FA’ASILASILAGA MAI LE PALEMIA
Tusia: Tusiga Taofiga
Ua fa’ata’oto le lu’i a le Palemia mo so’o se isi aemaise so’o se Loia na te silafia se upu oi totonu o Tulafono Tau Fa’aofi o soālaupule nei, e a’afia ai Fanua Fa’aleaganu’u, ina ia fa’ailoa ane i le Komiti, mo le soloia ‘esea.
Fa’ailoa e le Palemia, e leai, leai, se a’afiaga o le Vaega 102 o le Fa’avae, o lo’o aiaia ai le malu puipuia o Fanua Fa’aleaganu’u mai le ono fa’atau motu ‘ese atu e se tasi.
Saunoa le Ta’ita’i o le Malo, Tuila’epa Dr Sa’ilele Malielegaoi e fa’apea;
“E i ai le taofi e fa’apea, o le tete’e a nisi o le atunuu, ona o lea e a’afia ai Fanua Fa’aleaganu’u.”
“O la’u lu’i la, so’o se se isi, so’o se loia, o ona silafia se fa’aupuga i totonu o le Tulafono e a’afia ai Fanua Fa’aleaganu’u, avane i le Komiti, ma aumai ai e soloia, ave’ese ma o le fa’atonuga fo’i lena lea ua ou avatu i le Loia Sili, ave’ese, soli pala, soli pala ma ave ‘ese.”
“Aisea? E le’o i ai se tulaga fa’apena i totonu o le Tulafono, a’o le mea lea ua tupu, ua tele naunau latou e taufa’asesē.”
“O la’u lu’i lena i so’o se Loia o lo’o i ai, afai o silasila o a’afia Fanua Fa’aleaganu’u, logo le Komiti, ae soloia ‘ese, titina ‘ese, tafi ‘ese ma soli pala, ina ia taunu’u ai upu o lo’o avatu e le tatou Malo.”
“Ma o le e tete’e i le Tulafono lenei, e le’o ia o se Samoa.”
Na ia fa’amalamalama fo’i, o nei Tulafono Tau Fa’aofi o lo’o fa’agasolo soālaupulega, o le fofō lea, i le tele o mataupu o lo’o mo’omia ai e le atunuu se fesoasoani, e ala i le fa’atinoga o galuega a le Fa’amasinoga o Fanua o Suafa, ma le amanaiaina o Pulega to’atele, aofia ai ma le Pulega Mamalu a Ali’i ma Faipule o Nu’u ta’itasi.
