TA’IMUA SAMOA I LE ULUA’I OFISA AUTU MO LE NEOC
Tusia: Tusiga Taofiga
Ua mae’a fausia le Ofisa Autu Tutotonu Fou a le Ofisa o Fa’alavelave Tutupu Fa’afuase’i (NEOC) e pei ona fa’atupeina i le foa’i fua a le Faletupe o le Lalolagi, e lona tau e $6.4 miliona tala Samoa.
O lenei galuega tele, e 14 masina sa fausia ai, ma o lo’o i ai se tane tele e 10,000 lita lona telē, o le afi eletise fa’aleoleo (backup generator) ma le fale teu oloa tele e fa’aagaga mo aso e a’afia ai le atunuu i ni mala fa’alenatura po’o ni fa’alavelave tutupu fa’afuase’i e pei ona i ai le Koviti – 19.
Mo le silafia, o Samoa le ulua’i atunuu o le Pasefika, ua mafai ona ia fausia lenei Ofisa Autu fa’apitoa, e ui e tele atunu’u o le Pasefika na taumafai ina ia fausia se ofisa fa’apea, ua fa’atotogaina atoatoa i masini fa’apitoa e fitoitonu i galuega fesoasoani mo fa’alavealave fa’afuase’i peita’i e le’i manuia ia fuafuaga.
Saunoa le Palemia, Tuila’epa Dr Sa’ilele Malielegaoi e fa’apea, o lenei galuega o le a mafai ona atoatoa ai tapenaga a Samoa, e tali atu ai i taimi o fa’alavelave fa’afuase’i e aofia ai le misela ma le Koviti – 19.
O le i ai o lenei auaunaga, o le a tapuvaetasi uma i ai galuega fesoasoani a le Malo, mo so’o se fa’alavelave fa’afuase’i e tula’i mai.
Fa’ailoa e Tuila’epa o le Ofisa lenei, o le a galulue 24 itula i le aso e tautua ai i le atunuu pe a a’afia i ni fa’alavelave fa’afuase’i.
O lenei galuega tele sa galulue fa’atasi le Matagaluega o Punaoa Fa’alenatura ma le Si’osi’omaga (MNRE), Matagaluega o Tupe (MOF) ma le Matagaluega o Galuega, Felaua’iga ma Atina’e Tetele (MWTI).
