$12 MILIONA LE SELENI FAAALU MO LE AUALA MAI VAIA’ATA I PATAMEA
Tusia: Tusiga Taofiga
Ua i ai le fuafuaga a le Malo, e tatau ona mae’a fausia le auala tele fou mai Fusi Safotulafai aga’i atu i Patamea ua fa’aigoaina o le Vaia’ata Road ia Ianuari po’o Fepuari o le tausaga fou 2021.
O lenei galuega tele e $12 miliona ma o lo’o fa’atupeina lava e le Malo Samoa i le naunauta’iga atoa, ia mafai ona fesoasoani lenei auala, e tali atu ai i taimi e louloua ai le tau ma a’afia ai le auala tele o lo’o i talafatai o Savai’i i ni tafega tetele.
Mo le silafia e 20 kilomita le telē o le auala lenei, ma e fa Konekarate Samoa, o Pisinisi Fai Auala lava o lo’o i Savai’i, ua tu’u atu ai le galuega lenei, e galulue ai mo le ta’i 5 kilomita a le Konekarate.
Saunoa Galumalemana Ta’atialeoitiiti Tutuvanu – Schwalger, Pule Sili o le Pulega o Felaua’iga i luga o le Lau’ele’ele (LTA), o lenei auala e ui atu i Vaia’ata aga’i tonu i le Falepuipui i Vaia’ata fa’atasi ai ma le nofoaga o lo’o lafoa’i ai le lapisi.
“O le agaga atoa i le Malo ua fausia ai lenei auala, ina ia mafai ona i ai se auala e tua i ai femalaga’iga i Salafai pe afai ae a’afia le auala tele o lo’o fa’aāogaina nei, i le sami aemaise ni tafega tetele i fesuia’iga o le tau.”
“O lea auala e leai sona ‘ese’esega ma le auala tele ua toe fausia mai Vaitele seia paia Faleolo i lona umi.”
“O Konekarate fo’i o lo’o latou fausia lenei auala, o kamupani lava a o tatou tagata, o le naunauta’iga maualuga o le Malo, ia toe tu’uina atu a tatou seleni, e fa’agaioi ai fo’i le tamaoaiga o nai na fo’i kamupani Samoa, a’o feagai ai le lalolagi ma le tulaga ma’ale’ale o le fa’ama’i oti Koviti – 19.”
Na asia i le asiasiga a le Komiti o Atina’e a le Kapeneta i le vaiaso ua mavae, lenei galuega tele, fa’atasi ai ma isi auala galue e lua o lo’o fausia i le taimi nei, e i ai le auala galue aga’i le falea’oga a le Aoga Tulagalua i Satuiatua e tusa lona tau ma le $700,000 ma o lo’o fa’atupeina e le Faletupe a le Lalolagi (World Bank) ma le auala galue aga’i fa’ato’aga ma tuā maota o le afio’aga o Vaisala, Savai’i i lona tau atoa e $600,000, fa’atupeina e le Malo Samoa.
O nei atina’e o le tasi lea o anava a le Faigamalo a le HRPP o lo’o i ai nei, o le mea e lelei mo Upolu e lelei fo’i mo Salafai.
