FUAFUA MALAGA A VAALELE I LE VA O SAVAII MA AMERIKA SAMOA
Tusia: Asenati Taugasolo Semu
O le toe amata o faigamalaga a vaalele tu’usa’o mai Savaii mo Amerika Samoa, o se fuafuaga mamao lea a le Malo o lo o faataoto nei.
O lea tulaga na saunoa ai le Afioga i le Sui Palemia, Tuitama Dr Leao Tuitama i le asiasiga a le Komiti o Atinae a le Kapeneta (CDC) lea na faagasolo i le vaiaso talu ai i Savaii.
O le taeao o le Aso Tofi talu ai, lea na tulaueeleele ai le vaalele a le Samoa Airways i le malae vaalele i Maota, ma na molimauina ai le lelei o lea malae vaalele.
“E pei ona molimauina i le asō le tulaueeleele mai o le faigamalaga mai Upolu, ia e leai se mea o faaletonu,” na saunoa ai Tuitama.
“O lea ua toe tulaueeleele mai le Samoa Airways i Maota nei e toe faaauau ai le tautua mo femalagaiga i le va o le vaalele i Savaii ma Upolu.
“Ua talafeagai tonu ma lenei vaitau i le feagai ai o le lalolagi ma le taufofoina o aafiaga o le koviti. O le fuafuaga, ina ia maua ai pea e le atunuu avanoa e malaga faavavevave mai ai i Savaii mo o latou tuatuagia pe asiasi mai foi i aiga ma toe vave foi atu i Upolu.”
O le 1994 na fausia ai le malae vaalele i Maota, ae o le 1997 na faia ai malaga tuusa’o a vaalele mai Maota mo Amerika Samoa.
Na saunoa le Ofisa Sili o Pulega o Malae Vaalele, Silimanai Ueta Banse Jr. Solomona, o le vaaiga mamao a le pulega o malae vaalele i le faaauauina o femalagaiga i Maota, o le toe faateleina lea nofoaga.
Na saunoa Silimanai, o le faamoemoe ina ia mafai ona malaga ai vaalele a le Talofa Airways ma ia leai se pa puipui o le mamafa o vaalele.
“O le talosaga foi lea e taatia i le taimi lenei a le Talofa Airways, e fia operate sa’o atu iinei agai i Pago. E manaomia le toe extend laitiiti lava o le malae vaalele.
“Pe 200 mita le extension. E manaomia le faaopoopo o le 200 mita, ina ia mafai ai ona fealuai se vaalele e leai se restriction.”
Na saunoa foi Silimanai i le tulaga ua i ai le malae vaalele i Asau.
“O le tulaga i Asau e le o toe faaaogaina i le taimi lenei, ona e i ai nai galuega fia faaleleia e tatau ona faia. Ae o le taimi lenei o lo o maintain (tausia ma vaaia lelei) lava Asau, ma o lo o i ai le faamoemoe e toe faaleleia.”
