A FA’ALETONU LE GATAIFALE UA LEAI SE PALOLO
Tusia: Taunuuga Toatasi
A tumau le fia taumamafa o le atunuu i palolo, o le fautuaga malosi a le Matagaluega o Faigafaiva ia tausia lelei le gataifale, ma ‘aua le fa’aleagaina amu.
O le feau taumolimoli lea mai le Matagaluega o Faigafaiva (MAF), e pei ona saunoa i ai le Ofisa Sili Lagolago o Pulega, ia Magele Etuati Ropati i le feiloa’iga ma le Savali.
O le matāfaioi a tagata uma, o le tausia lelei lea o le gataifale, vaai amu ma aau e fa’asao lelei ai pe afai e fia taumamafa pea i le palolo.
O le vaiaso ua mavae, sa ta ai le palolo i nisi o afio’aga i Upolu ma Savaii, e pei ona masani ai i tausaga ta’itasi.
O se tasi lea o maoi o le to’atele o le palolo, a’o le fautuaga a le Ofisa o Faigafaiva, ina ia fa’atumauina lava le maua o le palolo mo le fofoga taumafa o le atunu’u.
O le fa’amalosiau a le Ofisa ina ia tausia lelei le gataifale, ma ‘aua ne’i fa’aleagaina amu ma aau o lo’o ola ai le palolo.
“A fa’aleaga amu ua leai se palolo,” na saunoa i ai Magele.
“’Aua le fa’aleagaina amu ma aau, pe afai e fia taumamafa pea i le palolo i tausaga uma.
“Ia a’oa’o a tatou fanau ina ia iloa le mea e ta’u o le palolo, ma le nofoaga e nofo ai, auā a iloa e le tamaititi, e mafai fo’i ona tausi e le tamaititi le gataifale.
“Afai e a’afia amu ma aau o le gataifale ona o suiga o le tau, ia taumafai tatou e puipui.
Afai e fa’aletonu le va’aiga o le lau’ele’ele, e tafia uma le pefu ma leaga o vai pāpa i le sami, ona le tigāina lea o le lau’ele’ele ae a’afia ai le sami, o le fa’aopoopo lea a Magele.
Na fa’aalia fo’i e Magele e fa’apea, e lē fa’ailogaina se afio’aga e ta ai le palolo.
“E ta le palolo ia Samoa atoa.
“O le mea e i ai amu e nofo ai le palolo.”
E afua ona aga’i nisi o afio’aga i va’a e ta palolo ai, ona o le mamao i tai o le aau, a’o afioaga e lata mai tai le aau, e aga’i atu lava ta’avale tutū ae aga’i e ta le palolo.
“Vagana lava le nu’u e pala e leai ni amu e leai fo’i se palolo e maua ai.”
“O le palolo o le meaola e nofo i totonu o amu, o mea e i ai amu e maua ai fo’i le palolo,”
O le taimi nei, o lo’o fa’agasolo pea polokalame a le Matagaluega e ala i le fa’asao i totonu o nu’u ma afio’aga.
O lea polokalame o lo’o fautuaina ai nu’u ma afio’aga ina ia fa’asao amu ma aloalo, ma o le tausaga e 1995, sa amata mai ai lea polokalame.
“O lea polokalame, ua tele afio’aga ua i ai a latou tusi ta’iala e ta’iala ai pe fa’apefea ona fa’aāoga o latou gataifale.
Fa’aālia e Magele e fa’apea, o le tausaga lenei sa fua le taina o le palolo i luga o foliga vaaia o le masina.
“O le matou vaai mamao na avatu i le lua vaiaso talu ai, ae le’i taina le palolo, e feololo atu se palolo e maua ia Novema nai lo Oketopa.”
“E lē mafai ona matou fa’apea atu i le atunu’u, o le afio’aga lea ua tetele ai le palolo, a’o le afio’aga lea o lo’o fa’aitiitia ai le palolo.
“Pau le mea, ia ‘aua ne’i aveesea le tāua o le palolo i le tatou agaifanua.
“Ua ‘ese le fa’atāua a tagata i le palolo i aso ua mavae ma aso nei. O aso ia a maua ua fa’apea e 50 ofu, a’o aso nei, a maua, ona fa’apea lea, e maua lava la’u $1,000.
“Ua tele ina fa’atāua le tupe, ae ua fa’atuatuana’i ai le tu ma le agaifanua, o le maua o ofu palolo ona aga’i lea o se tagata e asiasi i ona aiga ma ‘ave se ofu palolo.
A’o le feau tāua mo i tatou uma, ia fa’asao le gataifale ma tausia lelei amu ma aau, ina ia fa’atumauina ai pea le maua o le palolo ia Samoa i tausaga ta’itasi.
“O le feau fo’i lena mo tatou uma, o le tausi lelei o le gataifale, e le gata o le palolo ina ia fa’asaoina, a’o le ola lelei o le tele o i’a ma figota o lo’o fa’afailele ai i le sami, tatou te tua i ai i le lumana’i aemaise a tatou fanau mo a taeao.”
