SOU MANATU!
E felanulaunua’i agava’a ma tomai o Sui Tauva ua resitala e tausinio mo le Palota Tele i le tausaga fou, peita’i na fesiligia se finagalo o le atunuu, po’o le a so latou silafia i nisi agava’a latou te iloa, e tatau ona fa’aopoopo i agava’a o so’o se Sui Tauva o lo’o tauva i le Palota, ina ia mautinoa le fa’amaoni ma le moni o ana taumafaiga mo le tausiga o lona Itumalo i le lima tausaga o lana nofoa’iga.
O le a sou finagalo, o a nisi agava’a e ‘ese mai agava’a o lo’o tusia i le taimi nei, e tatau ona ausia e so’o se Sui Tauva, e fia tausinio mo le Palota?
Malufau Fa’afetai Samoa
65 tausaga o Lauli’i / Matautu Falealili
E ‘ese le manaia o le fa’alogologo aemaise o le va’ai atu i polokalame fa’agasolo a nisi o leitio, televise ma nusipepa, i anavatau po’o sini autu a vaega fa’aupufai ua fa’ata’atitia mo le atina’e o Samoa pe a manuia taumafaiga i le Palota tele a le atunu’u.
Peita’i, i so’u lagona i nisi agava’a e tatau ona i Sui Tauva, ou te talitonu so’o se tagata tauva lava, e tausinio ae ua silafia ona agava’a. E leai ma se tagata tauva e alu fa’asamasamanoai le Palota, e tatau lava ona i ai ni ona agava’a e ta’ita’ia ai le Itumalo o lo’o tauva mai ai. I lo’u lagona, o agava’a o Sui Tauva, e na’o le Atua lava na te silafia mea uma. O le tatou Faiga Palota lea ua fuafua e fa’ataunu’u i le tausaga fou, a’o le taunu’uga o lea fa’amoemoe o le atunu’u, o le Atua na te fa’ataunu’uina.
Afai e silafia e le Atua o le Sui Tauva lea e alofa moni, e loto maualalo, e lē fa’ailoga tagata ma e fia tautua mo Samoa ma ona tagata, o le tali lava lena. So’o se Sui Tauva lava e ‘ese’ese uma tomai ma agava’a, ae tasi lava le tagata na te silafia le loto ma le agaga o le tagata, na’o le Atua. Auā e lē aoga le fai mai e alofa ma fia tautua i le Itumalo, ae uma le Palota ua manumalo, fa’asaga i sasa’e ae le ano mai i tagata na afua ai ona saofa’i i le nofoa o le Itumalo. Tatou tu’u i le Atua, o ia e maua ai le tali. Auā e leai se mea e lilo i le Atua, mai lava i le tino atoa ma le agaga. Afai o ai o le a manumalo i le faiga filifiliga, o le tali lena sa tatou nofo tatalo ai. Ae soia ia tatou te pisapisaō, ae nofo tatalo pea mo Samoa ma lona lumana’i.
SOU MANATU!
E felanulaunua’i agava’a ma tomai o Sui Tauva ua resitala e tausinio mo le Palota Tele i le tausaga fou, peita’i na fesiligia se finagalo o le atunuu, po’o le a so latou silafia i nisi agava’a latou te iloa, e tatau ona fa’aopoopo i agava’a o so’o se Sui Tauva o lo’o tauva i le Palota, ina ia mautinoa le fa’amaoni ma le moni o ana taumafaiga mo le tausiga o lona Itumalo i le lima tausaga o lana nofoa’iga.
O le a sou finagalo, o a nisi agava’a e ‘ese mai agava’a o lo’o tusia i le taimi nei, e tatau ona ausia e so’o se Sui Tauva, e fia tausinio mo le Palota?
Iona Mika
63 tausaga o Saleaaumua
So’o se Sui Tauva lava e sauni mo le Palota, ua leva ona ia silafia ona agava’a, ‘ese mai le monotaga, e i ai isi vaega e tatau ona agava’a ai sui. E le gata o le soifua maloloina i le tino ae fa’apea fo’i i le mafaufau. Auā afai e soifua maloloina le tino, o atina’e ma galuega na te faia mo le manuia o le Itumalo ma le atunu’u, e lelei ma atoatoa lona fa’ataunu’uina. E tatau fo’i i Sui Tauva ona saofagā mai le tulaga o soligātulafono. Auā e i ai lo’u talitonuga, e leai se mea e lilo i lalo o le la lenei. So’o se Samoa lava, e toeitiiti iloa e le isi le isi. E o’o fo’i i Sui Tauva sa aumau i atunu’u i fafo, e iloa uma lava e tagata mea uma. O lea ua tofu tagata ma telefoni fe’avea’i, ua i ai initaneti, e na’o le ki lava su’e ai lou igoa.
