FAUSIA FALE E 170 MO AIGA LIMA VAIVAI
Tusia: Asenati Taugasolo Semu
E 170 aiga lima vaivai ua fausia pe faafou foi o latou fale e le faalapotopotoga o le ADRA Samoa.
O lea fesoasoani o se vaega o le Faamama Avega lona lua (Stimulus Package II) mo le KOVITI 19 a le Malo e $1miliona, lea e galulue faatasi ai ma le ADRA Samoa mo le faagaioiina.
E silia i le $160 miliona le tuufaatasiga o le fesoasoani tupe a le Malo e auala atu i Tala o le Tupe faapitoa (Stimulus Package) i le atunuu lautele ona o le faama’i.
Ua faafetaia ai e nisi o aiga le Malo ona ua mafai ona fausia ma faafou o latou fale.
Na saunoa le faauluuluga o le ADRA Samoa, Su’a Julia Wallwork, o lenei seleni ua fesoasoani ai le Malo, e mafai ona fausia ai fale e 170. E 120 fale fou, ae 50 fale toe faafou pe faaleleia foi.
“O lea poloketi e aoga e siitia ai tapulaa o aiga taitasi ina ia mafai ona soifua lelei ma lelei fale e nonofo ai,” na saunoa ai Sua.
“E le gata o le tali atu i taimi o faalavelave faanatura ina ia mausali ma lelei, ae ia mafai foi ona faaleleia atili ai tulaga o aiga ma le siosiomaga aua le soifua maloloina o le aiga.”
Na faafetaia e Su’a le Malo mo le faasoa atu, faapea le galulue faatasi ma le ADRA, ma faailoa ai foi tulaga e agavaa ai se aiga mo lenei fesoasoani taua.
“O le agavaa o le aiga mo lenei fesoasoani, e faalagolago muamua i le tulaga lea ina ia mautinoa e faaletonu le fale o nonofo ai, ae toafia foi e nonofo ai. Pe i ai foi se alagatupe e ola ai le aiga, ae pe i ai foi se isi e faigaluega.
“E fesiligia foi pe i ai se vai ae pe i ai foi se eletise ua oo atu i nei aiga.”
Na faailo ai foi e Sua le fesoasoania a le Faalapotopotoga o le Malosiaga Faaeletise (EPC) mo nei aiga uma.
“O le mea matagofie, o lea ua ofo mai le EPC mo aiga ia e leai se eletise, mo le installation (toso atu o laina eletise), ona totogi a laia e le aiga le latou cashpower.
“Aua silafia foi , o le ta’i atu o le pou e toeitiiti a $2,000, e taugata, a o lea ua ofo mai le EPC e fai fua mo aiga lima vaivai.”
E tele isi fesoasoani ua mae’a faagasolo e le ADRA i latou faigapaaga ma Malo i fafo e pei o Niu Sila, Ausetalia, Europa, Kanata faapea nisi o faalapotopotoga mai fafo.
“Na amata i le mae’a o le afa o Eveni ona aapa atu le ADRA ma fausia fale ua faatama’ia i le taimi o tafega, lologa ma matagi malolosi.
“Na fausia ai fale e 265 i le fesoasoani mai a Malo o le Iuni a Europa (EU). Ona tuu mai ai lea o le tauau o Ausetalia ma Niu Sila, na mafai ai ona faaopoopo fesoasoani mo ia fale na matou fausia
“Sa amata ai foi ona matou faipaaga ma le faalapotopotoga o le Habitat for Humanity po o apitaga mo tagata lautele in NZ. Ma o iina na amata ai le matou faigapaaga ina ua uma atu le afa o Eveni, ona toe maua ai foi lea o le isi vaegatupe mai le Malo o Niu Sila e faaui mai i le vaega lea o le Habitat. E mafai ai ona fesoasoani atu i aiga e le o lava le tamaoaiga e auala lea i se tuufaatasiga ma le Samoa Housing Corporation (Faalapotopotoga o Fale a Samoa) ina ia mafai ai ona agavaa mo se nonogatupe, a o le ADRA e mafai ona fausia fua le fale e mafai ua maua mai le vaega tupe mai le SHC ona mafai ai lea ona matou fesoasoani atu i aiga e ova atu i le 200.
“Ona oo mai lea i le afa o Gita, e ui e le i aafia tele Samoa, ae na i ai lava aiga sa faaletonu fale. Sa toe aapa atu ADRA fesoasoani mo ia aiga e 75 ma faaleleia o latou fale.
“Ina ua uma atu ia afa ma matagi ae maua loa le fesoasoain mai le malo Niu Sila mo le fa tausaga e galulue faatasi ai le ADRA, tuufaatasi ma le Habitat e fai aoga mo le fausia ia saogalemu ma tumau fale i afioaga taitasi. A maea loa, ona agavaa lea o le afioaga i se vaegatupe e toe fausia ai se fale fou po o le faaleleia o nisi maota o le afioaga ina ia avea ma apitaga poo sulufaiga i taimi o faalavelave e aafia ai Samoa.”
E tele afioaga ua maea fale apitaga e pei ona saunoa Sua, e i ai Poutasi, Lotofga Safata, Eva, Moataa, Lepa, Siufaga Savaii, Puapua ma Lotofaga Aleipata. O lo o faatalia galuega mo fale o Patamea, Fatuvalu ma Avao.
“Lea foi ua aumai le poloketi a le Malo, ma ua talafeagai tonu ma manaoga lea e i ai mo le faaleleia atili o fale o aiga.
E lima aiga ua faagasolo galuega io latou fale na asia e le Savali i le vaiaso ua mavae.
O le aiga o Salevi Vili o Moataa uta na sosoo le pito i tua o lona fale.
O le aiga o le tina ia Telesia Seumanutafa o Palisi ma le aiga o Itele Osa o Palisi na sosoo o latou fale.
O aiga e lua i Aele, o Tuimala Elisara ma Sani Toilolo o lo o faagasolo foi galuega o latou fale fou.
Na faaalia le agaga faafetai o nei aiga i le Malo mo lenei fesoasoani tele aemaise le ADRA Samoa mo le faatinoina o galuega.
“E momoli atu a le fa’afetai tele i le Matagaluega ma le Susuga i le Palemia mo le fesoasoani ua matou mauaina,” saunoa ai Itele Osa.
“Ua manaia foi lea ua iai se vaega e nonofo ai le isi vaega o le fanau. Na o le tina o le aiga o lo o faigaluega i le taimi nei, ma o le tupe maua a le tina i le vaiaso ua na o se $30.00 leaga o lo o totogi ana loans (nonogatupe).”
Na saunoa foi le tina ia Tuimala, “E momoli le faafetai i le Malo ma le ta’ita’i o le atunuu ma le faigamalo, faapena foi i le ADRA mo lenei meaalofa sili ma le taua i totonu o lenei aiga. Ua faateia foi i lenei meaalofa ua foaina mai, ma ua lagona ai le fiafia ae faasilisili ai a le faafetai tele lava i le agalelei foi ma lenei faamama avega.”
