FA’AIGOA MA FA’ATUĀTUSI AUALA MA FALE I SAMOA
Tusia: Tusiga Taofiga
Ua mae’a le vaega muamua o le fuafuaga tele a le Malo, e fa’aigoa ai auala ma fa’atuātusi fale o aiga fa’apea pisinisi ma kamupani i le atunuu.
O lenei fuafuaga na tatala aloaia i le Aso 24 Ianuari o le tausaga ua mavae, ma ua fa’asopolia ai le 2 kilomita o le talafatai o Apia, mai le Uati Tele aga’i Mulinu’u, fa’asolo atu i Lepea ma fa’aauau atu ai se’ia mae’a i Moata’a.
O le agaga atoa o le Malo na fa’ataunu’u ai lenei atina’e tele, e pei ona fa’amanino e le Ofisa Sili o Pulega – Matagaluega a le Palemia ma le Kapeneta ia Agafili Tomaimanō Shem Leo, ina ia faigofie mo turisi asiasi mai Samoa, aemaise tatou lava tagatanu’u o lo’o nonofo i nu’u i tua, e fia iloa tonu ma tau sa’ili nofoaga o lo’o i ai auaunaga ‘ese’ese i le taulaga auā a latou mataupu.
Fa’ailoa e Agafili, i lenei vaitau i le fa’atupulaia o le faitau aofa’i o tagata Samoa, aemaise o le si’itia o le tele o atina’e ma auaunaga tau pisinisi i le atunuu, o se lu’itau tele lea i le Malo, i se auala e fa’afaigofie ai i le mamalu femalagaa’i, ona vave maua nofoaga o lo’o fia aga’i i ai mo se mataupu o lo’o sa’ili fesoasoani i ai.
E le gata i lea, a’o le fa’afaigofie ai fo’i i auaunaga a le Tineimu, Soifua Maloloina, Leoleo ma isi, ona aga’i e ofo ma fa’ataunu’u le fesoasoani i se taimi vave pe afai o mana’omia mai e se aiga auaunaga nei, i se taimi vave.
O lenei fuafuaga a le Malo, o le a fa’asopolia ai le atunuu atoa, ma o lo’o fa’agasolo pea le fa’aigoa o auala i Upolu ma le fa’atuātusiina o Maota ma Laoa a’o le’i amatalia lea lava fuafuaga mo le Motu Tele i Salafai.
Na fautuaina fo’i e Agafili le mamalu o le atunuu, ina ia tautuanā, tatou galulue fa’atasi, e fa’aleleia ma atia’e Samoa, e aofia ai ma le vaaia lelei o le malu puipuia o a tatou meatotino, e i ai nei fa’asinoala.
Auā o lo’o i ai lava le talitonuga o le Malo, e i ai lava tagata e lē manatu mamafa i le tāua o nei atina’e a le Malo, ma fa’aleagaina ai nisi o fa’ailoilo ua mae’a fausia e le Malo, ma ma’imau ai le tele o seleni sa fa’atupe ai nei galuega lelei, ona o le moemoenoa ma le luafau lē āina.
