PUIPUIGA MALU A VAILELE TAI MO LE AO O LE MALO
Tusia: Taunuuga Toatasi
O le tofā ua leva ona ta’oto i ali’i ma faipule o le Afio’aga o Vailele Tai, auā le puipuiga malu ma le saogālemu o lana Afioga i le Ao Mamalu o le Malo Tuto’atasi o Samoa, Afioga Tuimaleali’ifano Va’aletoa Sualauvi II ma lana Masiofo.
O le vaiaso ua mavae na savalia ai e le Pulega mamalu a ali’i ma faipule o lea afio’aga, le Maota o lana Afioga i le Ao Mamalu o le Malo i Vailele Tai, ma fa’ailoa i lana Afioga le tofā ua tasi moemoe i ai le Saofa’iga a Matai, e tusa ai ma le puipuiga malu a le Afio’aga i le saogālemu ma le nofo lelei o lana Afioga, a’o feagai ai ma lona valaauina i lona Maota i Vailele Tai.
Fa’ailoa e le Sui o le Afio’aga, Afioga ia Togia Amiga Fa’amoe i le feiloa’iga ma le Savali, o le tu lea ma le aga e masani ai lona nu’u mai lava i le amataga, sa aofia ai fo’i ma Ao le Malo ua mavae.
E le gata o le malu puipuia o lana Afioga i le Ao o le Malo, Masiofo ma lona aiga, a’o le vaaia lelei o lo la fanua, ma lona Maota, ‘ina ne’i satia e se tasi.
“O le pulega a ali’i ma faipule o le latou tiute lea, e le gata e malu ai lana Afioga i le Ao Mamalu o le Malo, ae fa’apea fo’i i tagata o le nu’u.
Saunoa Togia, sa fa’atino fo’i le tiute lea a alii ma faipule i le taimi a’o avea Tui Atua Tupua Tamasese Efi ma Ao o le Malo o Samoa i tausaga ua mavae.
“E lē fou ia matou le fa’atinoina o matou tiute mo le mata’ituina o le saogālemu o le nofoaga lea.”
“E ui o lo’o i ai Malu o le Malo e va’aia lea nofoaga ae lē taofia ai le afio’aga mai le fa’atinoga o ona tiute.
E o’o lava i le taimi a’o i ai pagota i totonu o le lotoā, sa le’i malōlo ai ali’i ma faipule, e mata’itu le malu puipuia ma le saogālemu o le Maota.
“O le ala fo’i lea na momoli mai ai le agaga fa’afetai o le Afioga i le Ao Mamalu o le Malo, ona o lea ua fa’ailoa le fa’amoemoe o le afio’aga.
“Afai fo’i e o’o i nisi tausaga ua ‘ese se isi e tu mai le tofi o le Ao o le Malo, e tumau pea le tiute o le nu’u nei o Vailele Tai, o la matou mau tauave, ia malu i fale le ua avea ma ta’iulu o le fa’auluuluga fo’i o lo tatou Malo Tuto’atasi.
Auā o upu a le atunu’u a malu i fale, e malu fo’i i fafo atu le puipuiga ma le vaaia lelei o lo tatou Ta’ita’i, lana Afioga i le Ao o le Malo.
O le o’o ai o le Afio’aga o Vailele Tai i le Maota o le Ao o le Malo, o le pine fa’amau lea, o le maualuga o le fa’aaloalo a lea Afio’aga i le amanaia o lana Afioga ma le Masiofo, o lo’o nofoia ‘ele’ele o lo latou nu’u ona o tiute fa’alemalo.
O le tali fa’aaliali fo’i lea, o le lagolagosua malosi a le Afio’aga o Vailele Tai i le fa’amoemoe a le Malo o lo’o taumafai nei, ina ia ta’imua le Pulega mamalu a ali’i ma faipule, e puipuia le nofolelei, saogālemu ma le fealofani o tagata uma.
