LEAI SE POPOLE I TULAGA O LE TAMAOAIGA
Tusia: Asenati Taugasolo Semu
E le o i ai se tulaga e faapopoleina ai le Malo i le tulaga o le tamaoaiga o le atunuu i le taimi nei.
O lea tulaga na saunoa ai le Ofisa Sili o Pulega o le Matagaluega o Tupe, Leasiosiofaasisina Oscar Malielegaoi i se faatalanoaga ma le Savali i le vaiaso ua mavae.
Na saunoa ai Leasiosiofaasisina e leai se tulaga faapopoleina pe faateia ai le Malo i le tuufaatasiga o le tausaga faaletupe o le 12 masina mai ia Iulai 1 2019 i le faaiuga o Iuni 2020.
“I le taimi nei, lea foi ua uma ona tuufaatasia a tatou faamaumauga, lea la ua maua le tulaga na i ai le faatinoga o galuega a le tatou Malo,” saunoa ai le Ofisa Sili.
“O le taimi nei, masalo e le o i ai se tulaga faateia na i ai ina ua tuufaatasia le tatou lipoti. O mea lava ia o lo o tutupu i le taimi nei, o mea tonu lava ia sa i ai le matou vaavaaiga mamao, e ono tulai mai.
“E le o i ai se faapopolega ma e le o faateia foi le tatou Malo aemaise le Matagaluega o Tupe i le tulaga lea ua i ai le taunuuga o le tausaga faaletupe lea ua te’a atu nei.”
Ae na saunoa Leasioasiofaasisina, masalo o se tausaga faaletupe lea ua sili ona pagatia ai le atunuu ma le lalolagi atoa.
“Aua o le tausaga lea, e amata mai ia Ianuari, lea na amata i totonu o le tausaga faaletupe lea, lea sa amata aafia ai loa Saina i le faama’i o le corona virus po o le koviti 19, lea la e oo mai i le taimi nei o lo o saili fofo pea le lalolagi po o lea se tulaga e mafai ona fofo ai lenei faamai.”
Ae mo Samoa lava ia, e lua aafiaga tuga sa aafia ai le tatou atunuu e pei ona saunoa Leasiasiofaasisina.
“O le vaega muamua o le misela lea na aafia ai Samoa i le faaiuga o le tausaga ua te’a nei, sosoo mai lea ma le koviti 19, ma e le o malolo a la le tatou atunuu.”
Na saunoa ai foi le Ofisa Sili o Pulega i se suesuega/sailiiliga sa faia a le Faalapotopotoga o Faaputugatupe Faavaomalo a le lalolagi (IMF).
“O le International Monitory Fund (IMF) lea e fai tatou faigapaaga, sa faatino le latou sailiiliga, sa i ai foi le latou team (vaega) sa oo ma i Samoa e faatino le latou sailiiliga i le amataga o le tausaga nei, mai ia Ianuari ia Mati, sa faatino ai lea sailiiliga ma sa taunuu ai i se fuainumera e tatau ona tupu le tatou tamaoaiga i le 3.3 pasene.”
O fuafuaga ia e pei ona saunoa Leasiosiofaasisina ae na oo mai ia Aperila ua faatetele le faama’i, lea na amata ai le vaai mamao a Samoa ma le lalolagi ma tapunia ai femalagaiga ma atunuu i fafo.
“Amata mai foi ia Aperila e oo mai le taimi nei ua le toe i ai se turisi. Ua matua tapunia atoa maketi. Tele la le aafiaga i le tulaga lea. Lea ua aafia ai le tatou atinae o turisi. Aafia ai foi galuega a le toatele, ia ma o le vaaiga lea o lo o i ai i le lalolagi atoa, e le na o Samoa.”
O le tele o atunuu ua tele pasene ua faamauina le pa’u ai o le tulaga o le tamaoaiga ona o le faama’i, ae mo Samoa, na saunoa Leasiosiofaasisina, na o le 3.5 pasene ua faamauina.
“Lea e pei ona tou faafofoga atu i le TV ma tala fou mai fafo, amuia tatou, a tele le pa’u o le tamaoaiga, e oo mai i le taimi nei, e 3.5pasene, a o le tele o atunuu o le lalolagi, ua oo atu i le 7 pasene, a o nisi ua oo atu i le 10 pasene ua pa’u ai o latou tamaoaiga.
“O nisi atunuu o le Pasefika, lea ua fuafuaina e tatau ona oo atu i le faaiuga o le tausaga lenei ua faagasolo, e 21.7 pasene le maualalo o le a pa’u ai le tamaoaiga.
“A fua mai la i faamaumauga ia, e le o tele se aafiaga o Samoa ina ua mae’a tuufaatasia le tausaga faaletupe lea na te’a atu nei, e 3.5 pasene lea ua faaitiitia ai le tatou tamaoaiga.
