120 SUI TAUVA MO LE HRPP
Tusia: Tusiga Taofiga
E ui na’o le 49 nofoa o le Palemene, peita’i e 120 Sui Tauva ua resitala mo le Vaega Fa’aupufai e Puipuia Aiā Tatau a Tagata (HRPP) e fia tausinio mo le Palota Tele i le tausaga fou 2021.
E 11 tama’ita’i ua mae’a resitala mo le Palota Tele i le fa’amalu a le Fa’afaletui a le HRPP.
O le to’atele o tamāli’i ua tusi aao e fia tautua mo Samoa e ala i le tofi Faipule i le fu’a a le HRPP, o le ata fa’aaliali lea, o le maualuga o le lagolago a le atunuu i le tautua matavela a lea fo’i Vaega Fa’aupufai ua silia i le 40 tausaga o tula’i mai e ta’ita’ia Samoa.
O nisi o Itumalo Fa’apalota, ua silia i le tolu aga’i le fitu Sui Tauva o le a tausinio i lalo o le fu’a a le Fa’afaletui a le HRPP, peita’i na tu’usa’o le saunoaga faufautua a le Ta’ita’i o le Fa’afaletui ia Tuila’epa Dr Sa’ilele Malielegaoi, ina ia toe liuliu le tofā ma sasa’a le uta mamao i Itumalo nei, pe tatau ona tapua’i isi.
O lona uiga, o le naunauta’iga i le HRPP, ina ia toe soālaupule Sui Tauva ua resitala, po’o ai e tatau ona tapua’i, auā o le to’atele o Sui o le Fa’afaletui i se Itumalo e tasi, o le a ta’ape ai le lagolagosua a le Itumalo, ma ono manumalo ai se Sui mai se isi Vaega Fa’aupufai, o lo’o la’ititi ana palota.
Fa’ailoa e Tuila’epa, e lē taofia le tauva uma o sui e to’afitu mai le HRPP i se Itumalo e tasi, ma o le aiātatau sa’oloto lena a le tagata lava ia, peita’i a tumau le vaai mamao ina ia toe tula’i mai le HRPP i le Palota Tele i le tausaga fou, o lona uiga o le soālaupule ma le uta fetala’i e maua ai Malo.
“E leai se afāina i Itumalo ia e ta’i 7 – 8 Sui a le HRPP ae leai se Sui mai se isi Fa’afaletui, o lona uiga, o uma pe lē o uma, e mautinoa lava e malo mai le Sui a le HRPP, peita’i a to’afitu 7 – 8 tatou ae tasi le Sui mai le isi Vaega, ona tatou iloa lea, e ono i ai le avanoa e faia’ina ai tatou, aisea?, o le a ta’ape le fa’atuatuaga a le Itumalo e ala i le Palota, ona maua ai lea o le avanoa e malo ai le Sui lea mai le isi Vaega sa itiiti lava palota na ia maua.”
“O lo’o telē le taimi, e avatu lava le avanoa ia te outou e soālaupule ai, ae lē mafai ona matou taofia lau aiātatau, e te filifili ai lava oe pe te alu pe leai, a’o le naunauta’iga i la tatou Vaega Fa’aupufai, ia ‘aua ne’i fa’aluafesasi le filifiliga a le atunuu, ona ua to’atele Sui o le HRPP i Itumalo ta’itasi.”
Mo le silafia o le vaiaso nei ua amata fa’agasolo le fa’auluina o suafa o Sui Tauva mo le Palota Tele, ae le’i mautinoa i le taimi nei, po’o afea o le a fa’alauiloa aloaia le anavatau a le Fa’afaletui a le HRPP, mo le aga’i atu i le Filifiliga Tele a le atunuu, i le tausaga fou.
