FA’ALELEIA LE AFU AAU I VAILOA PALAULI
Tusia: Tusiga Taofiga
E $289,500 NZD le seleni sa fa’ameaalofa mai e le Malo Niu Sila mo le fa’atupeina o le toe fa’aleleia o le Mata’aga o le Afu Aau i Vailoa Palauli auā taelega ma tafaoga a le atunuu aemaise turisi faimai i Samoa.
O lenei mata’aga tele sa faigatā ona afea e turisi ona o le fa’aletonu o le auala, paka o ta’avale aemaise nofoaga e mapu ai aiga.
Peita’i o le fesoaosoani a le Malo Niu Sila i le faigapa’aga ma Samoa e ala i le polokalame o le Samoa Tourism Growth Partnership (STGP) mo le lima tausaga, lea ua mafai ai ona fausia le fa’alauteleina o le auala, fa’aleleia talivai ma alāvai aemaise nofoaga e nofonofo ai aiga ma paka mo ta’avale.
Saunoa le Pule Sili o le Pulega o Tagata Tafafao Maimoa mai Fafo (STA) ia Fa’amatuainu Lenata’i Salā Suifua e fa’apea, o le agaga atoa o le toe fa’aleleia o nei mata’aga ina ia fa’atumau ai pea le matagofie o tatou laufanua ma fa’atosina mai ai turisi e asiasi mai i Samoa.
“Ae te le’i o’o i tua i le afu, e muamua e afea le fa’aāliga o le gaosiga o le siapo (Siapo Demonstration), o le tasi fo’i lea o a tatou measina e fa’atosina atili mai ai turisi e afea o tatou laufanua, ma atili manuia ai o tatou tagata e ala i tupe maua mo le tausiga o aiga, nu’u ma ekalesia.
E talitonu le Pulega o Turisi i Samoa, o le toe fa’aleleia o lenei Mata’aga i le atunuu, o le a telē lona sao i le atina’e o Samoa ma lona tamaoaiga mo nei ma le lumana’i.
