O SOU MANATU
O le tasi o polokalame fa’aauau a le Malo tauala atu i le Matagaluega o Aoga, Ta’aloga ma Aganu’u, o le tatala lea o le avanoa mo le toe fa’afaigaluegaina o faiaoga ua litaea mai le galuega, ae o lo’o lava pea le malosi e fa’aauau ai lona valaauina e ala i le a’oa’oina o fanau lalovaoa a le atunuu.
Peita’i o ia avanoa e mata’itu toto’a e le Matagaluega faiaoga e toe talosaga atu mo le fia fa’aauauina o le tautua, e fua i le malosi o i ai, ma le tulaga tau soifua Maloloina, ma e lē fa’amalosia e le Malo se tasi e toe faigaluega.
Na fesiligia nisi o le atunu’u i so latou finagalo fa’aālia e tusa o ia avanoa fa’aauro o lo’o tatala atu pea e le Malo mo faiaoga ua litaea e fa’aauau ai le tautua auā se tupe maua mo le tausiga o aiga aemaise le tautuaina o le nu’u ma ekalesia.
Isaako Sola
63 tausaga o Sataoa
E i ai lo’u taofi o le galuega e fai fa’atasi. O lea ua tatala le avanoa e le Malo mo i latou ua litaea mai le galuega fa’afaiaoga, ae o lo’o i ai le naunauta’iga e fa’aauau le tautua mo Samoa. E le’o se mea leaga le toe aumai o faiaoga litaea e fa’aāoga.
E i ai nisi o faiaoga o lo’o lava pea lo latou malosi e ui ua matua le soifua, ae o lo’o lava pea le malosi e fa’aauau ai le galuega. O le ata vaaia lea o le naunauta’iga o le Malo ina ia lelei a’oa’oga a le fanau, o le toe aumai o faiaoga litaea e fa’aāoga. O tagata ua lava lo latou tomai ma agava’a, auā ua fia sefulu tausaga o tautua. O i latou ua latou iloa lelei ma leaga o le galuega. O i latou ua latou iloa le ituaiga gaioiga e tali ai i tamaiti, aemaise lava i totonu o aoga tulagalua ma aoga maualuluga, ona e i ai tamaiti e i ai le musuā i nisi o taimi. Ae o le tāua lea o nai faiaoga ua litaea, o latou ia o lo’o i ai metotia e fa’aoso ai le fiafia o le tamaititi e alu i le aoga.
Fa’afetai fo’i i le Malo, i nei avanoa ua tu’u atu mo faiaoga litaea. E i ai le taofi, o uiga ia a so’o se Malo o lo’o i ai le manatu laualuga e atia’e aiga, o nu’u, ekalesia aemaise o le atunu’u. O avanoa ia o lo’o silafia lelei e le Malo, e tatau ona fa’atino ina ia ō gatusa lelei ma fuafuaga a le Malo o lo’o fa’agasolo. E fiu le Malo e galulue ma ana pa’aaga mai fafo e fai atina’e ma fausia faleaoga, ona o le naunau ia saogālemu ma lelei faleaoga e a’oa’oina ai fanau, ae a mumusu tamaiti e aga’i i le aoga, ona leai lea o se aogā e fa’atino ai ia galuega tetele. O le ala lea e tāua tele ai le i ai o faiaoga mātutua, o i latou ua lava le tofā, ua lava le tomai ma le agava’a latou te a’oa’oina ai tamaiti i totonu o potu aoga.
O SOU MANATU
O le tasi o polokalame fa’aauau a le Malo tauala atu i le Matagaluega o Aoga, Ta’aloga ma Aganu’u, o le tatala lea o le avanoa mo le toe fa’afaigaluegaina o faiaoga ua litaea mai le galuega, ae o lo’o lava pea le malosi e fa’aauau ai lona valaauina e ala i le a’oa’oina o fanau lalovaoa a le atunuu.
Peita’i o ia avanoa e mata’itu toto’a e le Matagaluega faiaoga e toe talosaga atu mo le fia fa’aauauina o le tautua, e fua i le malosi o i ai, ma le tulaga tau soifua Maloloina, ma e lē fa’amalosia e le Malo se tasi e toe faigaluega.
