TAPUNIA TUMAU LE RESITALA MO TAGATA PALOTA
Tusia: Tusiga Taofiga
Ua fa’amaonia mai e le Komesina o le Ofisa o Faiga Palota, e le’o toe i ai se fuafuaga e toe fa’aopoopo nisi aso mo le resitalaina o i latou e le’i resitala auā le Palota Tele i le tausaga fou.
I le fa’ai’uga o le vaiaso ua mavae, na fa’alauiloa aloaia ai e le Ofisa o Faiga Palota i lana fa’asilasilaga fa’alaua’itele, le tapunia aloaia ai o le resitalaina o i latou ua atoa le 21 tausaga aga’i luga, auā le Faiga Filifiliga tele a le atunuu.
“E tusa ai ma le Vaega 13 (7) o le Tulafono o Faiga Palota 2019, e fa’ailoa atu ai ua tapunia nei le Resitalaina o Tagata Palota fa’atasi ai ma Palota Liliu.”
“Fa’amolemole e fautua atu le mamalu o le atunu’u e lē taliaina ni talosaga fa’apea foi ni pepa fa’amaonia i le OEC Facebook Page.”
Ma o le solitulafono le solia o lea Vaega o le Tulafono o Faiga Palota.
Mo le silafia, sa fa’agasolo le galuega tele a le Ofisa o Faiga Palota, mai lava i le mae’a ai o le Palota Tele a le atunuu i le 2016, auā le toe resitalaina o i latou ua atoa le 21 tausaga le matutua ma e ua toe fia liliu le palota.
E le gata fo’i i lea, ae sa aga’i fo’i le Ofisa i Nu’u ma savalia aiga ta’itasi, i le naunauta’iga atoa ia fa’afaigofie i tagata palota, ona aga’i ane e resitala.
Na fesiligia se finagalo o le Ta’ita’i o le Malo, pe o i ai se tofā i le Kapeneta pe le toe tatala se isi masina le resitala, peita’i na ia fa’ailoa manino, o le galuega tau resitala e mulimulitu’i i aso ma taimi ua fa’atulafonoina i totonu o le Tulafono o Faiga Palota.
“O lona lave, e leai lava se ‘ese’esega o le resitala ma le taimi sa amata tapuni ai tatou faleoloa i le fitu i afiafi o aso To’ona’i, na faitio nisi ua tumutumu afiafi i le vave tapuni o faleoloa.”
“A’o le mea ua tupu, e fa’atalitali lava o tatou tagata, se’ia o’o i le taimi mulimuli la tapuni ai auaunaga nei, ona fa’atoā tumutumu atu lea, ma tupu ai le feoma’i.”
“Na talosaga mai nisi pe le talafeagai le toe fa’aopoopo atu o itula e tatala ai faleoloa, o le manatu a le Kapeneta, lona uiga a toe tatala fo’i se’ia tapunia i le iva i le po, o lona uiga e toe faitio fo’i ma talosaga e tu’u atu i le 11 i le po.”
“O uiga masani lava ia i o tatou tagata, e fa’atalitali se’ia fa’ai’ui’u se fa’amoemoe ona fa’atoā tumutumu lea i ai, o le i si Vaega sa ou maitauina, na fa’atalitali le to’atele o tagata i Sui Tauva mo le pikiina mai o latou ma momoli i fale resitala.”
“O lona uiga afai lava ua mae’a le aso e fa’amuta ai resitala, o ai lava i latou sa resitala, ua lava i latou na e palota, a’o se a’oa’oga tāua lea mo tagatanu’u Samoa i le lumana’i, ‘aua le fa’atalitali i le taimi mulimuli, ‘aua fo’i le fa’alagolago i se isi, a ia tula’i ma ta’imua e fai lau resitala ma e palota.”
O lo’o aiaia i le Tulafono o Faiga Palota, so’o se tasi e lē resitala, o le a fa’asalaina i le sala tupe e $2,000.
