AIAIGA O MONOTAGA A SUI TAUVA
Tusia: Tusiga Taofiga
O fetu’una’iga fou i Monotaga Fa’amatai mo se Sui Tauva, ua fa’amanino e le Ofisa o Faiga Palota e muta lea suiga i le Palota Tele o le tausaga fou (natural death).
Ua pasia e le Fono Aoao Faitulafono Teuteuga o Faiga Palota, e agava’a ai Sui e fia tausinio i le Palota Tele 2021 ae le’i atoa le tolu tausaga o le monotaga i le matai o lo’o fia tauva ai.
Fa’ailoa e le Komesina o Faiga Palota, Faimalomatumua Mathew Lemisio e fa’apea, e tolu ituaiga Itumalo o lo’o a’afia i lenei suiga.
O Itumalo Palota Tu Taulaga, o Sui Tauva e le’i atoa le tolu tausaga o le Monotaga i le Matai o le a tausinio ai i le Palota Tele, o lo’o manino i totonu o le Tulafono o Faiga Palota, e mafai ona aumai sau monotaga tolu tausaga soso’o i se isi ou suafa matai o lo’o e tautua ai, i se isi nu’u i totonu o Samoa e fa’amalieina ai manaoga o le Tulafono.
O Itumalo Palota ua vavae ‘ese ai isi nu’u, so’o se Sui Tauva e tauva i le Palota i le Itumalo fou ua i ai nei, ae le’i atoa le tolu tausaga soso’o o lana monotaga sa fa’atino i lea nu’u o le a tauva ai, o lona uiga e mafai ona fa’aāoga mai lau monotaga mai lou suafa matai i le nu’u ua vavae ‘ese mai le Itumalo sa i ai muamua, e fa’amalie ai aiaiga o le Tulafono i lou matai e le’i atoa le 3 tausaga o le monotaga.
Mo le silafia, e lē fa’atagaina i le Tulafono, lou taumafai e tu’ufa’atasi le tasi o le tausaga o le isi monotaga i le isi matai ma le lua tausaga o lau monotaga i le isi ou matai e fa’aatoa ai le tolu tausaga o lau monotaga.
E lē talia fo’i i ia teuteuga fou, ni monotaga e ta’i tausaga ma va va.
Fa’ailoa e Faimalomatumua, o le agaga atoa o lenei teuteuga ia fa’amalieina ai fetu’uana’iga o Itumalo Palota e pei ona vaevaeina ai i le taimi nei, ma e mae’a loa le Palota Tele i le tausaga fou, ona toe fo’i lava lea o le Tulafono i le tulaga sa masani ai, o lou suafa matai lava e te tauva ai, e tatau fo’i ona atoa le tolu tausaga o lau tautua fa’amonotaga.