Na fesiligia nisi o le atunu’u i so latou finagalo fa’aālia e tusa o ia avanoa fa’aauro o lo’o tatala atu pea e le Malo mo faiaoga ua litaea e fa’aauau ai le tautua auā se tupe maua mo le tausiga o aiga aemaise le tautuaina o le nu’u ma ekalesia.
Vitaliano Ioane
68 tausaga o Lepea
Ou te talia ma le agaga fiafia le avanoa ua toe tatala e le Malo mo faiaoga litaea e talosaga ai le toe fa’aauau o le tautua i totonu o aoga. A silasila i le fa’agasologa o vaega ia, e le na’o faiaoga uma e filifilia e toe fa’aauau le galuega. O lea ua fa’ata’oto alāfua a le Malo e fuafua ai le toe fa’aauau o le tautua a so’o se faiaoga litaea.
E fuafua lava i le soifua maloloina, ina ia atoatoa lelei le malosi i le tino ae fa’apea fo’i i le mafaufau. Afai o vaega ia o lo’o tilotilo i ai le Malo, ona o lo’o silafia e manuia ai le atia’e o le itu tau a’oa’oga, aisea e ala ai ona tu’u. Afai e silasila atu le Malo o lo’o lava le agava’a ma o lo’o soifua maloloina fo’i e fa’aauau le tautua, o le fa’ai’uga lena e patino i le Malo ma le Matagaluega o Aoga. Tatou te naunau ina ia popoto ma atamamai a tatou fanau, ma o le naunauta’iga fo’i lena a le Malo.
O lea ua tatou molimauina faigapa’aga a le tatou Malo ma Malo mai fafo, lea ua ala mai ai fesoasoani o lo’o fausia ai faleaoga i nu’u ma itumalo. O lea fo’i tatou te fa’alogologo i taumafaiga a le Malo i le ‘ave o le fa’amuamua i le itu tau i a’oga ma le soifua maloloina, ona o vaega ia e atia’e ai le tamaoaiga o so’o se atunu’u. A a’oa’oina lelei tagata ma soifua maloloina tagata o so’o se atunu’u o le manuia lena. Pau o lea, tatou nofo tatalo mo Samoa aoao, ina ia tumau le agalelei o le Atua, ma fa’aauauina pea ona saogālemu o tatou tagata mai lenei fa’ama’i oti o le Koviti – 19 o lo’o vevesi ai le lalolagi.
O SOU MANATU
O le tasi o polokalame fa’aauau a le Malo tauala atu i le Matagaluega o Aoga, Ta’aloga ma Aganu’u, o le tatala lea o le avanoa mo le toe fa’afaigaluegaina o faiaoga ua litaea mai le galuega, ae o lo’o lava pea le malosi e fa’aauau ai lona valaauina e ala i le a’oa’oina o fanau lalovaoa a le atunuu.
Peita’i o ia avanoa e mata’itu toto’a e le Matagaluega faiaoga e toe talosaga atu mo le fia fa’aauauina o le tautua, e fua i le malosi o i ai, ma le tulaga tau soifua Maloloina, ma e lē fa’amalosia e le Malo se tasi e toe faigaluega.
Na fesiligia nisi o le atunu’u i so latou finagalo fa’aālia e tusa o ia avanoa fa’aauro o lo’o tatala atu pea e le Malo mo faiaoga ua litaea e fa’aauau ai le tautua auā se tupe maua mo le tausiga o aiga aemaise le tautuaina o le nu’u ma ekalesia.
Manogi Ate
60 tausaga o Sa’asa’ai
E i ai lo’u taofi o avanoa ia ua toe tatala mo faiaoga litaea e fa’aauau ai le latou tautua i totonu o le Malo, aemaise o le a’oa’oina o fanau, o se fa’ai’uga talafeagai tele. O le taimi lenei ma le saoasaoa o le olaga o lo’o tatou i ai, tatou te mo’omia ituaiga faiaoga litaea ia. O i latou o lo’o i ai le tomai ma le agava’a e fa’afoe ai tamaiti aoga. Ua maitauina fo’i, e i ai nisi o fa’afitauli ua tutupu mai totonu o aoga, ae sa leai ni mea fa’apea na tutupu i la aso o ota aoga.
