SAUNOAGA AUTU A LE PALEMIA, SUSUGA TUILAEPA LUPESOLIAI SAILELE MALIELEGAOI, I LE TATALAINA O LE AUALA I NONOA SALEIMOA.
(Aso Tofi, 15 Oketopa 2020)
Sa tau ilo lenei taeao pe tua ma ni a, aua e le taumasina o tatou mana’o ma le finagalo o le Atua. O le Atua foi na te silafia mea e tatau ma le aso mo i tatou. Peitai o lea ua mae’a ona momoli la’au i Foga’a e le Ta’ita’i o le Sauniga ona o le alofa faasoa mai o lo tatou Matai Sili, ua taunu’u ai le faamoemoe i le aso.
O le isi nei taeao matagofie i le oso mai o le la, sulugia ai le laueleele i le matagofie o le foafoaga a le Atua. Ua toe siitia ai le agaga fiafia i lenei taeao i le tatou sauniga, i le leo malie i le susuga i le Faafeagaiga.
Pe le lauga, pe le atoatoa foi lana tapenaga ae malie le loto i le leo malie. Ai e faapea le aufaipese a le Atua na auina mai i se ulua’i taimi o le toe taimi fo’i na pepese ai agelu o le Atua i le va o le lagi male lalolagi i le po na fanau ai le Mesia. E toe tu’u e a le fiafia e pese. Fai mai le isi tagata o le Atua, ‘a e tatalo ma e toe pese, ona lua ai lea o ou tatalo’.
Lea ua tatou potopoto ai i le mea nei, e sii ai le viiga ileAtua. Aisea? O aga ia ole tatou malo, Faavae i le Atua. E le na’o le tatou laulauvivilu, Faavae i le Atua le malo o Samoa ae tatou te le ola ai. Lea ua tatou olaina viiviiga o le tatou Matai Sili ina ua ma’ea le galuega.
O aga ia e tatau ona fai, a ma’ea se galuega, e tatau ona tatou vivii a’e ma le fiafia i le Atua ona o le faamoemoe ua taunu’u, o le la’au o le soifua lea.
Lea foi ua aliitia Lotosoa e afio ai le Sa’o o Tilialo ma le aiga Sa Tilialo, susu le Matua faapea Luatua ma le Gauta’ala.
A ua afifio foi paia o le Malo i afioga i Minisita o le Kapeneta, o Minisita Lagolago ma Faipule o le Palemene.
Susu faaulu’uluga o Matagaluega ma Faalapotopotoga Tumaoti a le Malo, tainane le loaloa o le auvalaaulia.
O paia ma mamalu na ua agatonu ai lo tatou taeao fesilasilafai.
O le auala lenei e 1,195 mita lona umi faataina, ma o le Kamupani a le Ah Liki Construction na fausia lenei auala i le tau atoa e $659,765.80, ina ua manumalo I tauofoga faalauaitele masani a le Malo sa faatinoina.
O faiga faavae ia o le tatou Malo, e tatau ona tauofo, e aveese ai ni uiga faaalatua e ono tulai mai. I le faapea ane o le Minisita, ‘aumai lau tama lale e fau le auala’, ona fai lea i se tau tele. O le ala lena e liolio ai lo tatou Malo e puipui i ni faiga faaalatua ina ia tauofo.
E omai ai i latou ua masani i le tulaga o le taleni fai auala, o inisinia ma i latou uma latou te fausia le auala ina ia lelei mo le faaaogaina.
O le tasi nei o auala ua tatala aloaia i le aso ma e leai lava se isi lagona e sili atu i le lagona o le fiafia ma le faafetai ona o le toia pea o tatou i le tamaoaiga foai mai e le Atua.
O soo se galuega ua maea ona fausia e aofia ai ma lenei auala ua tatala i le aso, e le faalogologo tiga ai le Malo i le faataunuuina o ia tiute aua o galuega sa tapuaia e le pule mamalu a Alii ma Faipule faapea Faafeagaiga taulagi a lou tou Afioaga.
Afai la ua mapu mai faafitauli sa asaina i aso ua alu, o le sini tonu lea o lo’o tulimatagau e le Malo e ala i lenei polokalame.
Ua mae’a la le pitolaau a le Malo na faamatuu mai ai le fesoasoani ona e faamuamua pea le soifua manuia o tatou tagata. A o se avanoa lelei lenei e faatino ai loa a outou fuafuaga tau atinae sa faava’a tuia ona o le tulaga pagatia o le auala.
E i ai le faamoemoe o le isi lenei auala o le a tele sona sao i le tamaoaiga o le Afioaga, i le atinaega o faatoaga, lafu manu ma le tele lava o isi tamaoaiga e tatau ona atiae e tua i ai lo tatou nuu nei.
O le a faigofie foi ona fai ma ala e sulufai ai i eleele maualuluga pe a feagai i tatou ma mala faanatura e pei o le Tsunami.
Ma e leai lava se mea tatou te tua iai sei vagana tatou faatoaga. I le tulai mai o le faamai lenei o le Koviti, ua sana faamanatu mai ai pea le alofa tunoa o lo tatou Matai Sili, na ia foafoaina ai le eleele ma aumai ai le malamalama ia i tatou e toto mea e tua iai le aiga.
Poo a lava nisi atinae ma folafolaga soona fai, o le laueleele tatou te tua iai i o tatou puapuaga faa-le-tagata ma mafatiaga eseese uma o le olaga.
E momoli atu le faafetai ma le faamalo i le faamalumalu a lo tou afioaga a o faagasolo le galuega i le fausiaina o lenei auala.
Faafetai atu foi i le Kamupani a le Ah Liki Construction Ltd mo le faatinoina o le galuega i fua faainisinia ma aiaiga sa fuafuaina mo le fausiaina.
Momoli foi le faafetai i le Minisita o Galuega ma Atinae Tetele, Taitaifono ma Komiti Faatonu ma le Pulega o Felauaiga i le laueleele i le mataituina lelei o aiaiga ma tuutuuga talafeagai o le fausiaina o lenei auala, faapea foi le sao a Matagaluega ma Faalapotopotoga a le Malo.
Faamalo Galulue.
Ua uma ona faasoasoa galuega a le Kapeneta ma le Malo, i lea Minisita ma lea Minisita faapea foi faauluuluga o Matagaluega taitasi, o le latou lea matafaioi. E le aiaina e le isi Minisita galuega a le isi Minisita, o le ala nei e taua ai lenei taeao ma ole ala foi nei ua masii mai ai le Malo ma faauluuluga e mataitu galuega ma nisi mea e moomia e le tou afioaga aua le faasologa o galuega faifaipea a le Malo, aua e le uma le faiaso o le Atua.
E tele foi Itumalo o loo tau faasoasoa atu iai le faasoa utiuti a le tatou Malo ma e iai foi se isi taimi toe taliu mai faasologa o galuega i lo outou Itumalo. O aga lava ia o le faasoa, o le tatalo.
Ia fesoasoani le Atua i Minisita o Matagaluega ae faapea foi le aiga Kapeneta, maua le malosi tauave pea e tautua ai lo tatou atunuu. O le Kapeneta lenei e galulue faataulelea, e le tausi mamalu ae tatau ona tutulai, e pei ona fetalai lo tatou Alii, ‘A e fia muamua, mulimuli, A e fia taitai, tautua’. O le taiala lena o loo mulimuli iai le faigamalo lenei.
Tatou faamoemoe pea i le mana o le Alii e tali mai ia tatou talosaga ma fuafuaga uma.
Ia auomanu lenei aso i le alofa o le Atua pulepule tetele.
Soifua ma ia Manuia.