E laualuga uma nei mea i le fa’amaoni o le Sui Tauva. Afai e te fa’amaoni e te alofa i lou Itumalo lou aiga ma lou nu’u, e tatau ona fa’atino le mea e tatau ona fai, manū o i ai le taimi. Auā e pa loa le faga ua amata le tu’uga, e lē mafai ona e fa’apea ifo, toe fo’i mai e toe amata atu, e leai, e pa loa le faga, alu loa le tu’uga, o ai lava e uma ane le tu’uga o lo’o mua, o ia lava lena.
O tatou e na’o le fuafua ma tu’u atu i le Atua o tatou fa’amoemoega, a’o le fa’ataunu’uina o tatou mana’o, o lo’o i luma o le Atua. Ua silafia uma e le Atua loto ma mafaufau o tagata tauva. Afai lava o le a le fa’ai’uga o le tauvaga, tatou fa’afetai i le Atua, auā fai mai upu a le atunu’u e pei ona masani ai, ‘O oe nei a’o a’u taeao.”
SOU MANATU!
E felanulaunua’i agava’a ma tomai o Sui Tauva ua resitala e tausinio mo le Palota Tele i le tausaga fou, peita’i na fesiligia se finagalo o le atunuu, po’o le a so latou silafia i nisi agava’a latou te iloa, e tatau ona fa’aopoopo i agava’a o so’o se Sui Tauva o lo’o tauva i le Palota, ina ia mautinoa le fa’amaoni ma le moni o ana taumafaiga mo le tausiga o lona Itumalo i le lima tausaga o lana nofoa’iga.
O le a sou finagalo, o a nisi agava’a e ‘ese mai agava’a o lo’o tusia i le taimi nei, e tatau ona ausia e so’o se Sui Tauva, e fia tausinio mo le Palota?
Saumani Afaese
62 tausaga o Ululoloa
Atonu o se toe fa’amanatu lena, a’o se tu’ualalo fo’i mo nisi o Sui Tauva, ua mae’a ona resitala e tauva mo le Faiga Palota o le tausaga fou. O agava’a, e le tau sailia, po’o ai e agava’a, a’o ai e lē agava’a.
So’o se tagata lava e tausinio i le Palota, e mafua ona tauva, ona ua i ai le agava’a e tauva ai, ua ia mautinoa fo’i, o lo’o silafia lelei e lona Itumalo ona agava’a, aemaise o lana tautua o lo’o fa’atino i totonu o le Itumalo ma le nu’u. O tatou o tagata Samoa, e tofu lava le tagata ma le mea e agava’a ai. Ae a tu’u mai loa i upufai o Malo, ona tatou tilotilo lea i le isi la’asaga o le soifuaga o le tagata.
O le fa’amaoni o le Sui Tauva, tasi lea agava’a e pitosili ona tāua i so’o se tagata. Auā a fa’amaoni lou alofa i lou Itumalo, lou aiga ma lou nu’u, o le a manuia fo’i galuega e fa’atino pe a e pale mai i le tofi. Ae afai o i ai le lagona na’o upu lava ae leai se fa’atinoga, e ma’imau le taimi i tagata fa’apena, e i ai lo’u talitonuga, e le taitai manuia sana galuega, po’o lana nofoaiga. Ae faigata fo’i ona iloa pe manumalo, ona e na’o le Atua lava e silafia le mea o lo’o i ai le loto o Sui Tauva o le a tausinio i le Palota Tele a le atunu’u. Ua tatou iloa lelei le natura o tagata Samoa, e toeitiiti iloa e le isi Samoa agava’a o isi tagata Samoa, ae a fa’amaoni le Sui Tauva i ana folafolaga ma ana upu, e lē taitai ona sesē se fa’ai’uga a tagata e fa’atino ai le filifiliga. E i ai fo’i isi Sui, e i ai le manatu a tula’i mai le Faiga Palota, ona fa’aleleia lea o lona aiga, ae fa’atuatuana’i le Itumalo ma le nu’u, ae le’o le agaga lena na mafua ai ona tauva. E mafua ona tauva, o ia o le fofoga taumolimoli o aiga, nu’u ma le Itumalo i upufai o le Malo.
A ‘alo loa i le mafua’aga na filifilia ai, ona lē manuia lea o lana nofoa’iga. Ae tatou tau fai tatalo ma tu’u le fa’amoemoe o le tatou atunu’u i le Atua, o ai lava e pale mai i le faiga filifiliga a le atunu’u o le tali lena mai le Atua.
SOU MANATU!