Ou te fa’afetai i le Malo, ona o ia avanoa o lo’o tatala mo nai o tatou tagata e fa’aauau ai le tautua e ui ua mae’a tausaga fa’atulagaina o le soifua auauna. Ou te fa’afetai fo’i i nai faiaoga litaea ona o le naunauta’iga o lo’o i ai e fa’aauau ai le tautua. Ua le manatu i se taui, ae ua silasila i le manuia o fanau fa’apea le atina’e o Samoa. E manaia fo’i le fa’afoega e le Malo o le toe fa’afaigaluegaina o i latou, e fua lava i le tulaga o le soifua maloloina. E le aogā fo’i le naunau i le tautua, ae avea ma tulaga e ono a’afia ai le soifua maloloina, ae lelei lava ona mata’itu uma vaega ua fa’ata’atitia e le Malo e agava’a ai le faiaoga litaea e toe fa’aauau lana tautua ia Samoa.
O ituaiga faiaoga fo’i ia e mo’omia e tatou i totonu o aoga, aemaise lava Aoga Tulagalua ma Aoga Maualuluga, ona o lo’o i ai le tomai ma le agava’a e fa’atonutonu ai tamaiti ma latou amio. Auā e moni lava o totonu o lou aiga ma ou mātua o le faleaoga ma o le faiaoga muamua fo’i lea a le tamaititi. Peita’i i nei vaitau, e fa’aāli le amio pulea i totonu o aiga, ae a tu’u atu loa e ō i le aoga, ua ‘ese fo’i amioga e fa’aāli. O le ala lena e tāua ai le tautua a i latou ua litaea, ona e i ai lo latou agava’a latou te fa’afoea ai ituaiga tamaiti fa’apea, auā ua tatou fa’alogologo so’o lava i fa’afitauli e tutupu mai, ae tāua le i ai o faiaoga tino mātutua, e fautua fo’i ma avea ma fa’ata’ita’iga i totonu o aoga.
O SOU MANATU
O le tasi o polokalame fa’aauau a le Malo tauala atu i le Matagaluega o Aoga, Ta’aloga ma Aganu’u, o le tatala lea o le avanoa mo le toe fa’afaigaluegaina o faiaoga ua litaea mai le galuega, ae o lo’o lava pea le malosi e fa’aauau ai lona valaauina e ala i le a’oa’oina o fanau lalovaoa a le atunuu.
Peita’i o ia avanoa e mata’itu toto’a e le Matagaluega faiaoga e toe talosaga atu mo le fia fa’aauauina o le tautua, e fua i le malosi o i ai, ma le tulaga tau soifua Maloloina, ma e lē fa’amalosia e le Malo se tasi e toe faigaluega.
Na fesiligia nisi o le atunu’u i so latou finagalo fa’aālia e tusa o ia avanoa fa’aauro o lo’o tatala atu pea e le Malo mo faiaoga ua litaea e fa’aauau ai le tautua auā se tupe maua mo le tausiga o aiga aemaise le tautuaina o le nu’u ma ekalesia.
Palasi Fiaali’i
79 tausaga o Falefa
E momoli le agaga fa’afetai i le Malo ona o avanoa ua tatala mo nai faiaoga ua litaea e fa’aauau ai le galuega. Fa’afetai silasila i alo ma fanau a Samoa, aemaise o la outou silasila i le tautua o lo’o fia fa’aauau pea auā le a’oa’oina o fanau a le atunu’u. O avanoa lē aumaua avanoa nei, ona o le tulaga tau le soifua maloloina. E i ai lo’u taofi e i ai nisi tagata e litaea ona o le tausaga po’o le matua o le soifua o lo’o i ai a’o le ma’ati o le mafaufau ma le malosi, e le fa’atusalia, o lo’o atoatoa lava. E ‘ese’ese lava tagata, e i ai tagata ua litaea, ae o lo’o lava pea le malosi e fa’aauau ai le galuega, e i ai fo’i tagata ua litaea ma ma’ea ai lava le tautua ona ua tulaga fa’aletonu le soifua maloloina, ma ua tatau fo’i ona nofo i le fale.
