MALOSI’AGA FA’ALETULAFONO I LE KOMESINA O FAIGA PALOTA
Tusia: Tusiga Taofiga
E i ai nisi o fa’amatalaga ua fa’alauiloa, e fa’apea ua soloia le malosiaga o le Komesina o Faiga Palota, na te iloilo ai agava’a o so’o se Sui Tauva, ma faia ai se fa’ai’uga i le talia po’o le te’ena o lea Sui Tauva e tausinio ai i se faiga palota.
Peita’i na fa’ailoa e le Komesina o Faiga Palota, e lē moni ia lafoga, ma o le malosi’aga lava ia o le Komesina o Faiga Palota ma le Ofisa o Faiga Palota, na amata mai i le tausaga e 1963 seia o’o mai i le taimi nei.
Na fa’ailoa e Faimalomatumua Mathew Lemisio, o le i ai o le malosi’aga i se Komesina o Faiga Palota, o le agava’a lea fa’aletulafono na te iloiloina ai ma le toto’a ma le fa’amaoni fa’amaumauga o so’o se Sui Tauva, ma fa’ailoa ai pe ua fa’amaonia le avea ma Sui Tauva, pe te’ena fo’i lana talosaga pe afai e le’o fa’amalieina aiaiga o le Tulafono o Faiga Palota.
“Afai ae leai se malosi’aga i le Komesina o Faiga Palota na te faia ai se fa’ai’uga e tusa o iloiloga ma su’esu’ega i pepa ua tu’uina atu e lea Sui Tauva, o lona uiga, o se Faiga Palota e leai sona tāua i le vaai lautele a tagata.”
“O le isi itu e tatau ona silafia e le atunuu, e lē fa’apea e vaai atu lava le Komesina o Faiga Palota ma le Ofisa nei, e le’o fa’amalieina aiaiga e avea ai ma se Sui Tauva, ae le faia ai lava se fa’ai’uga, ma o le agasala lena i luma o le Atua, pe afai ae leai se galuega ai matou nei e faia i ai, a’o lea e matilatila le fa’aletonu.”
Mo le silafia, o lo’o manino lava i le fa’amalamalamaina e le Komesina o Faiga Palota, afai ae le fa’amalieina se Sui Tauva i le fa’ai’uga ua faia e le Komesina o Faiga Palota, o lo’o i ai le avanoa i le Fa’amasinoga e fesiligia ai le amiotonu ma le fa’amaoni o le Komesina ma le Ofisa o Faiga Palota e tusa ai ma le fa’ai’uga ua faia.
Fa’ailoa e Faimalomatumua o le malosi’aga fa’aletulafono e o fa’atasi ma le agava’a o le tofiga Komesina o Faiga Palota ma le Ofisa o Faiga Palota mo le iloiloina o ia tofiga, o lona uiga e fesuisuia’i tagata e tauaveina le tofiga Komesina o Faiga Palota a’o le malosi’aga fa’aletulafono e tumau pea, e pei ona aiaia i totonu o le Tulafono o Faiga Palota.
