(OFISA O LE SO’OUPU); I lana Fonotaga FK(20) 35 o le Aso Lulu 2 Setema 2020, na talanoaina ai e le Kapeneta le Pepa PK(20)781 ma faamaonia ai e faapea:
I. Malaga Faapitoa Togipau (Chartered Flight) mo Tamaiti Aoga Sikolasipi ua mae’a Aoaoga ma nisi e nonofo mau i Samoa o loo poloka i Ausetalia
i. Le malaga mai o le malaga faapitoa togipau e tasi e auina mai ai tamaiti aoga sikolasipi ua mae’a a latou aoga (studies) i Ausetalia, Iapani, Saina ma Papua Niu Kini i Samoa;
ii. E malaga faatasi mai ai ma i latou e nonofo mau i Samoa o loo poloka i Ausetalia;
iii. Ia feutaga’i ma le Air New Zealand mo le faatinoina o lenei malaga togipau e faaaoga ai se vaa lapoa (widebody aircraft);
iv. O lenei malaga o le a faataunuuina i le vaiaso mulimuli o le masina nei o Setema;
v. Le faatino e le Matagaluega o le Va-i-Fafo ma Fefaatauaiga feutagaiga moomia uma mo le auina mai o lenei malaga togipau mai Ausetalia;
vi. E faatupeina lenei faigamalaga e i latou o le a malaga mai ai;
vii. Ia faatino uma aiaiga faasoifua maloloina e i latou o le a malaga mai ai mo le puipuiga o Samoa mai le faamai Covid19.
II. Auina mai o le Aufaigaluega Faavaitaimi a Samoa o loo i Niu Sila
i. Le malaga mai o tagata faigaluega faavaitaimi (RSE Workers) a Samoa o loo i Niu Sila i le Aso Faraile 11 Setema 2020 ma faamae’a mai ai i latou o loo totoe i le masina o Oketopa 2020.
III. Toe Faafoiina mai o Tino Maliliu o Tagatanuu o Samoa mai Niu Sila ma Ausetalia
i. Le toe faafoi mai o tino maliliu o tatou tagata ua maliliu i Niu Sila ma Ausetalia i tuutuuga nei:
• I latou na auina atu i polokalame a le Malo e pei o le (a) aoga faasikolasipi;
(e) alii faigaluega faavaitaimi na maliu i Niu Sila ma nisi o le atunuu o loo tagimaiala mo le toe faafoiina mai i Samoa o ō latou aiga e lagomau ai;
• Ia faamalosia pea le mulimulitaia o tuutuuga uma ua faataoto e le Matagaluega o le Soifua Maloloina mo tino maliu e toe faafoi mai;
IV. Faasalaga mo i latou e solia le Poloaiga e Ulufale mai ai i Samoa ao iai le Atunuu i Puipuiga o le Covid19
i. Le faasalaina i le $2,000.00 o soo se tagata ua faamaonia lona solia o aiaiga o le malaga ese atu ma toe malaga mai i Samoa i ni faamoemoe pupuu i le vaitaimi lenei ao iai le atunuu i puipuiga o le faamai o le Covid19;
ii. Le totogiina lava e sea tagata o lona aumau ai i nofoaga o le a faanofoesea ai pe a taunuu mai i Samoa.
O le a iloilo e le Kapeneta nisi faigamalaga e fuafua mai i Samoa i le lumanai.
E faatumauina pea isi aiaiga o Poloaiga o Faalavelave Tutupu Faafuase’i na mua’i tuuina atu.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
E amata faamamaluina o nei suiga i le Aso Tofi 3 Setema 2020 seia toe iai se isi faaaliga.