Ou te fa’afetai fo’i i nai faiaoga litaea ona o le manatu i alo ma fanau a Samoa. E ‘ese’ese uma taofi o tagata, aemaise o latou lagona i le tulaga ua toe tatala ai e le Malo avanoa nei. A tatou silasila i ai i le taimi nei, to’atele o faiaoga ua talavou, o nisi e le’i faiaiga. O le ala fo’i lea o le tutupu o fa’afitauli e a’afia ai le fanau, ona e le’o lava le onosa’i ma le fa’apalepale. O faiaoga ua lava lo latou tomai i mataupu e pei ona a’oa’oina ai i latou i Iunivesite sa a’o’oga ai e maua ai o latou fa’ailoa e faiaoga ai. A’o vaega ia e lua o le onosa’i ma le fa’apalepale, e leai se tusipasi o vaega ia.
A silasila fo’i i ai, e oso loa le ita o le faiaoga i le fa’alogogatā o tamaiti po’o le ulavavale, tasi lava le vaifofō o le sasa. A ia manatua lelei, e i ai le ta e a’oa’oina ai le mafaufau o le tamaititi, e i ai fo’i le ta e a’afia ai le mafaufau o le tamaititi. A’o le tāua lena o le i ai o faiaoga litaea i totonu o so’o se aoga i le atunu’u, e fautua i isi faiaoga i le onosaia o amioga a le fanau. E i ai fo’i isi faiaoga litaea, e lē lava le onosa’i i isi taimi, ae o lo’o fa’atino lava le galuega o lo’o valaauina ai. Ia alo i o outou faiva, fa’aāoga lelei lou valaauina auā alo ma fanau a Samoa.
O SOU MANATU
O le tasi o polokalame fa’aauau a le Malo tauala atu i le Matagaluega o Aoga, Ta’aloga ma Aganu’u, o le tatala lea o le avanoa mo le toe fa’afaigaluegaina o faiaoga ua litaea mai le galuega, ae o lo’o lava pea le malosi e fa’aauau ai lona valaauina e ala i le a’oa’oina o fanau lalovaoa a le atunuu.
Peita’i o ia avanoa e mata’itu toto’a e le Matagaluega faiaoga e toe talosaga atu mo le fia fa’aauauina o le tautua, e fua i le malosi o i ai, ma le tulaga tau soifua Maloloina, ma e lē fa’amalosia e le Malo se tasi e toe faigaluega.
Na fesiligia nisi o le atunu’u i so latou finagalo fa’aālia e tusa o ia avanoa fa’aauro o lo’o tatala atu pea e le Malo mo faiaoga ua litaea e fa’aauau ai le tautua auā se tupe maua mo le tausiga o aiga aemaise le tautuaina o le nu’u ma ekalesia.
Toma Solia
80 tausaga o Aleisa
E ‘ese le tāua o le valaauina o le tagata, so’o se tagata lava e filifilia i se galuega, e tatau ona fa’atino, ona o tofiga uma e mai le Atua. E na’o le Atua lava na te silafia le vaega o auaunaga e te aoga i ai ma fa’aāoga i ai lou tomai ma le agava’a o lo’o i ai. O le galuega fa’afaiaoga, e le’o se galuega faigofie, ua tatou iloa uma lena tulaga. O totonu fo’i o so’o se aiga, o le naunauta’iga lava, ia ‘ave a tatou fanau i le aoga, ina ia maua le poto salalau e sa’ili ai se manuia i le lumana’i. O le naunauta’iga lea o mātua ma aiga, ina ia ola manuia fanau, auā o le lumana’i lea o aiga.
Ae tu’u mai fo’i totonu o le atunu’u, o le lumana’i lea o Samoa. Fa’afetai i le Malo, ona o le tofā na a’e e tatala ai avanoa mo faiaoga ua litaea e fa’aauau ai le tautua. O tautua mo’omia ia mo le atina’e o le tamaoaiga o Samoa. O lea ua tatou fa’alogologo i le naunauta’iga o le Malo, ina ia atia’e le tamaoaiga o Samoa, ma ia ola a’oa’oina fanau, ona o latou o le lumanai mo a taeao. O fanau latou te fa’aauauina le galuega a mātua. O ai na iloa, o le isi Palemia o Samoa i le lumana’i e sau mai totonu o le matou aiga. Tatou te lē talanoa ma le finagalo o le Atua.
