SAUNOAGA AUTU A LE PALEMIA, SUSUGA TUILAEPA LUPESOLIAI SAILELE MALIELEGAOI MO LE TATALAINA O LE AUALA I LEAUVA’A. (ASO TOFI, 15 OKETOPA 2020)
Ua ma’ea toto le niu ma momoli lapalapa o malo e sula ai le agalelei faifaipea o lo tatou tapaau i le lagi i lenei taeao.
O lea e momoli atu ai le faafetai i le Ta’ita’i o le Sauniga mo le upu folafola e laei ai fuafuaga ma le faamoemoe o lenei aso, tau ina tului pea lou soifua faa-le-Atua aua le feagai ai ma galuega.
O lea foi ua nofoia au oloolo, ua afio le aiga Sa Tuala, alalatai lo lua toalua, Vaifale ma Tevaga faapea le mamalu ia Salemuliaga.
A ua afifio foi paia o le Malo i afioga i Minisita o le Kapeneta, o Minisita Lagolago ma Faipule o le Palemene.
Susu Faauluuluga o Matagaluega ma Faalapotopotoga Tumaoti a le Malo. Tainane le loaloa o le auvalaaulia.
O paia ma mamalu na ua agatonu ai lo tatou taeao fesilasilafai.
E tupu pea manatu i taeao faapenei, e toe agai i tua ma e iai foi le pese foi lele, ‘E le tupu fua mea faapena’. I le filifilia o Malaeola ma Nofoaga e toai mai ai le talalelei a le Alii i lea foi itu faatapuaiga faakerisiano. E toai mai le talalelei, ua laolao i fale upu fai a Samoa. Ua uma ona tutuli uma i seoli e le muaau a le Alii tevolo uma na feoai i luga o le laueleele ma ua laolao ai le talalelei ma faigofie ona sosolo atu le talaiina i le atunuu atoa.
O tala ia ole vavau i le galuega tele foi sa faatino e le muaau lea tua atu ole gagafo o Sa Tuala aua le afifio o Aiono ma Sa Leulupe. O tala o le vavau, atonu e ese foi lo outou faitau.
O le auala lenei e 4,446 mita lona umi faataina, ma o le Kamupani a le Lucky Construction na fausia lenei auala i le tau atoa e $2,060,396.58 ina ua manumalo i tauofoga faalauaitele masani a le Malo sa faatinoina.
O galuega faaauau faifaipea lenei a le Malo o loo faagasolo pea ina ia mautinoa le lelei pea o auala tetele ma auala galue mo afioaga taitasi, o le ala foi lena ua lautasia ai lo outou afioaga i le faasoa a le Malo.
E le po se silafia o loo feagai le lalolagi ma faamai o le Koviti peitai e le o mafai ai lava ona tuua galuega ua uma ona fuafua e le malo ina ia faigofie femalagaina i auala tetele aua le soifua manuia o ona tagata, ma o le a vave ai foi ona siitia atinae tau tamaoaiga e le gata i le laueleele faapea foi le gataifale.
O galuega nei a le tatou Malo, e faaauau pea faaauau pea lava e le mafai ona taofia. O isi ia mau malolosi mai lo tatou Alii; ‘O le na te iloa le mea ua tatau ona fai ae gugu ma leai se gaioiga ua mafai ona fai, o le agasala ai a’i lava lea i luma o lo tatou Alii.
E maualuga le taofi o le a aoga tele lenei auala mo le fesootai atu i faatoaga ma atinae lafu manu a le tatou nuu nei ma o le tou sao foi lea i le tamaoaiga o le atunuu, faapea foi ona faigofie mo fanau i le agai atu i le aoga, aemaise pe a oo ina lofia i tatou i mala faanatura pei o Tsunami, ao lea ua lelei ma mautu le auala mo le agai atu i laueleele maualuluga ma saogalemu.
O lea ua ma’ea le galuega pei ona outou talosaga mai ai, ae ao foi ona lafo sa outou ma’a aua le saga teuteu ma faaleleia atili i taimi uma ina ia umi ona lelei lenei auala.
E momoli atu le faafetai ma le faamalo i le pule faamalumalu a lo tou afioaga a o faagasolo le galuega i le fausiaina o lenei auala.
Faafetai atu foi i le Kamupani a le Lucky Construction mo le faatinoina o le galuega i fua faainisinia ma aiaiga sa fuafuaina mo le fausiaina.
Momoli foi le faafetai i le Minisita o Galuega ma Atinae Tetele, Komiti Faatonu ma le Pulega o Felauaiga i le Laueleele mo le vaaia ma mata-i-tu lelei o galuega a’o fausia i ona vaega uma faainisinia, faapea foi Matagaluega ma Faalapotopotoga uma a le Malo sa fai lo latou sao i lenei galuega.
Malo Galulue.
Faamoemoe pea i le mana o le Alii e tali mai ia tatou talosaga mo fuafuaga uma.
Ia auomanu lenei aso i le alofa o le Atua pulepule tetele.
Soifua.
