FALEAOGA FOU MO LE AOGA TULAGALUA A FAGALI’I
Tusia: Taunuuga Toatasi
E $527,121 le tau atoa o le galuega o le faleaoga fou a le Aoga Tulagalua i Fagali’i.
E $271,358 le sao o le Afio’aga o Fagali’i ma le $255,763 le tupe mai le Malo o Iapani sa fa’atupe atoa ai lenei galuega tele.
O le fausia ai o lenei faleaoga fou, o se tasi lea o naunauta’iga a le Malo i le faigapa’aga ma Malo mai fafo, e i ai Iapani mo le fesoasoani mai i le fa’atupeina o faleaoga mo a’oa’oga auā le manuia o fanau mo a taeao.
O lenei galuega e aofia ai potu aoga e valu, o le potu tusi ma le potu mo faiaoga, ma e silia ma le 100 le aofa’i o fanau aoga o lo’o ao’oga ai.
O tamafanau lava o le afio’aga o Fagali’i sa gafa ma le fausia o le faleaoga fou.
I le saunoaga autu a le Palemia, Tuila’epa Dr Sa’ilele Malielegaoi, na ia toe fa’apupula ai le tāua o le fa’aāogaina o fesoasoani a pa’aga mai fafo e fausia ai atina’e fa’apea i totonu o nu’u ma afio’aga.
“’Aua le tu’ua le talosaga pea, talosaga pea, auā o le mafua’aga lena na omai ai fa’alapotopotoga nei mai fafo, e omai e fesoasoani i le tatou lē tagolima.”
“O le Kapeneta lenei e galulue fa’ataulele’a, e lē mapo mamalu, e leai se mea a Samoa e maua ai, pe afai na’o le nofonofo i totonu o le ofisa.
“E tatau ona tatou tutula’i ma o i tua e va’ai e molimauina atina’e e tatau ona fai, i lea vaega ma lea vaega o le atunu’u.”
“E lē uma upu i le tāua o le soifua a’oa’oina o tatou fanau, mai lava i le laitiiti o le tamaititi po o le teine seia o’o lava ona matua.
“O le a’oa’oina lelei o fanau ina ia popoto ma atamamai, o le a atagia ai se Samoa e manuia lona lumana’i.”
Na saunoa fo’i Tuilaepa i le tulaga o le tele o fa’afitauli e tutupu i le olaga nei, ae le muta ai le soifua a’oa’oina o le tagata soifua i lona olaga atoa i le lalolagi o lo’o tatou i ai.
Ua tele faleaoga ua mae’a ona fausia, ona o le fesoasoani mai o le Malo o Iapani, ma o le foliga va’aia lea o se Malo e to’a filemu, e aga’i tasi i ai fuafuaga mo le atina’e o le tamaoaiga, o le fa’aopoopo lea a Tuilaepa.
Sa momoli ai le agaga fa’afetai i le Malo o Iapani, e tusa o le latou fesoasoani lea ua tino mai ai le fa’amoemoe o le afio’aga o Fagali’i.
Na fa’afetaia fo’i e le Malo Samoa le sao o le Afio’aga o Fagali’i i le fa’amae’aina o lenei galuega tele.
“Fa’afetai i lo outou manatu i fanau e pele i loto ma agaga mo le manuia o aiga, nu’u, ekalesia ma le tatou Malo.”
