E MOLIA I LE TULAFONO PE A LĒ RESITALA
Tusia: Tusiga Taofiga
E lē toe i ai se isi avanoa mo so’o se tasi ua ausia le 21 tausaga aga’i luga, e toe resitala ai mo le Palota Tele i le tausaga fou, pe a mae’a lea galuega resitala i le Aso Tofi nei, 08 Oketopa 2020.
Ua fa’amaonia mai e le Komesina o Faiga Palota, Faimalomatumua Mathew Lemisio, ua fa’ai’ui’u le galuega sa feagai ma le Ofisa, o le resitalaina lea o suafa o i latou ua ausia le 21 tausaga aga’i luga auā le Palota Tele i le tausaga fou.
Ua i ai le fuafuaga a le Ofisa o Faiga Palota, a tapunia le avanoa mo tagata resitala, ona se’e lea o le Ofisa, e iloilo uma lola palota ta’itasi, ma amata loa su’esu’ega mo le fa’amautuina o suafa o i latou ua maliliu po’o ua malaga fo’i i atunuu i fafo e nonofomau ai.
O le ala lea na talosagaina ai e le Ofisa o Faiga Palota, Faipule uma o le Palemene, ina ia fa’amautu atu i lola palota a o latou Itumalo, suafa o e ua maliliu.
“O lona uiga, o i latou lava ua ausia le 21 tausaga ae le’i resitala, ma fa’amautuina fo’i e le’i maliliu, pe le’o malaga fo’i i atunuu i fafo, o i latou na, o le a a’afia i aulape o le tulafono o Faiga Palota, ma molia loa.”
O lo’o i ai fo’i le fa’amoemoe o le Komesina o Faiga Palota, afai ae vave mae’a iloiloga ma su’esu’ega a le Ofisa mo i latou ua resitala ma ē e le’i resitala, ona fa’agasolo lea o aulape o le tulafono i e e le’i resitala a’o lumana’i ai le Palota Tele o le tausaga.
Peita’i a o’o i le Palota Tele e le’i mae’a lava iloiloga, o lona uiga o le a telē le taimi i le uma ai o le Palota, e fa’atino ai aulape o le Tulafono o Faiga Palota, mo le moliaina o i latou e le’i resitala.
