$1 MILIONA LE TUPE FA’ASAO A LE NUS MAI LE ELETISE
Tusia: Tusiga Taofiga
Ua i ai le fuafuaga a le Iunivesite Aoao a Samoa (NUS), ina ia 100% atoatoa le fa’aāogaina o le Eletise mai le malosi’aga fa’afouina o le la (Solar Power).
O lea taumafaiga, o le silasila mamao a le Iunivesite, ina ia fa’asaoina mai le $1 miliona o lana paketi i tausaga ta’itasi o lo’o fa’aalu mo le eletise i le taimi nei.
Saunoa le Pule Sili o le NUS, ia Aiono Dr Alec Ekeroma e fa’apea, e $78,000 le tau atoa o le eletise mo le Iunivesite i le masina e tasi, tusa lea ma le $1 miliona i le tausaga atoa.
O lona uiga, o le 28% o le paketi atoa e $26 miliona a le NUS, o lo’o fa’aaluina mo na’o le eletise.
O le taumafai ai o le Iunivesite ina ia fa’aitiitia le tupe alu mo le eletise aemaise o le fa’aitiitia o le fa’aāogaina o le eletise mai le suāu’u ona o a’afiaga o fesuia’iga ogaoga ma le mata’utia o le tau, ua o gatasi lea ma le fuafuaga autasi a le Malo Samoa, ina ia o’o atu i le 2025 ua 100% atoatoa le fa’aāogaina e Samoa o le eletise fa’afouina mai le malosi’aga o le la.
Ua o gatasi lea manatu ma le fa’ai’uga a le NUS, ia tapē uma molī ma ea malulū i Aso Faraile uma, e fesoasoani ai i galuega lelei, mo le puipuia o Samoa ma le lalolagi atoa i suiga ogaoga o le tau.
Na folasia aloaia e Aiono i luma o le laulauafono a le Komiti o Atina’e a le Kapeneta (CDC), le talosaga a le Iunivesite, mo se vaegatupe tusa lea ma le $3 miliona e fa’atau ma fa’apipi’i ai nei masini fa’apitoa i totonu o le 2 – 3 tausaga ma fa’aola loa le eletise mai le malosi’aga o le la.
Fa’ailoa e le Pule Sili, e ui e le tasi se tausaga e fa’atino ai lea fuafuaga, ae o le naunauta’iga atoa o le Iunivesite, ia fa’asaoina lea $1 miliona o se tupe tele, e fa’aāoga i isi polokalame fa’aauau a le Iunivesite Aoao mo fanau a le atunuu.
O lo’o i ai fo’i fanau i le NUS i polokalame tau Matāta ‘Ese’ese (TVET), e i ai lo latou tomai fa’apitoa i le fa’apipi’iina o nei vaega mo le eletise mai le la, e saga fa’aitiitia ai lava le tupe alu mo le fa’apipi’ina o nei masini fa’apitoa.
O lona uiga, e 50% mai le $1 miliona tupe fa’aalu i tausaga ta’itasi mo le eletise, o le a fa’asaoina mai auā nisi galuega fa’atino a le Iunivesite Aoao a Samoa.