“Ae o le fuafuaga sa i ai e pei ona faailoa atu e le Mataglauega o Tupe i se vaitau o Me ia Iuni o le tausaga nei, e tatau ona pa’u i le 3.3 pasene.
“A silasila i ai, e 3.3 pasene a o lea ua taunuu i le 3.5 pasene, lea toeitiiti lava maua le fuainumera sa tuuina mai.
“Tai pei la o le auga lena o se faamatalaga, e le o faateia matou i le lipoti lea sa sau i le vaiaso na tea nei mai le tatou Bureau of Statistics po o le tatou Ofisa o Numera Faamaumauina. O lea o lo o sosolo lava i luga o tatou fuafuaga sa i ai.”
Na faailoa foi e Leasiosiofaasisina mafuaaga ua sologa lelei ai fuafuaga a Samoa mo lona tamaoaiga.
“O le tulaga lava ia mo Samoa e ao ona silafia, ua mafua ona ausia lea fuainumera na o le 3.5 pasene lea ua pa’u ai le tamaoaiga, silafia foi, lea na amata ia Aperila o le tausaga nei o faasalalau le vaega muamua o le tatou faamama avega po o le tatou stimulus package phase one, lea la e tele lava tatou galuega na amata faatino ai loa. O galuega la ia, lea na amata toe faasafua atu ai seleni i e o lo o aafia ma toe faataamilo ai le tatou tamaoaiga.
“Aua na pau lava lea o le auala e mafai ona toe faaleleia ai le tamaoaiga, o le tele o le tupe e toe faaalu i totonu o le tatou tamaoaiga. Lea la pei ona silafia, i le tatou faamama avega muamua, sa faasalalauina ia Aperila, e $66 miliona se vaega tupe sa fuafua e tatau ona faaaluina ai, lea sa i ai tatou polokalame, ma eseese vaega sa faasafua i ai lea faamanuiaga.
“O le vaega muamua, o le vaegatupe $20.2 miliona mo le Soifua Maloloina, lea e aofia ai ma le vaegatupe mo e o le a nofoesea. E aofia foi i lalo o le phase one, le tupe e fesoasoani ai mo le mamalu o le atunuu, lea e taua o le household assistant, lea sa faamaualalo ai le tau o le eletise, faamaulalo le tau o le suavai, e maua ai faamama avega mo loans (nonogatupe) i commercial banks (faletupe). E oo foi i le tatou private sector (vaega tuma’oti), sa maua foi faamama avega tauala atu i lea fesoasoani.”
O le tulaga lea ua faaitiitia ai le pa’u o le tatou tamaoaiga i le 3.5 pasene e pei ona faamatala e Leasiosiofaasisina.
“O le toatele o atunuu o le lalolagi, ua maualuga le pa’u o le tamaoaiga. O nisi ua 5 psene, o nisi ua fitu pe 10 pasene i isi atunuu tetele.
“A o tatou, na o le 3.5 pasene lea sa pa’u ai le tatou tamaoaiga mo le tausaga faaletupe i totonu o le 12 masina ua te’a atu nei.”
O le isi tulaga na saunoa ai le Ofisa Sili, o le tele o le sao o a tatou galuega ma atinae o lo o faatino i le taimi nei mo le tatou tamaoaiga.
“E le toe po malāē, ina ua aafia le lalolagi, sa faaauau lava le tatou galuega lea o le fausia o le auala agai i le itu i sisifo, west coast road, e le i taofia lena galuega.
“O lo o faaauau foi le tatou atinae e pei o le Apia Waterfront, o le tatou museum (falemataaga) i Motootua faapea ma le tatou galuega lea i Vaisigano (auala sima) lea ua tatalaina nei.
“Sa faasolo lava a tatou galuega. A o le aoga o nei galuega, e le gata ina maua ai galuega e faafaigaluega ai tagata o le atunuu, a ia taamilo ai pea le seleni i totonu o le tatou tamaoaiga.
“Ae le gata i lea, lea foi ua faailoa ia tatou paaga, o tatou o se atunuu e le gata ina i ai tatou fuafuaga, ae o lo o mafai foi ona faatino.
“Pei la o le matūpalapala lea ua to mai e tatou paaga, e ave lava le fesoasoani ie e moomia ma faatino.
“Aua e i ai le tagata foi lele e talosaga e aumai le fesoasoani, ae aumai le fesoasoani e le faatinoa, ma e leai la se agaga fia fesoasoani mai a se paaga pe a tulai mai se tulaga faapena.
“Ae mo Samoa lava ia e leai se tulaga faaletonu o a tatou galuega ma lo tatou tamaoaiga.”
“Lea sa faatino atinae nei ina ia faaauau pea galuega tetele nei a le tatou Malo e tusa o aiaiga o maliega sa sainia i le va o le tatou Malo ma paaga. Ma o le fesoasoani foi lea na faataamilo ai le tatou tamaoaiga.”
