MAUSALĪ TAPENAGA A SAMOA MO LE KOVITI – 19
Tusia: Taunuuga Toatasi
O lo’o tapena fa’afafine to’aga pea e le Malo Samoa, ana tapenaga ma sauniuniga e tali atu ai i taimi e a’afia ai Samoa i le Koviti – 19.
O le tasi o lea tapenaga, le fa’atauina o masini fa’amamā tāgāmea, masini fa’amamāgo tagāmea ma le masini e auli ai ie o lo’o fa’aāogaina i le Maota Gasegase i Moto’otua.
O le tau atoa o ia masini e $577,786.99 tala Samoa, ma na fa’atauina mai i le Kamupani o le Arco Chemical.
O masini fa’amamā tāgāmea e mafai ona fa’amamāina le mamafa e tusa ma le 540 kilo i le aso, e tusa lea ma le 534 kilo i le 10 itula i le aso.
O le masini fa’apitoa e auli ai ai ie o le falema’i (tulou) ua fausia fa’apitoa ina ia fa’afaigofie ona fa’aāogaina ma saogalemu mo i latou e fa’aāogaina.
I le saunoaga a le Minisita o le Matagaluega o le Soifua Maloloina, Faimalotoa Kika Stowers – Ah Kau, sa ia tā’ua ai e fa’apea, o le soifua maloloina, o le tatou matafaioi, e taulamua tatou mo le puipuiga ma le saogālemu o le soifua maloloina o o tatou tagata ma le atunu’u atoa.
O se tasi lenei o matāti’a ua mafai ona ausia e le Matagaluega e pei ona saunoa le Minisita, ona o fa’afitauli ma lu’itau i le fa’atinoga o lea auaunaga i totonu o le maota gasegase i Moto’otua.
“O taumafaiga ina ia ausia tulaga o alāfua fa’ata’atitia a Ausetalia ma Niu Sila i tulaga tau le malosi fa’atulagaina o le vevela o le ‘ea ma vailaau fa’aaogaina mo le fa’atamaia o siama i totonu o le falema’i, o le mafua’aga lea ua tele ai le ‘ese’esega o nei masini ma masini na fa’aaogaina muamua.”
O nei masini e maualuga ma maoa’e foi le tulaga lelei ua iai mo le fa’atinoga o galuega ma ua ma’ea fa’apolokalameina ina ia mafai ona fa’aaogaina i le vaivela e tusa lona fua vevela ma le 60 i le 70 tikeri fareni, ina ia ausia alafua mo puipuiga o siama ma le soifua maloloina, o le fa’aopoopo lea a le Minisita.
“O se tausaga ‘ese lenei tausaga i le tele o le lē mautonu ua iai le lalolagi, ona o a’afiaga o le Koviti 19, ae mo Samoa, o se vaitaimi taua e tapena fa’afafine toaga ai lo tatou atunu’u, ina ia lava saunia i tatou i puipuiga e tali atu ai i le fa’ama’i.”
Na toe fa’aopoopo le Minisita e fa’apea, e taua tele le usitaia o alafua ma fua fa’atatau tau le puipuiga mai siama pipisi, e lima ta’ita’iina ai tatou galuega fa’atino, aemaise lava i lenei vaitaimi i le tele o fa’ama’i pipisi e pei o le koviti 19.
“E tele lava ina tatou fa’atuatuanai le taua o galuega fa’atino o lo o fa’atinoina mo le fa’amamaina o mea o lo o fa’aaogaina mo le tausia o gasegase.
“O le amataga fou lea o le fa’amautinoaina o suiga ua tatau ona tatou faia, aua le tausia lelei o le soifua maloloina o gasegase.”
Na momoli ai foi le fa’afetai i le Kamupani a le Arco Chemical fa’apea lana pa’aga o le Girbau Industrial mo le fa’ataunu’uina o se tasi o manaoga o le Matagaluega.
I le fa’aaogaina ai o ia masini sa fautuaina ai e le Minisita le aufaigaluega ina ia fa’aāoga ma le fa’aeteete nei masini ina ia umi se aogā.
“Mo le aufaigaluega o le a fa’aāogaina nei masini taugatā, ia tautuana, ia fa’aaoga ma le fa’aeteete ma le fa’apelepele ina ia tele ni tausaga e aoga ai nei masini mo le soifua maloloina o si o tatou atunu’u.
