$2.5 MILIONA LE FALE GAOSI OLOA FOU A LE SROS
Tusia: Tusiga Taofiga
O le masina o Mati o le tausaga fou, ua fuafua e tatau ona mae’a ai le fausiaina o le Fale Gaosi Oloa Fou a le Fa’alapotopotoga o Su’esu’ega Fa’asaienisi a Samoa (SROS).
O ananafi na suatia ai le ‘ele’ele, mo le amatalia o lea galuega tele, e tusa lona tau ma le $2.5 miliona sa fa’atupeina e le Malo Samoa.
O lenei fale gaosi oloa fou, o le a mafai ona fa’ataunu’u ai le moemitiga a le Malo i le tele o tausaga ua mavae, e ala i le gaosia o ni oloa ua mae’a su’esu’eina e le SROS, e mafai ona gaosi mai ai nisi oloa mo le maketiina atu i atunuu i fafo auā se seleni maua.
Saunoa le Ofisa Sili o le SROS ia Dr. Seuseu Tauati e fa’apea, o lenei galuega tele o le a mafai ona fa’ataunu’u ai le gaosiga o le tele o oloa sa mafaufauina e le Fa’alapotopotoga, e i ai le Whiskey, fagu fa’amamā lima ma isi, ae tusia ai le igoa o Samoa, ma le fa’amoemoe ia tu’uina atu mo fefa’ataua’iga fa’avaomalo i atunuu i fafo.
“Ua mae’a taimi o su’esu’ega a le Ofisa nei, o le taimi nei o le fa’atino, ae fa’alagolago lena fa’atinoga i le fale gaosi oloa lenei pe a tino mai.”
“A mae’a ona fausia lenei fale tele, ona aumai lea o masini fa’apitoa e fa’atau mai Amerika ma Siāmani auā le gaosia o tatou oloa.”
“Afai e i ai sau fa’ato’aga, lafumanu, ma isi ae o lo’o e naunau ina ia su’esu’e pe le ono maua ai se oloa fou e gaosi atu i Samoa mo fefa’ataua’iga fa’avaomalo, e tatau ona e resitala muamua i la matou Fa’alapotopotoga, auā afai ae te lē resitala ae e sau aumai fa’amalosi au talo o lona uiga matou te lē taliaina.”
Saunoa le Palemia, Tuila’epa Dr Sa’ilele Malielegaoi, o le fa’atuina ai o lea fale gaosi oloa fou, o le pine fa’amau lea, o le tumatila o le naunauta’iga a le Malo, ia tele a tatou oloa gaosi e ta’u ai Samoa mo maketi fa’avaomalo.
E le gata i lea, a’o le tali fa’aaliali lea i le lalolagi atoa, e le’o oge Samoa i taumafa.
