Saunoaga Autu a le Susuga i le Palemia, Tuilaepa Lupesoliai Fatialofa Aiono Sailele Malielegaoi mo le Tatalaina o le Auala Mafafa i Faleaseela. (14 Oketopa 2020)
Ua mae’a ona momoli la’au i Foga’a e le Ta’ita’i o le sauniga ona o le alofa faasoa mai o lo tatou Matai sili, ua taunu’u ai male manuia le faamoemoe i lenei aso.
Talitonu sa tau ilo lenei taeao pe tua ma ni a, aua e le taumasina o tatou lavasiga ma le finagalo o le Atua.
Peitai o lo’o tali mai pea le Atua e ala i lona agalelei i a tatou fuafuaga fai.
O le a taoto ia, a’o se ala o’o paia o le taeao aua le afifio o le Aiga Taulagi, ma i laua matua o Satuala, alalatai Tootoo o Maauga ma upu ile Faleaana.
Afio foi le Tama ole Itumalo.
Ua afifio foi paia faa le malo, le Kapeneta ma sui mamalu o le Palemene, tainane Faauluuluga o Matagluega ma Faalapotopotoga Tumaoti a le Malo, ma Sui o le Kamupani sa feagai ma lenei galuega, ma le mamalu eseese o le au valaaulia.
O paia ma mamalu na ua taualoa ai le faamoemoe e pei ona tatou i ai lenei taeao.
Ina ua mae’a tauofoga faalaua’itele a le Malo, ma manumalo ai le Kamupani a le Lucky Construction i le tau e $3,350,324.99 ma o latou faatinoina ai loa le fausiaina o lenei auala.
O le umi atoa o le auala e, 3,424 mita.
Lea foi ua toe faataoto mai le auala a Matafaa ma o lea ua faamaumau.
E ui ina lautoia i tatou i le faamai o le Koviti, ae le mafai ai lava ona taofia galuega fa’aauau a le tatou malo i so’o se ala e mafai ai aua le faafaigofie i le mamalu o le atunuu o femalagaina i luga o auala tetele, aemaise lava atinae o faatoaga, e tualelei ile soifua atiae ile taimi e tulai mai ai mala e afea lo tatou atunuu.
Tatou te le pulea le malosi ma le mea e agi mai ai afa fulifao, ae mafai ona tatou faatonutonu tatau, le sisi ae o le la afa ole tatou sa, tatou te folau ai i le saogalemu.
O lea ua tino mai le galuega tele lenei, ma e maualuga le taofi o le a aoga tele lenei auala mo le fesootai atu i faatoaga, atinae lafu manu faapea nisi o atinae a le tatou nuu nei, ma o lo tou sao foi lena i le tamaoaiga o Samoa.
O le aoga tele foi o lenei auala mo femalagaina mo faalavelave faa le natura pei o Tsunami ma mafuie, ole toomaga mautinoa mo le saogalemu.
Peitai e maitau, e 50 itumalo ole tatou atunuu, itumalo faapalota, e tele foi nuu totonu o itumalo taitasi, e le gata na tele nuu, ao nisi o nuu e 3 i le 4 auala galue. O lona uiga o se atinae e le faigofie i le taumafai e faatofutofusia faipule uma ole tatou maota.
E le gata i faipule e logologoa le malo, faapea foi faipule o lo’o tetee pea i galuega a le tatou malo.
Ua mae’a le pitolaau a le Malo na faamatuu mai ai le fesoasoani ona e faamuamua pea le soifua manuia o tatou tagata. A o se avanoa lelei lenei e faatino ai loa a outou fuafuaga tatau tau atinae sa faava’a tuia ona o le tulaga pagatia ole auala.
I le tulai mai o le faamai oti ua tatou iloa ai fili maoa’e ua feagai nei ma atunuu mauoloa e faalagolago tagata uma i galuega e ola ai. O le fia aai ma le fia feinu e afua ai ona moomia ni tupe faamea alofa mai le malo.
A lea tatou te vaavaai atu i TV, e laina aiga e fia i se paipa e tasi e utu ai latou pakeke vai ma toe tauamo ile fale e kuka ai meaai ma fai ai tagamea i o latou fale.
O isi ua uumi laina e tutu ai, e tapa ni ipu taumafa mo latou ma fanau e tufatufa mai e le malo ma faalapotopotoga.
Faatusa ia Samoa, o tatou o le atunuu ua faamanuiaina e le Atua. Lea foi o lo’o tele le meaai, ma talu a na tulai mai faiga malo nei ile 1982, ma faatino polokalame o lo’o faagasolo pea, e lei toe vaai i tatou i se oge.
Ao lea foi o lo’o taumafai lava e fa’aauala atu isi fesoasoani tau tupe e pei o penisiona, faapea foi male tala i tua o NPF ma isi foi fesoasoani.
E momoli atu ai le faafetai ma le faamalo i le pule faamalumalu a le afioaga nei ao faagasolo le galuega. Faafetai i lou tou faama’ite mai i le malo mo lou tou auala ae maise le tu’itu’i e le aunoa a lou tou faipule.
Faafetai atu foi i le Kamupani a le Lucky Construction Ltd mo le faatinoina o lenei galuega tele i fua faainisinia ma aiaiga sa fuafuaina mo le fausiaina.
O le auala lenei o le tauofo e taugofie ai galuega toe unaia ai le fai mea lelei.
Momoli foi le faafetai i le Minisita o Galuega ma Atina’e Tetele, Komiti Faatonu ma le Pulega o Fealauaiga i le Laueleele mo le vaaia ma mata-i-tu lelei o galuega a’o fausia i ona vaega uma i aiaiga ma fua faainisinia, faapea Matagaluega a le Malo ma Faalapotopotoga uma sa i ai lo latou sao i lenei galuega.
O le fesili, aisea e taua ai le latou sao?
E tatau ona mata-i-tu lelei latou oloo faia galuega nei, aua o le fai pisinisi lava ia o lana ia lava lea masani, e faatino auala e faatupu tele ai o latou foi seleni.
E misi loa le vaai a le Minisita ma lana Matagaluega, pi’opi’o loa, tanu loa i le palapala le auala ae le tanua i ma’a, o le afuaga lea e omoomo soo ai tatou auala pea oo na timu aso.
Tatou faamoemoe pea i le mana o le Alii e tali mai ia tatou talosaga mo fuafuaga lelei uma mo Samoa nei ma e lua, aemaise o le faaamiotonuina o le au faiauala.
Ia auomanu lenei aso i le alofa o le Atua pulepule tetele.
Soifua.