O le taimi nei o tatou, fa’aāoga uma tomai ma agava’a o lo’o i ai e fa’atino ai a’oga a le fanau. ‘Aua tatou te va’ava’ai fa’apea ua mātutua, ua le’o toe aogā ona fa’aauau le tautua. Faimai e a le isi toeaiga, ‘aua e te fa’amasino le tagata i ona foliga ma lona tino. To’atele o faiaoga litaea nei, sa ao’oga ai tagata ua avea ma Pule Sili o Kamupani, avea ma Ofisa Sili o Matagaluega a le Malo, avea ma faiaoga o se Iunivesite, avea ma tagata faipisinisi ma isi lava tofiga, pei o le valaauina e avea ma faifeau. Ia tatou fa’atāua lo tatou valaauina, ne’i toe aveesea e le Atua fa’amanuiaga ua tu’uina atu.
O SOU MANATU
O le tasi o polokalame fa’aauau a le Malo tauala atu i le Matagaluega o Aoga, Ta’aloga ma Aganu’u, o le tatala lea o le avanoa mo le toe fa’afaigaluegaina o faiaoga ua litaea mai le galuega, ae o lo’o lava pea le malosi e fa’aauau ai lona valaauina e ala i le a’oa’oina o fanau lalovaoa a le atunuu.
Peita’i o ia avanoa e mata’itu toto’a e le Matagaluega faiaoga e toe talosaga atu mo le fia fa’aauauina o le tautua, e fua i le malosi o i ai, ma le tulaga tau soifua Maloloina, ma e lē fa’amalosia e le Malo se tasi e toe faigaluega.
Na fesiligia nisi o le atunu’u i so latou finagalo fa’aālia e tusa o ia avanoa fa’aauro o lo’o tatala atu pea e le Malo mo faiaoga ua litaea e fa’aauau ai le tautua auā se tupe maua mo le tausiga o aiga aemaise le tautuaina o le nu’u ma ekalesia.
Iele Afato
67 tausaga o Vailima
O le mataupu lenei o se mataupu tāua tele i lo’u taofi, ona o lo’u to’alua le isi tagata o lo’o i totonu o le li’o lea. A tatou tilotilo i le mataupu lenei ma le alualu i luma o le soifuaga lea tatou te i ai, ona tatou fa’apea ane lea, Viia le Alii i lona alofa ma lona agalelei. E momoli le agaga fa’afetai i le Malo, ona o le tofā ua a’e na afua ai lea fa’ai’uga e tatala le avanoa mo nai faiaoga litaea e talosaga ai le toe fa’aauau o le tautua ia Samoa e ala i le a’oa’oina o alo ma fanau mo le lumana’i manuia.
Silasila fo’i, o faiaoga nei ua lava lo latou tomai ma agava’a i le fa’afoega o a’oa’oga mo tamaiti, aemaise lava aoga tulagalua ma aoga maualuluga. O nisi ia o tamā ma tinā o lo’o i ai metotia o aso ua tuana’i e fa’atino ai a’oga a le fanau i le taimi nei. E lava fo’i lo latou agava’a e onosaia ai amioga a le fanau, auā so’o se aoga lava e ‘ese’ese uma tamaiti, ma e ‘ese fo’i si’osi’omaga na tutupu a’e ai tamaiti. E i ai lo’u taofi, o le fa’amaoni lava e fa’atino ai so’o se galuega, auā o le tatou valaauina, o le valaauina mai le Atua lea. Afai fo’i o ia avanoa e tatala e le Malo mo faiaoga litaea, o le musumusuga lena a le Agaga Paia, ina ia fa’aāoga tomai ma agava’a a nai o tatou tagata.
E i ai lo’u talitonuga, o faiaoga litaea o lo’o i ai, e litaea ona o le tulaga i le matua o le soifua, ona e i ai lava tausaga fa’atulagaina e litaea ai so’o se tagata faigaluega a le Malo. Atonu o le naunauta’iga lava ina ia fa’aauau le valaauina, ma ia fa’aauau le tautua mo fanau lalovaoa a Samoa.
