“E LĒ FA’AMALOSIA FAIAOGA LITAEA,” LOAU
Tusia: Tusiga Taofiga
O faiaoga ua litaea malolo ina ua atoa le 55 tausaga, e tatau ona toe talosaga i le Matagaluega o Aoga, pe afai o lo’o fia galue pea auā le a’oa’oina o fanau a le atunuu.
O lona uiga e lē fa’amalosia e le Malo, le toe fa’afaigaluega oi latou nei, e pei ona lomia i le Samoa Observer, Aso To’ona’i – 19 Setema 2020 (Retirees teaching for passion, cover shortage).
E le’o talosaga uma e talia, e fua i le fa’ai’uga o le iloiloga a le Matagaluega o Aoga ma le Komisi o Galuega a le Malo (PSC), e aofia ai ma le lipoti a le Soifua Maloloina e fa’amautu atili ai, pe toe fa’aauau lana tautua fa’afaiaoga.
Fa’ailoa e le Minisita o Aoga, Loau Solamalemalo Keneti Sio, lona fa’anoanoa tele, i le lipoti ua tusia e Adel Fruean i le Observer ma fa’ailoa ai, e le’o silafia e le Minisita, le mataupu i le toe fa’afaigaluegaina o Faiaoga Litaea.
Mo le silafia, o le toe faigaluega o faiaoga ua litaea mai lenei galuega, o le polokalame ua leva a le Malo, ua silia i le 10 tausaga o fa’atinoina pea.
“O le Aso Faraile ua mavae, ua ou te’i o la ou te alu i la’u ta’avale, ae tatagi la’u telefoni, e na’o na tali atu lava o la’u telefoni, Talofa Loau, o le Samoa Observer lenei, o le a sau fuafuaga i ai i faiaoga litaea ia ua toe fa’afaigaluega?
Ona ou tali lea i ai, e susū mai i lo’u Ofisa ma te talanoa ai i le matupu lea, ona o lo’o ‘ave la’u ta’avale.
“Ae ua ou te’i i le vaai atu i Observer i le Aso To’ona’i, oi sole, o le matuā valavala a i Sasa’e ma Sisifo la’u tala na fai i le tusitala lea na valaau atu, ma le tala lea ua tusia, ma o ituaiga uiga fa’apea, e lagona ai lava lo’u fa’anoanoa tele.
Fa’ailoa e Loau, o le utiuti o faiaoga e fa’atinoina lenei tautua, o se lu’itau o lo’o feagai pea ma le Matagaluega o Aoga, auā o lo’o fa’aauau pea ona malaga nisi e nofomau i atunuu i fafo, fa’atasi ai ma nisi ua toe galulue i isi galuega e ‘ese mai le tautua fa’afaiaoga.
Ma o le mafua’aga lena, o lo’o tumau ai pea le fa’amuamua a le Malo, e una’i mataupu tau faiaoga o lo’o a’oa’oina i le Iunivesite Aoao o Samoa, ma fa’aosofia ai manatu o fanau lalovaoa a le atunuu, ina ia tauave lea mataupu e avea o se galuega tumau i le lumana’i.
