AIAIGA MO SUI TAUVA MA LE KOVITI – 19
Tusia: Tusiga Taofiga
O so’o se tasi o fuafua e fia tauva i le Palota Tele 2021, ae o lo’o taofia i atunuu i fafo ona o le Koviti – 19, ua fa’ata’oto e le Ofisa o Faiga Palota le teuteuga fou, e mafai ai ona tauva i latou nei.
I le mae’a ai ona pasia e le Palemene lea teuteuga, ua manino ai, e mafai ona tusi mai le sa malaga atu i ni fonotaga po’o nisi fa’amoemoega fa’aleaiga i atunuu i fafo, a ua taofia ai ona o le Koviti – 19, ma fa’ailoa mai i le Ofisa o Faiga Palota lana maliega e avea ai se tasi o lona aiga o lo’o i Samoa nei, e fa’agaioi pepa mo’omia mo le fa’auluina o lona suafa o se Sui Tauva mo le Palota Tele o le tausaga fou.
Saunoa le Komesina o Faiga Palota, Faimalomatumua Mathew Lemisio e fa’apea, e i ai fo’i pepa fa’atumu e lua, e tu’uina atu i le sui fa’atuatuaina o lea Sui Tauva, mo le lafoina atu i ‘ai latou nei, e fa’atumu mai ma saini ai se Loia o i ai i lea Malo, e fa’amaonia ai le mafua’aga ua taofia ai i lea atunuu, aemaise o le mautinoa o lo’o nofomau i Samoa nei.
O lea Sui Tauva, na fa’ailoa e Faimalomatumua e tatau ona fa’amalieina uma aiaiga o Faiga Palota e ala i le monotaga fa’alenu’u.
Peita’i e i ai le malosi’aga i le Ofisa o Faiga Palota, e fa’alēaogāina ai so’o se Sui Tauva ua mae’a resitala, pe afai ua toe 14 Aso a’o lumana’i ai le Palota, ae le’i toe taliu mai i Samoa.
Ua faia lea teuteuga fa’afuase’i mo le Tulafono o Faiga Palota, ona o le tulaga o i ai le lalolagi i ona a’afiaga ona o le fa’ama’i oti, le Koviti – 19.
Na fa’ailoa fo’i e le Komesina e na’o le Palota Tele o le tausaga fou, o le a mafai ona fa’atino ai lenei aiaiga fou.
