SAUTIA VAVAE LE ANAVATAU A LE TAUTUA SAMOA
Tusia: Tusiga Taofiga
Ua fa’atusaina e le Ta’ita’i o le Vaega Fa’aupufai e Puipuia Aiā a Tagata (HRPP) le anavatau (manifesto) a le Fa’afaletui a le Tautua Samoa ua fa’alauiloa mo le Palota Tele 2021, o se pomu tele ua sautia ona vavae.
Ua afua le saunoaga a le Palemia, Tuila’epa Dr Sa’ilele Malielegaoi, auā so’o se Malo lava, e sa’ili tupe mo se seleni maua e fa’atupeina ai atina’e mo le manuia o Samoa ma ona tagata.
Ae na manino i le anavatau a le Tautua Samoa, le soloia o le Tulafono mo Lafoga a Faifeau pe a tula’i mai e ta’ita’ia le Faigamalo.
Ae ao’oga fua fanau aoga, fa’atuina o se Iunivesite e fa’aigoa i le Tolotolo o Tamauli Campus i Salelologa, si’itia i le ta’i $300 i le masina mo tagata mātutua (penisione), fa’amanuiaga ta’i $100 mo i latou e i ai a’afiaga tumau o le Soifua ma le fa’atuina o se Komisi Su’esu’e mo le Misela.
Saunoa le Palemia o le Ta’ita’i fo’i o le Fa’afaletui a le HRPP i le Polokalame ma le TV 1 e fa’apea;
“A tilotilo i ai i pomu nei ua fa’ailoa mai, e sautia uma lava vavae, e te iloa le mea e ala ai ona sautia, i le folasaga atoa o le anavatau lenei, tasi a le mea e mafai ai ona fai mea ia o tupe.
“Leai ma se upu e aga’i i tupe e fa’atino ai, tusa la pei o se mea ula e na’o na ta’u mai, ae le ta’u maia se auala e aumai ai ni tupe e fa’atino ai nei manaoga.
“A’o lea ua faimai e omai loa taofi isi auaunaga ia e maua mai ai seleni e ola ai le Malo, o fea se Malo e fia omai e ta’ita’i le Atunuu, ae faimai e omai loa talepe tulafono e maua ai tupe.
“O lona uiga o tupe e fa’atino ai mana’oga nei, o tupe o vae, e lē mafai ona e faia se mea e aunoa ma se seleni, ae amata lava i le talepe o mea e maua mai ai seleni.
“O le mea lena lea ou te faiatu ai, o mea ua sautia mea ia e omai ma latou, ae ou te faiatu o le tetelē o tagata, ou te vaai atu i tagata o Polōfesa mea, ae feoa’i ma nei mea sautia fa’apea.”
