai foi se eletise ua oo atu i nei aiga.”
O vaega ia e silasila i ai le ADRA ona filifili ai lea o aiga e tatau ona ave i ai le fesoasoani, e pei ona saunoa Su’a.
O lenei seleni e $1 miliona ua faamatu’u atu e le Malo e auala atu i le Faamama Avega lona lua (Stimulus Package 2) o le faama’i o le KOVITI 19 e fausia ai ma faalelei nisi o fale o aiga lima vaivai.
Mo le silafia e silia ile $160 miliona tala le tuufaatasiga o le fesoasoani tupe a le Malo e auala atu i Tala o le Tupe faapitoa (Stimulus Package) i le atunuu lautele ona ole KOVITI 19.
E lima aiga ua faagasolo galuega io latou fale na asia e le Savali i le Aso Tofi ua mavae.
O le aiga o Salevi Vili o Moataa uta na sosoo le pito i tua o lona fale.
O le aiga o le tina ia Telesia Seumanutafa o Palisi ma le aiga o Itele Osa o Palisi na sosoo ai vaega o o latou fale.
O aiga e lua i Aele, o Tuimala Elisara ma Sani Toilolo o lo o faagasolo foi galuega o latou fale fou.
Na faaalia le agaga faafetai o nei aiga i le Malo mo lenei fesoasoani tele aemaise le ADRA Samoa mo le faatinoina o galuega.
