FA’ATĀUA LOU VALAAUINA FA’AFAIAOGA; LOAU
Tusia :Taunuuga Toatasi
O so’o se valaauina lava e mai le Atua e o’o lava i le tofia e avea ma faiaoga, o le tofiga mai le Atua.
O le Aso Sa 1 Oketopa 2020, o le aso lea na pa’ū i ai le aso fa’apitoa mo faiaoga uma o le lalolagi e pei foi ona fa’amanatu i Samoa nei.
O le manulauti o le Aso Faiaoga 2020 “O FAIAOGA E FAATONU FOLAU I ASO FITĀ : TOE FUATA’I LE LUMANAI.
Sa fa’atautaia ai se sauniga lotu i le Falesamoa o le Pulega o Tagata Tafafao Maimoa mai Fafo, e toe tomanatu ai i le taua o le tautua a faiaoga uma o Samoa.
E le gata la o faiaoga o lo o galulue i le taimi nei, a o faiaoga fo’i ua litaea fa’apea i latou sa amataina le galuega faiaoga ua fai i lagi le folauga.
O le susuga i le fa’afeagaiga ia Rev. Falaniko Sio (FS) sa ta’ita’ia le sauniga lotu, a o le Minisita o Aoga, Ta’aloga ma Aganu’u, Loau Solamalemalo Keneti Sio, na saunoa i le saunoaga autu o le aso.
I le saunoaga a Loau na ia toe fa’apupula ai faiaoga uma o Samoa ina ia fa’ataua lona valaauina.
“O le galuega fa’afaiaoga, o se galuega taua tele.”
“O se aso tatou te fa’amanatu ai le galuega a faiaoga ma le latou tautua i totonu o Samoa.
O se aso foi na saunoa le Minisita, e toe tomanatu ai faiaoga, po’o le a se auaunaga sa fa’atino.
Na saunoa foi Loau e fa’apea, e o’o mai i le taimi nei, e na te manatua lava faiaoga sa aoga ai i tausaga ua tuana’i, mai lava i le vasega laiti e o’o i vasega maualuga.
Na fa’atusaina e le Minisita le galuega a faiaoga i le tala o lo o i totonu o le Tusi Paia, o le tovine ma lana fa’atoaga i le fua mai lea o le tovine ini fua lelei.
O le matimatiga o le galuega fa’afaiaoga e pei ona saunoa Loau, o lona naunautaiga ina ia galulue faiaoga i se galue e mafai ona fua mai ai alo ma fanau o lo o latou a’oa’oina i ni fua lelei.
“E lē mafai e se fua lelei o le laau ona fua mai se fua leaga, e le mafai foi e le laau leaga ona fua mai ni fua lelei.
O se fa’atusatusaga lea a le Minisita, e fa’atusa ai le galuega a faiaoga, ina ia mafai ona mataitu e le faiaoga, le aanoa o lana galuega, ina ia mafai ona fua mai le galuega lea e galue ai.
“E le tutusa uma faiaoga. E tofu foi le tamaititi ma ona mafaufauga e manatua ai lana faiaoga sa a’oa’oina ia.
“O le isi tamaititi e manatua lana faiaoga, i le taumafai e a’oa’o ina ia poto ma atamai. O le isi tamaititi e manatua lana faiaoga i le sauā o lana faiaoga.”
“O le agaga moni, o le fa’ataua e le faiaoga o ia lava, fa’ataua lau galuega, fa’ataua lou tagata.”
O le ala foi lea ua aga’i ai le Matagaluega e pei ona saunoa Loau, e fa’atu se Fono Aoao a Faiaoga, ina ia apoapo uma mai ai faiaoga, e le gata o faiaoga i totonu o le Malo, faiaoga mai aoga tumaoti, faiaoga a ekalesia, ina ia maua le a’anoa o faiaoga, ma ia mataitu tomai o faiaoga, auā e le tutusa uma faiaoga.
O le auga foi lea o lo o taumafai ai le Matagaluega ina ia tapu’e le tomai ma agava’a o faiaoga, aemaise lava i latou fa’atoa fa’au’u mai le Iunivesite Aoao o Samoa, ina ia atoatoa le fa’afoega o le galuega fa’afaiaoga.
“E manatua o aso ua tuana’i sa amata mai le tusipasi, so’o mai ai ma le fa’ailoga tipiloma, a o le taimi lenei, o lea ua fai le fa’ailoga tikeri, o lona uiga ua tolu sitepu lea ua aga’i i ai faiaoga, ma ua eseese uma vaega poo level lea ua o’o iai le malamalama o faiaoga.”
A o le fesili tele e pei ona saunoa Loau, po’o o’o le fa’ailoga tikeri lea i mafaufau o alo ma fanau i le fa’atinoga o le galuega a faiaoga?
“O le vaega lea o lo o tulimata’i e le Matagaluega, ina ia mautinoa o lo o lelei ma atoatoa le fa’atinoga o le galuega a faiaoga mo le a’oa’oina o fanau a Samoa.