E felanulaunua’i agava’a ma tomai o Sui Tauva ua resitala e tausinio mo le Palota Tele i le tausaga fou, peita’i na fesiligia se finagalo o le atunuu, po’o le a so latou silafia i nisi agava’a latou te iloa, e tatau ona fa’aopoopo i agava’a o so’o se Sui Tauva o lo’o tauva i le Palota, ina ia mautinoa le fa’amaoni ma le moni o ana taumafaiga mo le tausiga o lona Itumalo i le lima tausaga o lana nofoa’iga.
O le a sou finagalo, o a nisi agava’a e ‘ese mai agava’a o lo’o tusia i le taimi nei, e tatau ona ausia e so’o se Sui Tauva, e fia tausinio mo le Palota?
Mikaele Esau
50 tausaga o Toamua
E i ai lo’u talitonuga, o Sui Tauva uma o lo’o sauni mo le Palota Tele, o Sui ua lava le tomai ma le agava’a e fa’atino ai atina’e mo le lelei o aiga, nu’u ma Itumalo. E leai se Sui Tauva e i ai se manatu fa’apea, o ia e lē agava’a, auā e mafua ona alu i le palota, ona ua i ai lona agava’a e ta’ita’ia ai se Itumalo ma fai ma leo o tagata. ‘Ese mai la i agava’a ua masani ai tatou, e pei ona fa’afofoga Samoa, o lea ua folafola e Sui Tauva, o lona naunauta’iga ia lelei atina’e ma e fia tautua i le Itumalo ma ona tagata.
O tala lava nei ou te fa’alogo ai i so’o se Figa Palota. Ae o le agava’a e sili ona tāua i so’u lagona, o le talitonuina o le Sui Tauva. O se Sui Tauva sa tautua ma le fa’amaoni i totonu o le nuu ma le Itumalo. O se Sui Tauva e leai ni ana soligātulafono ma e soifua maloloina i le tino, agaga ma le mafaufau. O se Sui Tauva fo’i, e lē fa’ailoga tagata, ne’i mae’a ane le Faiga Palota ua manumalo, ona ‘ese lea o le faiga o tagata. Ona sa’o ai lea o le pese e masani ona ou fa’alogo i ai, o ai ua sisi a’o ai ua fafa, a’o ai ua fa’asavali ma totolo.
E salani nei mea uma i le alofa o so’o se Sui Tauva auā o nei mau folafolaga ma tala, fa’atoa tatou iloa le sa’o pe afai e taunu’u ona fa’atino. E leai se aogā e tala’i ai, a tula’i mai ona fai lea o le mea lea, fai le mea lea, ae a le taimi nei, aisea e le fa’atino ai le taimi lenei, o inā e iloa ai le moni ma fa’amaoni o folafolaga. Ae tatou tatalo ma tapua’i, o ai lava o le a filifilia e le Atua e fai ma leo o Itumalo i upufai a le atunuu, o le tali lena.
E leai fo’i se mea o le a tatou naunau ai e ‘ave lea sui ma lea sui, ae a fai e le’o le finagalo lea o le Atua, e ma’imau le taimi. Tatou te fai mea fa’alagolago uma i le mana fesoasoani mai o le Ali’i auā la tatou filifiliga, afai lava tatou te va’ai atu o le Sui Tauva lea e manuia ai le Itumalo ma le nu’u, aisea e faigata ai, afai lava o le tali lena ua tu’uina atu e le Atua i lou loto, fa’atino.
SOU MANATU!
E felanulaunua’i agava’a ma tomai o Sui Tauva ua resitala e tausinio mo le Palota Tele i le tausaga fou, peita’i na fesiligia se finagalo o le atunuu, po’o le a so latou silafia i nisi agava’a latou te iloa, e tatau ona fa’aopoopo i agava’a o so’o se Sui Tauva o lo’o tauva i le Palota, ina ia mautinoa le fa’amaoni ma le moni o ana taumafaiga mo le tausiga o lona Itumalo i le lima tausaga o lana nofoa’iga.
O le a sou finagalo, o a nisi agava’a e ‘ese mai agava’a o lo’o tusia i le taimi nei, e tatau ona ausia e so’o se Sui Tauva, e fia tausinio mo le Palota?
Sa’u Iese Sa’u Mo’o
64 tausaga o Apolima
I so’u taofi i agava’a o Sui Tauva mo le Faiga Palota, e i ai lo’u manatu, afai o Sui Tauva ia o lo’o naunau e tauva mo le lelei o le atunu’u, o lena. Ae afai o i ai se Sui Tauva o lo’o i ai le mafaufau ma le fa’amoemoe e tauva a manuia ona saofa’i lea ma sapai fa’amanuiaga na te maua e aunoa ma se atina’e e fai mo le Itumalo, e sili ona toe mafaufau tasi. Sa’ili po’o sa’o le mafua’aga e ala ai ona e tauva i le Faiga Palota.
