FA’AFETAIA LE FESOASOANI A LE MALO MO AIGA SAMOA
Tusia: Taunuuga Toatasi
E ui i le tele o faitioga a nisi o le atunu’u e tusa o le fesoasoani a le Malo o lo’o fa’agasolo atu mo aiga i le taimi lenei, e le’o tu’ua ai le galuega fesoasoani a le Malo mo aiga uma o le atunu’u.
O le masina lenei o Oketopa e fa’amae’a ai le tu’uina atu o le fesoasoani a le Malo, o ta’i $50 tala lea e maua e tagata ta’ito’atasi o le atunu’u e fesoasoani ai i le tausiga o aiga ma fanau, ona o a’afiaga o le Koviti – 19.
O nei fesoasoani a le Malo, ua fa’aalia ai e nisi lo latou tete’e ona o latou manatu e fa’apea, o nei tupe o le fa’atosina lea a le Malo i le faiga palota.
O nisi o manatu e fa’apea, o faiga fa’apolokiki nei ua fai e le Malo, ma o le auala foi lea a le tiapolo.
Peita’i, mo le tamā ia Aiono Lepale Fafitu, 73 tausaga o le afioaga o Vailoa Aleipata, sa ia fa’aalia lona agaga fa’afetai tele i le Malo, ona o nei fesoasoani le aumaua ua fa’amanuiaina ai aiga o le atunu’u.
“E iloa gofie lava tagata e le’o fiafia i le faigamalo o lo’o i ai nei, e sau ai le ituaiga manatu nei, e fa’aseseina ai manatu o le atunu’u.
“O lea ua tatou va’ava’ai i a’afiaga o le koviti 19 i atunu’u i fafo, mautinoa e i ai aiga ua a’afia le tupe maua mai nai fanau ma aiga i atunu’u i fafo, ona o le fa’ama’i lenei.
“E i ai foi nisi o tatou tagata, ua leai ni galuega, aemaise lava i nai fanau sa galulue i le vaega o lo o atia’e ai le itu tau i tulisi.
“O lea ua tatou tilotilo, ua tapunia malae va’alele fa’avaomalo, ua leai foi ni tagata tafafao e asia Samoa ma fa’aaoga auaunaga o lo o ofoina atu e i latou o lo o galulue i lea vaega, ma leai ai ma ni seleni e totogi ai tagata faigaluega.
“A tu’u mai fo’i i tagata o le tatou atunu’u e aga’i e fa’aaoga auaunaga nei, atonu e maua sina tupe e fa’agaioioi ai le pisinisi, ae le taitai gafatia ai le agai i luma o le pisinisi.
“Ae fa’afetai tele i le Malo, o lea e maua mai sia fesoasoani e tausi ai tatou aiga ma ave ai nai fanau i le aoga.”
“E le’o toe tutusa uma aiga i le taimi lenei, ae a tatou mafaufau foi, e galulue le Malo, e tatau foi ona galulue tatou.
Na saunoa Aiono e fa’apea, o ituaiga manatu ia e fa’aalia e nisi e fa’apea o fa’atosina ma auala a le tiapolo, o latou ia manatu, ae leo le finagalo lea o le Atua.
“Tilotilo fo’i i le tele o atinae e fa’atino e le Malo, ae leiloa po’o fea e sau ai ia ituaiga manatu fa’apea, e fa’aseseina ai manatu o tagata lautele.
“O le taimi lenei e tautala galuega, ua silasila Samoa i le tele o galuega ma atinae a le Malo ua tino mai. Aisea? E mo le atunu’u atoa. E mo alo ma fanau a Samoa i le lumanai.
“E le’o fa’atinoa e le Malo nei atina’e mo le taimi lenei, o le aga’i i luma lea o lo o silasila i ai le Malo, i le manuia o tagata lautele.
“Aua tatou te fa’aseseina mafaufau o le atunu’u i manatu e leai ni fa’amaoniga, ona e ta’ita’iina sese ai tagata.
“Ia tatou nofo tatalo, tatou te fa’anōnōmanū i le Atua, o Ia fo’i tatou te maua ai le tali o mea uma, ae aua tatou te so’ona lafo ni fa’amatalaga ona o lo o silasila le atunu’u, o lea tatou te molimauina uma galuega o lo o fa’atino e le Malo.
E fa’apea foi se lagona mai le tamā ia Muagututia Siaosi, 69 tausaga le matua mai Fogāsavaii ma Falelauniu.
“Afai lava o le fesoasoani a le Malo, e mo le mamalu lautele o le atunu’u ona o a’afiaga o le Koviti – 19, tatou te talia ma le agaga fa’afetai.
Ua tatou malamalama uma i le tulaga e pei ona fa’aali ai manatu o nisi o le atunu’u, ona o le vaitau lenei, i le tele o fa’atosina o le faiga palota, ae a malamalama lelei le atunu’u i le fa’apogai o lenei fesoasoani, atonu e leai se mea o le a a’afia ai fua fesoasoani a le Malo o lo o fa’asafua mai, o le fa’aopoopo lea a Muagututia.
“E tonu lava le tagata i ona lagona ma ona manatu, ona o lea tatou te molimauina galuega ma atinae a le Malo o lo o fa’atino mo le manuia o le atunu’u lautele.
“E le mafai fo’i e se manatu o se to’atasi, ona sui ai fua manatu o nisi o le mamalu o le atunu’u o lo o latou silafia lelei le tele ma le anoanoa’i o fa’amanuiaga o lo o maua atu i le Malo.
“O lea ua tatou molimauina, o le fesoasoani lea e maua atu i le Malo, e mo tagata uma, e o’o lava i le pepe fa’atoa fanau mai, o lo o maua lea fesoasoani.
“O se fesoasoani taua tele mo Samoa, auā e leai se isi e tele ni ana tupe e tausi ai lona aiga, a le aunoa ma le toa’aga e fai le ma’umaga, e le a’ai foi le aiga.
Ae tatou tatalo, o le a lava le tali e aumai e le Atua o lenā, auā na o le Atua lava na te silafia mea uma o lo o tatou faia i lenei lalolagi le tumau, ae tu’u le tagata ia e fai ona mafaufauga, atonu se aso galue iai le agaga o le Atua.