O ai lava Sui Tauva e manuia ma manumalo mai le Faiga Filifiliga Tele a le atunu’u, e tatau ona tinoū e fa’atino atina’e ma mea e lelei ai le atunu’u. E leai se tulaga fa’apea, a e manumalo ona e tafao lea i le tofi, e le’o se tofi na tu’u atu e te tafao ai ma fai ai le mea e te loto i ai, o le tofi na avatu e te galue ai ma tautua ai le Itumalo ma le atunu’u. O ai e manuia i lau tautua, o le mafua’aga lena na tofia o oe e le Atua.
Manatua fo’i, o tofiga, o le Atua le tali. Afai e mae’a ane le Faiga Palota e ‘ese le Sui e tula’i mai, ‘ese le Sui sa e Palota ai, onosa’i ma tatou opogi le Sui ua manumalo, auā o lou loto e le’o le finagalo lea o le Atua. Ia tatou silafia fo’i, e ‘ese’ese uma tagata ma o latou tomai ma agava’a, auā faimai le isi upu, ‘aua e te fa’amasino atu se tagata i le va’aiga a ou mata. Silasila fo’i, afai e i ai ni Sui Tauva o lea e silafia e le atunu’u e taualoa, e i ai fo’i isi e lē taualoa, ia manatua, i luma o le silafaga a le Atua, e tutusa uma tagata.
A ia tatou tapua’i ma tatalo ia sao ma uli le fa’amoemoe o le atunu’u, maua ni Sui totoa ma le loto alofa, loto maualalo ae fa’amaoni e tula’i mai, e fa’atino atina’e mo le manuia lautele o le atunu’u.
SOU MANATU!
E felanulaunua’i agava’a ma tomai o Sui Tauva ua resitala e tausinio mo le Palota Tele i le tausaga fou, peita’i na fesiligia se finagalo o le atunuu, po’o le a so latou silafia i nisi agava’a latou te iloa, e tatau ona fa’aopoopo i agava’a o so’o se Sui Tauva o lo’o tauva i le Palota, ina ia mautinoa le fa’amaoni ma le moni o ana taumafaiga mo le tausiga o lona Itumalo i le lima tausaga o lana nofoa’iga.
O le a sou finagalo, o a nisi agava’a e ‘ese mai agava’a o lo’o tusia i le taimi nei, e tatau ona ausia e so’o se Sui Tauva, e fia tausinio mo le Palota?
Salome Masoe Tautogia
56 tausaga Nuu / Asau
Ua tatou fa’alogologo i manulauti, aemaise fo’i naunauta’iga o nai Sui Tauva ua folasia. O le latou naunauta’iga, o le tautua i aiga, tautua nu’u ma afioaga, tautua ekalesia, tautua Itumalo aemaise o le atunu’u atoa. Tatou va’ai pea, auā e ‘ese lava folafolaga i le taimi e sauni ai e tauva, ‘ese fo’i galuega fa’atino pe a tula’i mai.
E i ai lo’u talitonuga, so’o se Sui lava e tausinio mo le Palota, ua i ai uma agava’a e tatau ai ona tauva ai. Ua tatou iloa uma agava’a e pei o le alofa, loto maualalo, ‘aua le fa’ailoga tagata ma ia amiotonu ma fa’amaoni i luma o le Atua.
Ua tatou iloa lelei i’uga o nei mea uma pe afai tatou te lē fa’amaoni i ta’utinoga sa fai. A aunoa i tatou ma le Atua, e leai se aogā e tauva ai. O galuega uma fo’i e te faia, e fai fua, auā e le’o i ai le finagalo o le Atua. Afai o le musumusuga a le Agaga o le Atua e te tauva mo se manuia o lou Itumalo, o lena, ae afai e te alu ma le naunauta’iga, na’o oe, o lou aiga ma lau fanau, o lo’o silasila lava Fofoga o le Atua i lou fa’amaoni. Ia avea oe o se Sui Tauva e ‘alo ‘ese mai soligātulafono, ne’i mea ane e le’i solitulafono i le taimi nei, ae avea ma Faipule, ona pei lea o oe o se sifi, ona tatou fa’alogo fo’i laia i luga o leitio, nusipepa ma televise ua fa’asalalau mai ai se Faipule ua tu i luma o le Fa’amasinoga. A e loto maualalo ma e pulea lou loto, o oe lava o le toa filifilia.
